ବଅଁରପାଳ, ୧୨ା୬(ଡି.ଏନ.ଏ.)- ଅନୁଗୋଳ ଜିଲା ବଅଁରପାଳସ୍ଥିତ ନାଲ୍କୋ ସିପିପି ପ୍ଲାଣ୍ଟର ନିଷିଦ୍ଧାଞ୍ଚଳରେ ଜଣେ ଠିକା ଶ୍ରମିକ ଟିକ୍ଟକ୍ ଭିଡିଓ ଶୁଟିଂ କରିବା ମହଙ୍ଗା ପଡିଛି। ସୋସିଆଲ ମିଡିଆରେ ଉକ୍ତ ଭିଡିଓ ଭାଇରାଲ ହେବା ପରେ ସମ୍ପୃକ୍ତ ଶ୍ରମିକଙ୍କଠାରୁ ଗେଟ୍ପାସ ଜବତ କରାଯାଇଥିବା ଜଣାପଡିଛି।
ସୂଚନା ଅନୁଯାୟୀ, ନାଲ୍କୋ ସିପିପି ପ୍ଲାଣ୍ଟର ସ୍ବିଚ୍ ୱାର୍ଡରେ କାମ କରୁଥିବା ଶ୍ରମିକ ଜଣକ ପ୍ଲାଣ୍ଟ ଭିତରେ ଟିକଟିକ୍ ଭିଡିଓ କରି ଭାଇରାଲ କରିଥିଲେ। ପ୍ଲାଣ୍ଟ ଭିତରର ଫଟୋ କିମ୍ବା ଭିଡିଓ କେହି ଉତ୍ତୋଳନ ନ କରିବାର ନିୟମ ଥିଲେ ମଧ୍ୟ ଶ୍ରମିକ ଜଣକ ତାହାର ଉଲ୍ଲଂଘନ କରିଥିବା ଅଭିଯୋଗ ହୋଇଛି। ଫଳରେ କାର୍ଯ୍ୟାନୁଷ୍ଠାନ ସ୍ବରୂପ କମ୍ପାନୀ ପକ୍ଷରୁ ତାଙ୍କ ଗେଟ୍ପାସ ଜବତ କରାଯାଇଛି। ଏ ନେଇ ନାଲ୍କୋର ଜନୈକ ବରିଷ୍ଠ ଅଧିକାରୀ କହିଛନ୍ତି, ସମ୍ପୃକ୍ତ ଠିକା ଶ୍ରମିକ ପ୍ଲାଣ୍ଟ ପରିସରର ନିଷିଦ୍ଧାଞ୍ଚଳରେ ଯେଉଁ ଟିକ୍ଟକ୍ କରିଛନ୍ତି ତାହା ବେଆଇନ। ଏଥିପାଇଁ କାର୍ଯ୍ୟାନୁଷ୍ଠାନ ସ୍ବରୂପ ତାଙ୍କ ଗେଟ୍ ପାସ୍ ଜବତ କରାଯାଇଛି ବୋଲି ସେ ପ୍ରକାଶ କରିଛନ୍ତି।