ନଟିଂହାମ,୧୮।୫- ଏଠାରେ ଖେଳାଯାଇଥିବା ପାକିସ୍ତାନ ବିପକ୍ଷ ୪ର୍ଥ ମ୍ୟାଚ୍ରେ ଇଂଲଣ୍ଡ ଦଳ ୩ ଉଇକେଟରେ ବିଜୟ ହାସଲ କରିଛି। ଏଥିସହ ୫ ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍କୁ ଘରୋଇ ଇଂଲଣ୍ଡ ଦଳ ୩-୦ ବ୍ୟବଧାନରେ ଜିତି ନେଇଛି। ତେବେ ସିରିଜର ପୂର୍ବ ଦୁଇ ମ୍ୟାଚ୍ ଭଳି ଏଥିରେ ମଧ୍ୟ ଉଭୟ ଇନିଂସରେ ବୃହତ୍ ଦଳଗତ ସ୍କୋର ଦେଖିବାକୁ ମିଳିଥିଲା। ପାକିସ୍ତାନ ଦଳ ପକ୍ଷରୁ ଧାର୍ଯ୍ୟ ୩୪୧ ରନ୍ର ବିଜୟ ଲକ୍ଷ୍ୟକୁ ଇଂଲଣ୍ଡ ଅନ୍ତିମ ଓଭରରେ ୭ ଉଇକେଟ ହରାଇ ହାସଲ କରି ନେଇଥିଲା।
ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ପାକିସ୍ତାନ ଧାର୍ଯ୍ୟ ୫୦ ଓଭରରେ ୭ ଉଇକେଟ ହରାଇ ୩୪୦ ରନ୍ କରିଥିଲା। ଦଳ ପାଇଁ ବାବର ଆଜାମ ୧୧୫ ରନ୍ କରିଥିବାବେଳେ ମହମ୍ମଦ ହାଫିଜ ୫୯ ଓ ଫକର ଜାମନ ୫୭ ରନ୍ର ଉପଯୋଗୀ ଅର୍ଦ୍ଧଶତକୀୟ ଇନିଂସ ଖେଳିଥିଲେ। ଘରୋଇ ଦଳ ପକ୍ଷରୁ ଟମ କୁରାନ ୪ ଓ ମାର୍କ ଉଡ ୨ ଉଇକେଟ ନେଇଥିଲେ। ଜବାବରେ ଜାସନ ରୟଙ୍କ ବିସ୍ଫୋରକ ୧୧୪ ଓ ବେନ ଷ୍ଟୋକ୍ସଙ୍କ ଧୈର୍ଯ୍ୟପୂର୍ଣ୍ଣ ୭୧ ରନ୍ର ଇନିଂସ ଯୋଗୁ ଇଂଲଣ୍ଡ ୪୯.୩ ଓଭରରେ ୭ ଉଇକେଟ ହରାଇ ୩୪୧ ରନ୍ କରି ମ୍ୟାଚ୍ ଜିତିନେଇଥିଲା। ଦଳ ପାଇଁ ଜେମ୍ସ ଭିନ୍ସ ୪୩, ଜୋ ରୁଟ୍ ୩୬ ଓ କୁରାନ ୩୧ ରନ୍ କରିଥିଲେ। ଭ୍ରମଣକାରୀ ପାକିସ୍ତାନ ଲାଗି ବୋଲିଂରେ ମହମ୍ମଦ ହାସନାନ ଓ ଇମାଦ ଓ୍ବାସିମ ୨ ଲେଖାଏ ଉଇକେଟ ଅକ୍ତିଆର କରିଥିଲେ।
