ମୁମ୍ବାଇ: କୋଲକାତାର ରେଳଷ୍ଟେଶନ୍ରେ ସିନେମା ଗୀତ ଗାଇ ଭିକ ମାଗୁଥିବା ରାନୁ ମଣ୍ଡଳ ବର୍ତ୍ତମାନ ମୁମ୍ବାଇ ସଂଗୀତ ଜଗତର ଅନ୍ୟତମ ସେଲିବ୍ରିଟି। ତାଙ୍କ ଗାୟନ ଶୈଳୀକୁ ନେଇ ବର୍ତ୍ତମାନ ସୋସିଆଲ ମିଡିଆରେ ଖୁବ୍ ଚର୍ଚ୍ଚା ହେଉଥିବାବେଳେ ତାଙ୍କ ଜୀବନୀକୁ ନେଇ ଫିଲ୍ମ ନିର୍ମାଣ କରାଯାଇପାରେ ବୋଲି ରାନୁ ପ୍ରକାଶ କରିଛନ୍ତି। ୧୯୬୦ ନଭେମ୍ବର ୫ରେ ସେ ଏକ ଧନିକ ପରିବାରରେ ଜନ୍ମ ହୋଇଥିଲେ ହେଁ ମାତାପିତାଙ୍କଠାରୁ ତାଙ୍କୁ ପୃଥକ୍ କରିଦିଆଯାଇଥିଲା। ବଲିଉଡ ଷ୍ଟାର ଫିରୋଜ ଖାନ୍ଙ୍କ ରୋଷେଇଆକୁ ସେ ବିବାହ କରିବା ପରେ ନିଜ ରାଜ୍ୟ ପଶ୍ଚିମବଙ୍ଗରୁ ମୁମ୍ବାଇ ଚାଲିଯାଇଥିଲେ। ସ୍ବାମୀଙ୍କ ମୃତ୍ୟୁ ପରେ ରାନୁଙ୍କ ଜୀବନ ଆକାଶରେ କଳାବାଦଲ ଘୋଟି ଆସିବାରୁ ସେ ବଞ୍ଚତ୍ବା ପାଇଁ ସଂଗ୍ରାମ କରିଥିଲେ। ରାନାଘାଟ ଷ୍ଟେଶନ୍ ସିଙ୍ଗରରୁ ରାନୁ ଆଜି ପାଲଟିଯାଇଛନ୍ତି ବଲିଉଡ୍ ସିଙ୍ଗର। ରେଲଓ୍ବେ ପ୍ଲାଟଫର୍ମରେ ନିଜର ସୁଲଳିତ କଣ୍ଠରେ ଲତା ମଙ୍ଗେସ୍କରଙ୍କ ବହୁଚର୍ଚ୍ଚିତ ସଂଗୀତ ‘ଏକ ପ୍ୟାର କା ନଗ୍ମା ହୈ’ ସୋସିଆଲ ମେଡିଆରେ ଭାଇରାଲ ହେବାପରେ ବହୁ ସଂଗୀତ ପ୍ରେମୀ ଓ ଜନସାଧାରଣ ମନ୍ତ୍ରମୁଗ୍ଧ ହୋଇଥିଲେ। ସଂଗୀତ ନିର୍ଦ୍ଦେଶକ ହିମେଶ ରେଶ୍ମିଆ ବଲିଉଡର ପ୍ରଚ୍ଛଦପଟ ଗାୟିକା ଭାବରେ ତାଙ୍କୁ ସୁଯୋଗ ଦେଇଛନ୍ତି। ଆଜି ଯେଉଁ ସ୍ତରରେ ସେ ପହଞ୍ଚତ୍ଛନ୍ତି ତାହା ସ୍ବପ୍ନ ଭଳି ଲାଗୁଛି ବୋଲି ରାନୁ କହିଛନ୍ତି। ‘ମୁଁ ଫୁଟପାଥ୍ରେ ଜନ୍ମ ହୋଇ ନ ଥିଲି। ମୋ ପରିବାରର ବଂଶମର୍ଯ୍ୟାଦା ଥିଲା। ୬ ମାସର ହୋଇଥିବାବେଳେ ମାତାପିତାଙ୍କଠାରୁ ପୃଥକ୍ କରିଦିଆଯାଇଥିଲା। ଜେଜେ ମା’ଙ୍କ ଆଦରଯତ୍ନରେ ପ୍ରତିପାଳିତ ହୋଇଥିଲେ ବି ବଞ୍ଚତ୍ବା ଥିଲା ଖୁବ୍ କଷ୍ଟଦାୟକ। ବାହାଘର ପରେ ଦୁର୍ଭାଗ୍ୟ ପିଛା ଛାଡି ନ ଥିଲା। ପେଟ ପୋଷିବାକୁ ରେଲଷ୍ଟେଶନ୍ରେ ଗୀତ ଗାଇ ଭିକ ମାଗିବାକୁ ପଡୁଥିଲା। ଜୀବନ ଯୁଦ୍ଧରେ ସଂଗ୍ରାମ କଲାବେଳେ ସବୁବେଳେ ଈଶ୍ୱରଙ୍କ ଉପରେ ଭରସା ରଖୁଥିଲି। ଗୀତ ଗାଇବା ପାଇଁ ସୁଯୋଗ ନ ଥିଲା। ଗୀତ ଭଲଲାଗେ ବୋଲି ପରିସ୍ଥିତିରେ ପଡି ଗାଉଥିଲି। ଲତା ମଙ୍ଗେସ୍କରଙ୍କ ଗୀତ ଖୁବ୍ ପସନ୍ଦ। ତାଙ୍କର ଗୀତ ଗାଇବା ଶୈଳୀ ରେଡିଓ ଓ କ୍ୟାସେଟରୁ ଶିଖି ନେଉଥିଲି।’
ରାନୁଙ୍କର ୫ରୁ ୬ଟି ଗୀତ ରେକର୍ଡିଂ ହୋଇସାରିଲାଣି। ରାନୁ ତାଙ୍କ ଯାତ୍ରାପଥରେ କେତେ ଦୂର ଯାଇପାରୁଛନ୍ତି ତାହା ଦେଖିବାକୁ ପ୍ରଶଂସକମାନେ ଚାହିଁ ରହିଛନ୍ତି।