ଦେବ ଆନନ୍ଦଙ୍କ ଅଭିନୀତ ‘ହରେ ରାମା ହରେ କ୍ରିଷ୍ଣା’ ସେ ସମୟରେ ହିଟ୍ ସାବ୍ୟସ୍ତ ହୋଇଥିଲା। ଭାଇ-ଭଉଣୀ ସମ୍ପର୍କକୁ ବେଶ୍ ସୁନ୍ଦର ଭାବରେ ଉପସ୍ଥାପନା କରିଥିଲେ ନିର୍ଦ୍ଦେଶକ ଦେବ ଆନନ୍ଦ। ସେଥିରେ ରାଖୀକୁ ନେଇ ଏକ ହୃଦୟସ୍ପର୍ଶୀ ଗୀତ ଦୃଶ୍ୟାୟିତ ହୋଇଥିଲା। ତାହା ଥିଲା ‘ଫୁଲେଁା କା ତାରେଁା କା କ୍ୟା କହେନା ହୈ, ଲାଖେଁା ହଜାରୋ ମେଁ ମେରା ବହନା ହୈ’। ଏହି ଗୀତର ତାଳେ ତାଳେ ଦେବ ଆନନ୍ଦ ଏବଂ ଜୀନତ ଅମନଙ୍କ ଅଭିନୟ କେତେ ଜୀବନ୍ତ ଥିଲା ତାହା କହିବା ବାହୁଲ୍ୟ। ଆନନ୍ଦ ବକ୍ସିଙ୍କ ରଚିତ ଉକ୍ତ ଗୀତଟିକୁ ଆର.ଡି.ବର୍ମନ ସ୍ବର ଦେଇଥିବା ବେଳେ କଣ୍ଠଦାନ କରିଥିଲେ କିଶୋର କୁମାର ଏବଂ ଲତା ମଙ୍ଗେସକର। ଲତାଙ୍କ କଣ୍ଠରେ ଆଉ ଏକ ରାଖୀ ଗୀତକୁ ମଧ୍ୟ ଦର୍ଶକ ବେଶ୍ ପସନ୍ଦ କରିଥିଲେ। ଗୀତଟି ହେଲା-‘ଭୈୟା ମେରି ରାଖୀ କେ ବନ୍ଧନ କୋ ନିଭାନା’ ଆଉ ଫିଲ୍ମଟି ଥିଲା ‘ଛୋଟା ବହନ୍’। ବଲରାଜ ସାହାଣୀ ଏବଂ ରେହମନଙ୍କୁ ନେଇ ଏଥିରେ ଏକ ରାଖୀ ଗୀତ ସଂଯୋଜିତ ହୋଇଥିଲା, ଯାହା ପାଇଁ କଣ୍ଠଦାନ କରିଥିଲେ ଲତା। ଶୈଳେନ୍ଦ୍ରଙ୍କ ରଚିତ ଏହି ଗୀତକୁ ସ୍ବର ଦେଇଥିଲେ ଶଙ୍କର-ଜୟକିଶନ। ୧୯୭୪ରେ ନିର୍ମିତ ହୋଇଥିଲା ହିନ୍ଦୀ ସିନେମା ‘ରେଶମ କି ଡୋରି’। ଭାଇ-ଭଉଣୀ ସମ୍ପର୍କକୁ ଆଧାର କରି ପ୍ରସ୍ତୁତ ଏହି ଚଳଚ୍ଚିତ୍ରଟିର ରାଖୀ ଗୀତ ‘ବହନା ନେ ଭାଇ କା କଲାଇ ସେ ରାଖୀ ବାନ୍ଧା ହୈ’। ଧମେନ୍ଦ୍ର ଏବଂ ସାଇରାବାନନୋଙ୍କୁ ନେଇ ଏହି ଗୀତଟିର ଦୃଶ୍ୟାୟନ କରାଯାଇଥିଲା। ଗୀତଟି ପାଇଁ କଣ୍ଠଦାନ କରିଥିଲେ ସୁମନ କଲ୍ୟାନପୁର।
ରାଖୀ ବାନ୍ଧିଲି ମୋ ରଖିବ ମାନ
‘ଭାଇ ମୋର ତୋତେ ରହିଲା ରାଣ କହିବୁନି କଥା ପଦିଏ ଟାଣ, ତୋ ଆଖିରେ କେବେ ଦେବିନି ମୁଁ ଲୁହ ହସାଇବି ତୋତେ ସାରା ଜୀବନ.. ରାଖୀ ବାନ୍ଧିଲି ମୋ ରଖିବ ମାନ’ ରାଖୀକୁ ନେଇ ଦୃଶ୍ୟାୟିତ ଏହି ଗୀତଟି କେତେ ଶ୍ରୋତାଦୃତ ତାହା କହିବା ବାହୁଲ୍ୟ। ଶିବାନୀ ଫିଲ୍ମସ ବ୍ୟାନରରେ ପ୍ରସ୍ତୁତ ଏହି ପ୍ରଥମ ସିନେମାର ଟାଇଟଲ ଥିଲା ‘ରାଖୀ ବାନ୍ଧିଲି ମୋ ରଖିବ ମାନ’। ରତିକାନ୍ତ କାନୁନଗୋଙ୍କ ପ୍ରଯୋଜନାରେ ଫିଲ୍ମଟିର ନିର୍ଦ୍ଦେଶନା ଦେଇଥିଲେ ସଞ୍ଜୟ ନାୟକ। କେବଳ ସେତିକି ନୁହେଁ, ମଳୟ ମିଶ୍ରଙ୍କ ସ୍ବର ସଂଯୋଜନାରେ ଏହି ଫିଲ୍ମଟି ମ୍ୟୁଜିକାଲ ହିଟ୍ ସାବ୍ୟସ୍ତ ହୋଇଥିଲା। ଏଥିରେ ଭାଇ ଭୂମିକାରେ ମିହିର ଦାସ ଓ ଭଉଣୀ ରୋଲ୍ରେ ଅନୁ ଚୌଧୁରୀଙ୍କ ଭୂମିକା ଏବଂ ପ୍ରୀତିନନ୍ଦା ରାଉତରାୟଙ୍କ କଣ୍ଠରେ ଏହି ଟାଇଟଲ ଗୀତ ସେ ସମୟରେ ବେଶ୍ ଦର୍ଶକାଦୃତ ହୋଇଥିଲା। ରାଖୀକୁ ନେଇ ଦୃଶ୍ୟାୟିତ ଅନ୍ୟତମ ଲୋକପ୍ରିୟ ଗୀତ ଥିଲା ‘ରାଖୀରେ ରାଖୀ ତୁ ରହିଲୁ ସାକ୍ଷୀ’। ‘ଚକା ଆଖି ସବୁ ଦେଖୁଛି’ ଚଳଚ୍ଚିତ୍ରରେ ସଂଯୋଜିତ ଏହି ଗୀତରେ ଉତ୍ତମ ମହାନ୍ତି ଏବଂ ପ୍ରତିଭା ସାହୁ ଅଭିନୟ କରିଥିଲେ। ୧୯୮୯ରେ ରାଜୁ ମିଶ୍ରଙ୍କ ନିର୍ଦ୍ଦେଶନାରେ ମୁକ୍ତିଲାଭ କରିଥିବା ଏହି ସିନେମାର ଗୀତଗୁଡିକୁ ସ୍ବର ଦେଇଥିଲେ ଅକ୍ଷୟ ମହାନ୍ତି। ୧୯୯୭ରେ ନିର୍ମିତ ହୋଇଥିଲା ଓଡ଼ିଆ ସିନେମା ‘ରାଖୀ ଭିଜିଗଲା ଆଖି ଲୁହରେ’। ଏଥିରେ ବିଜୟ ମହାନ୍ତି ଭାଇ ଏବଂ ରଚନା ବାନାର୍ଜୀ ଭଉଣୀ ଭୂମିକାରେ ଅଭିନୟ କରିଥିଲେ। ଦୁହିଁଙ୍କୁ ନେଇ ଦୃଶ୍ୟାୟିତ ‘ସୁନା ରୁପା ଗଉଣୀ’ ଗୀତଟି ବେଶ୍ ଲୋକପ୍ରିୟ ହୋଇଥିଲା। ସଂଗ୍ରାମ ବିଶ୍ୱାଳ ଏହି ଫିଲ୍ମର ନିର୍ଦ୍ଦେଶନା ଦେଇଥିଲେ ଏବଂ ସ୍ବର ସଂଯୋଜନା କରିଥିଲେ ଅରୁଣ ମହାନ୍ତି। ବିଜୟ, ରଚନାଙ୍କ ବ୍ୟତୀତ ସିଦ୍ଧାନ୍ତ ମହାପାତ୍ର, ଦେବୁ ବୋଷଙ୍କୁ ମଧ୍ୟ ଏଥିରେ ଦେଖିବାକୁ ମିଳିଥିଲା। ଏହାବ୍ୟତୀତ ଓଡ଼ିଆ ସିନେମା ‘ସମୟ ହାତରେ ଡୋରି’ରେ ‘ମୋ ହାତରେ ବାନ୍ଧି ଦେଲୁ ରାଖୀ’ ଦୃଶ୍ୟାୟିତ ହୋଇଥିଲା। ଭାଇ-ଭଉଣୀ ସମ୍ପର୍କକୁ ନେଇ ପ୍ରସ୍ତୁତ ହୋଇଥିଲା ଓଡ଼ିଆ ଚଳଚ୍ଚିତ୍ର ‘ଫେରିଆ ମୋ ସୁନା ଭଉଣୀ’। ରଣଜିତ ମହାନ୍ତିଙ୍କ ନିର୍ଦ୍ଦେଶିତ ଏହି ଚିତ୍ରରେ ମିହିର ଦାସ, ଅପରାଜିତା ମହାନ୍ତି, ବବି ମିଶ୍ର ଏବଂ ଜିନା ଅଭିନୟ କରିଥିଲେ।