ଭାରତୀୟ ତାରକା ମହିଳା ଶଟଲର ପି. ଭି. ସିନ୍ଧୁଙ୍କ ହୃଦୟ ନାହିଁ। ଏଭଳି କଡ଼ା ମନ୍ତବ୍ୟ ଦେଇଛନ୍ତି ବିଶ୍ୱ ଚାମ୍ପିୟନ ଖେଳାଳିଙ୍କ ପୂର୍ବତନ କୋଚ୍ କିମ୍ ଜି ହ୍ୟୁନ। ପୂର୍ବରୁ ବିଶ୍ୱ ଚାମ୍ପିୟନଶିପ୍ରେ ଦୁଇ ରୌପ୍ୟ ଓ ବ୍ରୋଞ୍ଜ ପଦକ ଜିତି ସାରିଥିଲେ ମଧ୍ୟ ସିନ୍ଧୁ ସ୍ବର୍ଣ୍ଣ ପଦକ ସ୍ବାଦ ଚାଖି ନ ଥିଲେ। ମାତ୍ର କିମ୍ଙ୍କ ନେତୃତ୍ୱରେ ବାସେଲଠାରେ ସିନ୍ଧୁଙ୍କ ବିଶ୍ୱ ଚାମ୍ପିୟନ ହେବାର ସ୍ବପ୍ନ ପୂରା ହେଲା। ଆଉ ଭାରତକୁ ମିଳିଥିଲା ବିଶ୍ୱ ଚାମ୍ପିୟଶିପ୍ରେ ପ୍ରଥମ ସ୍ବର୍ଣ୍ଣ। ଏହାର କିଛି ସପ୍ତାହ ପରେ କୋରିଆନ କୋଚ ଭାରତ ଛାଡ଼ି ସ୍ବାମୀଙ୍କ ସ୍ବାସ୍ଥ୍ୟାବସ୍ଥା ଭଲ ନ ଥିବାରୁ ନ୍ୟୁଜିଲାଣ୍ଡ ଚାଲିଯାଇଥିଲେ। ମାତ୍ର ଏକ ସପ୍ତାହ ନ ପୂରୁଣୁ ଚାଇନିଜ ତାଇପେର ଏପି ବ୍ୟାଡ୍ମିଣ୍ଟନ କ୍ଲବରେ କୋଚ୍ ଭାବେ ଯୋଗଦେଇଥିଲେ। କୋରିଆନ ସୋସିଆଲ ମିଡିଆକୁ ଏକ ସାକ୍ଷାତ୍କାର ଦେଇ କିମ୍ ଏ ସମ୍ପର୍କରେ କହିଛନ୍ତି, ବାସେଲରୁ ଫେରିଲା ପରେ ମୁଁ ଖୁବ୍ ଅସୁସ୍ଥ ହୋଇଯାଇଥିଲି। ଏପରି କି ମେଡିକାଲରେ ୫ ଇଞ୍ଜେକଶନ ମଧ୍ୟ ନେଇଥିଲି। ମୋତେ କେହି ଦେଖିବାକୁ ଆସି ନ ଥିଲେ। କିନ୍ତୁ ଟ୍ରେନିଂ ପୁଣି କେବେ ଆରମ୍ଭ କରିବା ନେଇ ସିନ୍ଧୁ ଫୋନ ଯୋଗେ ପଚାରିଥିଲେ। ଏଣୁ ମୋତେ ଲାଗିଲା ତାଙ୍କର ହୃଦୟ ନାହିଁ। ତାଙ୍କର କେବଳ ଟ୍ରେନିଂ ପାଇଁ ମୁଁ ଦରକାର। ଏହାପରେ ଘରକୁ ଫେରିବାକୁ ନିଷ୍ପତ୍ତି ନେଲି। ହେଲେ ଏହାକୁ ଅସ୍ବୀକାର କରିଛନ୍ତି ସିନ୍ଧୁଙ୍କ ବାପା ତଥା ପୂର୍ବତନ ଭଲିବଲ ଖେଳାଳି ପି.ଭି. ରମଣ। ସେ କହିଛନ୍ତି କିମ୍ଙ୍କ ଅସୁସ୍ଥତା ସମ୍ପର୍କରେ କେହି ଜଣାଇ ନ ଥିଲେ, ନ ହେଲେ ସିନ୍ଧୁ ମେଡିକାଲ ଯାଇଥାନ୍ତେ।