ନୂଆଦିଲ୍ଲୀ,୨୮।୨- ଇଣ୍ଡୋନେସିଆର କିମ୍ବଦନ୍ତୀ କୋଚ ଅଗୁସ ଡ୍ବି ସାଣ୍ଟୋସୋ ବହୁ ବିଶ୍ୱ ଚାମ୍ପିୟନ ଓ ଅଲିମ୍ପିକ୍ସ ପଦକଧାରୀ ଶଟଲର ସୃଷ୍ଟି କରିଛନ୍ତି। ଆଗାମୀ କିଛି ସପ୍ତାହରେ ସେ ଭାରତ ଆସିବେ। ଭାରତୀୟ ସିଙ୍ଗଲ୍ସ ଷ୍ଟାର ପି. ଭି. ସିନ୍ଧୁ, ସାଇନା ନେହ୍ବାଲ ଓ କିଡାମ୍ବି ଶ୍ରୀକାନ୍ତ ଟୋକିଓ ଅଲିମ୍ପିକ୍ସ ଯୋଗ୍ୟତା ଲାଗି ସଂଘର୍ଷ କରୁଛନ୍ତି। ଏମାନଙ୍କ ଭାଗ୍ୟ ପରିବର୍ତ୍ତନ କରିପାରନ୍ତି ସାଣ୍ଟୋସୋ। ତାଙ୍କ ନେତୃତ୍ୱରେ ୧୯୯୮ରେ ବ୍ୟାଙ୍କକ୍ ପୁରୁଷ ଦଳ ଏସିଆନ ସ୍ବର୍ଣ୍ଣ ପଦକ ହାସଲ କରିଥିଲା। ୨୦୦୦ ସିଡ୍ନୀ ଅଲିମ୍ପିକ୍ସ ରୌପ୍ୟ ଓ ୨୦୦୧ ବିଶ୍ୱ ଚାମ୍ପିୟନ ଖେଳାଳିଙ୍କୁ ସେ କୋଚିଂ ଦେଇଥିଲେ। ରିଓ ଅଲିମ୍ପିକ୍ସବେଳେ ସାଣ୍ଟୋସୋ ଦକ୍ଷିଣ କୋରିଆ ଦଳର କୋଚ ଥିଲେ। ତାଙ୍କ କାର୍ଯ୍ୟକାଳରେ ହିଁ ସନ ଓ୍ବାନ ହୋଇ ଶୀର୍ଷ ର଼୍ୟାଙ୍କ ଅଧିକାର କରିଥିଲେ। ନିକଟରେ ସେ ଥାଇଲାଣ୍ଡ ଜାତୀୟ ଦଳ ସହ କାର୍ଯ୍ୟ କରିଥିଲେ। ଏବେ ସେ ଭାରତୀୟ ଦଳର କୋଚ ପାଇଁ ଆବେଦନ କରିଛନ୍ତି। ତାଙ୍କ ନାମକୁ ଭାରତ କ୍ରୀଡ଼ା ପ୍ରାଧିକରଣ (ସାଇ) ପକ୍ଷରୁ ମଞ୍ଜୁରୀ ଦିଆଯାଇଛି। ସାଇର ଏହି ପ୍ରସ୍ତାବକୁ କ୍ରୀଡ଼ା ମନ୍ତ୍ରଣାଳୟ ମଧ୍ୟ ସ୍ବୀକୃତି ଦେଇସାରିଛି ବୋଲି ସୂତ୍ରରୁ ଜଣାପଡ଼ିଛି। ଜାତୀୟ ଦଳର ମୁଖ୍ୟ କୋଚ୍ ପୁଲେଲ୍ଲା ଗୋପୀଚାନ୍ଦଙ୍କ ପରାମର୍ଶ କ୍ରମେ ସାଣ୍ଟୋସୋଙ୍କୁ ନିଯୁକ୍ତ କରାଯାଉଛି। ତାଙ୍କୁ ମାସିକ ୮ ହଜାର ଡଲାର (ଭାରତୀୟ ମୁଦ୍ରାରେ ୫.୭ ଲକ୍ଷ ଟଙ୍କା) ଦରମା ମିଳିବ। ଯଦି ଟୋକିଓ ଅଲିମ୍ପିକ୍ସରେ ଭାରତୀୟ ଶଟଲରଙ୍କ ପ୍ରଦର୍ଶନ ସନ୍ତୋଷଜନକ ରହିଲା, ତେବେ ତାଙ୍କ ଚୁକ୍ତିକୁ ପରବର୍ତ୍ତୀ ଅଲିମ୍ପିକ୍ସ ପର୍ଯ୍ୟନ୍ତ ବୃଦ୍ଧି କରାଯିବ। ଭାରତୀୟ ବ୍ୟାଡ୍ମିଣ୍ଟନ ଆସୋସିଏଶନ (ବାଇ)ର ପ୍ରଶାସକମାନେ ବିଶେଷ କରି ସିନ୍ଧୁଙ୍କ ପ୍ରଦର୍ଶନ ନେଇ ଚିନ୍ତିତ। କାରଣ ଦକ୍ଷିଣ କୋରିଆନ କୋଚ୍ କିମ ଜି ହ୍ୟୁନଙ୍କ ପଦ ଛାଡ଼ିବା ପରେ ସିନ୍ଧୁ ସଂଘର୍ଷ କରୁଛନ୍ତି। କିମ୍ଙ୍କ ନେତୃତ୍ୱରେ ସିନ୍ଧୁ ବିଶ୍ୱ ଚାମ୍ପିୟନଶିପ ଟାଇଟଲ ହାତେଇଥିଲେ। କିମ୍ ପଦ ଛାଡ଼ିବା ପରେ ସିନ୍ଧୁ ଅନ୍ତର୍ଜାତୀୟ ଇଭେଣ୍ଟର ପ୍ରଥମ କିମ୍ବା ଦ୍ୱିତୀୟ ରାଉଣ୍ଡରୁ ଆଗକୁ ବଢ଼ିପାରୁ ନାହାନ୍ତି।