ବ୍ୟାକଂକ,୧୮।୪: ସାରା ବିଶ୍ୱକୁ କରୋନା ଭାଇରସ ସଂକ୍ରମଣ ହେବା ଫଳରେ ପ୍ରାୟ ସବୁଦିନ କିଛି ନା କିଛି ଦୁଃଖଦ ଖବର ସାମ୍ନାକୁ ଆସୁଛି। ତେବେ କରୋନାଠାରୁ ଦୂରେଇ ରହିବାକୁ ହେଲେ ସାନିଟାଇଜେଶନକୁ ସବୁଠି ଗୁରୁତ୍ୱ ଦିଆଯାଉଛି। ଏହି ସମୟରେ ଏମିତି ଏକ ଖବର ଭାଇରାଲ ହୋଉଛି ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ପ୍ରାୟ ସବୁ ସ୍ଥାନରେ ସାନିଟାଇଜେଶନ ମଣିଷ ଦ୍ୱାରା କରାଯାଉଥିବା ବେଳେ ଥାଇଲାଣ୍ଡରେ କିନ୍ତୁ ଗୋଟିଏ ସ୍ଥାନରେ ଏହି କାମ ସିମ୍ପାଜି ଦ୍ୱାରା କରାଯାଉଥିବା ଦେଖିବାକୁ ମିଳିଛି। ଥାଇଲାଣ୍ଡର ସିମୁଟ ପ୍ରାକର୍ନ କ୍ରକୋଡାଇଲ ଫାର୍ମରେ ଏକ ସିମ୍ପାଜି ସାଇକେଲ ଉପରେ ବସି ସାନିଟାଇଜେଶନ ପାଇଁ ଡିସ୍ଇନ୍ଫେକ୍ଟେଡ ସ୍ପ୍ରେ କରୁଥିବା ଦେଖାଯାଇଛି। ଏମିତି ଏକ ଭିଡିଓ ସାମ୍ନାକୁ ଆସିବା ପରେ ପ୍ରାଣୀ ଅଧିକାର ସଙ୍ଗଠନ(ପେଟା) ଏହାକୁ ନେଇ ଥାଇଲାଣ୍ଡ ପୋଲିସ ନିକଟରେ ଏକ ଅଭିଯୋଗ ଆଣିଥିବା କୁହାଯାଉଛି। ଏହାକୁ ନେଇ ପେଟା କହିଛି ଥାଇଲାଣ୍ଡରେ ସିମ୍ପାଜିକୁ ସାନିଟାଇଜେଶନ କାମରେ ଲଗାଇବା ଦୁଃଖଦ ଘଟଣା। କାରଣ ପୂର୍ବରୁ ଏଠାରେ ଥିବା ପ୍ରାଣୀଙ୍କ ସ୍ଥିତି ବହୁତ ଖରାପ। ଏହୀ ଫାର୍ମରେ ଥିବା ସିମ୍ପାାଜି ଓ କୁମ୍ଭିରଙ୍କୁ କେବଳ ଲୋକମାନଙ୍କ ମନୋରଞ୍ଜନ ପାଇଁ ରଖାଯାଇଛି। ନଚେତ୍ ଏମାନଙ୍କୁ ପଞ୍ଜୁରୀରେ ବନ୍ଦ କରି ରଖାଯାଇଛି। ଏହା ପୂର୍ବରୁ ମଧ୍ୟ କୁମ୍ଭିରମାନଙ୍କୁ ଖାଦ୍ୟ ନ ଦେବା, ଭାଲୁ ରହୁଥିବା ସ୍ଥାନକୁ ସଫା ନ କରିବା ଭଳି ଖବର ସାମ୍ନାକୁ ଆସିଥିବା ପେଟା କହିଛି। ହେଲେ ଏହାକୁ ନେଇ ଫାର୍ମ ପ୍ରଶାସନ ସଫେଇ ଦେଇ କହିଛନ୍ତି, ଏବେ ଏହା ବନ୍ଦ ଥିବାରୁ ସିମ୍ପାଜିକୁ ସାନିଟାଇଜିଂ କାମରେ ଲଗାଯାଇ ନ ଥିଲା ବରଂ ତା’ର ଏକ୍ସରସାଇଜ୍ କରାଯାଉଥିଲା। ଏବେ ଏହି ଫାର୍ମ ବନ୍ଦ ଥିବାରୁ ସିମ୍ପାଜିର ମାନସିକ ସ୍ଥିତିରେ ପରିବର୍ତ୍ତନ ପାଇଁ ତାକୁ ବାହାରେ ବୁଲାଯାଉଥିବା ସେ ସଫେଇ ଦେଇଛନ୍ତି ବୋଲି କୁହାଯାଉଛି।