ବାସେଲ(ସୁଇଜରଲାଣ୍ଡ),୨୪।୮(ପି.ଟି.): ଦେଶର ତାରକା ମହିଳା ଶଟଲର ପି.ଭି. ସିନ୍ଧୁ ଏଠାରେ ଚାଲିଥିବା ବିଡବ୍ଲ୍ୟୁଏଫ୍ ବିଶ୍ୱ ବ୍ୟାଡ୍ମିଣ୍ଟନ ଚାମ୍ପିୟନଶିପରେ ରୌପ୍ୟ ପଦକ ପକ୍କା କରିଛନ୍ତି। ଶନିବାର ଅନୁଷ୍ଠିତ ସେମିଫାଇନାଲରେ ସିନ୍ଧୁ ଚାଇନାର ଚେନ ୟୁ ଫେଇଙ୍କୁ ସିଧାସଳଖ ସେଟ୍ରେ ହରାଇ ଦେଇଛନ୍ତି। ମ୍ୟାଚ୍କୁ ଗତ ଥରର ଉପବିଜେତା ୨୧-୭, ୨୧-୧୪ ଗେମ୍ରେ ଜିତି ନେଇଛନ୍ତି। ବିଜୟୀ ଲାଗି ତାଙ୍କୁ ୪୦ ମିନିଟ୍ ଲାଗିଥିଲା। ଏଥିସହ କ୍ରମାଗତ ତୃତୀୟ ଥର ପାଇଁ ସେ ଏହି ସମ୍ମାନଜନକ ଟୁର୍ନାମେଣ୍ଟର ଫାଇନାଲରେ ପ୍ରବେଶ କରିଛନ୍ତି। ୨୪ ବର୍ଷୀୟା ଖେଳାଳି ସିନ୍ଧୁ ଫାଇନାଲରେ ୨୦୧୩ ସଂସ୍କରଣ ଚାମ୍ପିୟନ ରାଚନୋକ ଇଣ୍ଟାନନ ଓ ୨୦୧୭ ଚାମ୍ପିୟନ ନାଜୋମି ଓକୁହରାଙ୍କ ମଧ୍ୟରେ ଖେଳାଯିବାକୁ ଥିବା ସେମିଫାଇନାଲର ବିଜେତାଙ୍କୁ ରବିବାର ଭେଟିବେ। ଉଲ୍ଲେଖଥାଉ କି, ସିନ୍ଧୁ ୨୦୧୮ ଓ ୨୦୧୭ ସଂସ୍କରଣରେ ଫାଇନାଲରେ ପ୍ରବେଶ କରିଥିଲେ ମଧ୍ୟ କାରୋଲିନା ମାରିନ ଓ ଓକୁହରାଙ୍କଠାରୁ ପରାସ୍ତ ହୋଇ ସ୍ବର୍ଣ୍ଣ ପଦକରୁ ବଞ୍ଚତ୍ତ ହୋଇଥିଲେ।