ଭୁବନେଶ୍ୱର,୧୩ା୧(ବ୍ୟୁରୋ): ପ୍ରଦେଶ କଂଗ୍ରେସ କମିଟି(ପିସିସି)ର ଯୁବ ସଙ୍ଗଠନକୁ ସଜାଡିବା ଲାଗି ଦଳ ଭିତରେ ପ୍ରକ୍ରିୟା ଆରମ୍ଭ ହୋଇଛି। ଖୁବ୍ଶୀଘ୍ର ଦଳ ପକ୍ଷରୁ ନୂଆ ଯୁବ ସଭାପତି ଚୟନ କରାଯିବ ବୋଲି ସୂଚନା ମିଳିଛି। ପିସିସି ପକ୍ଷରୁ ଯୁବ ସଙ୍ଗଠନକୁ ସଜାଡିବାକୁ ଏକ କମିଟି ଗଠିତ ହୋଇସାରିଛି। ଉକ୍ତ କମିଟି ପକ୍ଷରୁ ରବିବାର କଂଗ୍ରେସ ରାଜ୍ୟ କାର୍ଯ୍ୟାଳୟଠାରେ ଏକ ବୈଠକ କରାଯାଇଛି। ବୈଠକରେ ରାଜ୍ୟର ବିଭିନ୍ନ ପ୍ରାନ୍ତରେ ଦଳ ପାଇଁ କାର୍ଯ୍ୟ କରୁଥିବା ଯୁବ କର୍ମୀ ଓ ନେତାଙ୍କୁ ସାମିଲ ହେବା ପାଇଁ କୁହାଯାଇଥିଲା। ସେହି ଅନୁଯାୟୀ ରାଜ୍ୟର ବିଭିନ୍ନ ଅଞ୍ଚଳରୁ ପ୍ରାୟ ୩୦୦ରୁ ଅଧିକ ଯୁବ ନେତା ଆସି କମିଟି ସଦସ୍ୟଙ୍କୁ ଭେଟିଛନ୍ତି। ଦଳ ପକ୍ଷରୁ ନୂଆ ଯୁବ ସଭାପତି ଚୟନ ହେବାକୁ ଥିବାବେଳେ ଏହା ନିର୍ବାଚନ ପ୍ରକ୍ରିୟା ନା ସିଲେକ୍ସନ ପଦ୍ଧତିରେ ହେବା ଦରକାର ସେ ନେଇ ଯୁବ ନେତାମାନଙ୍କଠାରୁ ମତାମତ ସଂଗ୍ରହ କରାଯାଇଛି। ପରେ ଏନେଇ ଏକ ରିପୋର୍ଟ ଉକ୍ତ କମିଟି ପ୍ରସ୍ତୁତ କରିଛି। କମିଟିରେ ଆବାହକ ଥିବା ପିସିସି କାର୍ଯ୍ୟକାରୀ ସଭାପତି ପ୍ରଦୀପ ମାଝୀ କହିଛନ୍ତି, ପର୍ଯ୍ୟାୟକ୍ରମେ ବହୁ ଯୁବ ନେତାଙ୍କ ସହ ଆଲୋଚନା କରିଛୁ। ଅଧିକାଂଶ ଯୁବକଙ୍କ ମତ ସଭାପତି ଚୟନ ସିଲେକ୍ସନ ପଦ୍ଧତିରେ ହେବା ଦରକାର। ନିର୍ଦ୍ଦିଷ୍ଟ କେତେଗୁଡିଏ ପ୍ରସଙ୍ଗରେ ଯୁବ କଂଗ୍ରେସ ଆନ୍ଦୋଳନକୁ ଓହ୍ଲାଇବା ଜରୁରୀ ବୋଲି ମଧ୍ୟ କେତେଜଣ ମତ ରଖିଛନ୍ତି। ଯାହା ବି ମତାମତ ଆସିଛି ସେହି ଅନୁଯାୟୀ ରିପୋର୍ଟ ପ୍ରସ୍ତୁତ କରି ପିସିସିକୁ ପଠାଇଦେବୁ। ପିସିସି ସଭାପତି ଯୁବ ସଭାପତି ଚୟନ କିପରି ହେବ ସେନେଇ ଯୁବ କଂଗ୍ରେସକର୍ମୀ ଏବଂ ନେତା କ’ଣ ଚାହୁଁଛନ୍ତି ତା’ର ରିପୋର୍ଟ ପ୍ରସ୍ତୁତ କରି ଦେବାକୁ କହିଥିଲେ। ସେହି ଅନୁସାରେ ରିପୋର୍ଟ ପ୍ରସ୍ତୁତ କରି ସୋମବାର ପିସିସିକୁ ପ୍ରଦାନ କରାଯିବ ବୋଲି ପ୍ରଦୀପ କହିଛନ୍ତି। ଏହାସହ ଭେଟିବାକୁ ଆସିଥିବା ନେତାଙ୍କ ମଧ୍ୟରୁ ଯୁବ ସଭାପତି ପଦ ପାଇଁ ୫ଜଣ ଆଗ୍ରହୀ ଥିବା ସେ କହିଛନ୍ତି।