ମୁମ୍ବାଇ,୧୧।୧୨: ସାରା ଦେଶରେ ପିଆଜର ବର୍ଦ୍ଧିତ ଦରଦାମ୍ ବଜାରରେ ନିଆଁ ଲଗାଇଛି। ଏଥିଯୋଗୁ ବ୍ୟବସାୟୀ ଓ ଗ୍ରାହକ ବହୁ ହଇରାଣ ହେଉଛନ୍ତି। ପିଆଜ ଦର ୧୦୦ରୁ ୧୨୦ ହୋଇଥିବା ବେଳେ ଇତିମଧ୍ୟରେ ଚୋରୀ ଘଟଣା ମଧ୍ୟ ସାମ୍ନାକୁ ଆସୁଛି। କିଏ ବିଲରୁ ପିଆଜ ଚୋରୀ କରୁଛି ତ କିଏ ବଜାରରୁ। ଏଭଳି ଦୃଶ୍ୟ ଦେଖିବାକୁ ମିଳିଛି ମୁମ୍ବାଇର ବଡାଲା ସ୍ଥିତ ଡୋଙ୍ଗରି ବଜାରରେ। କେହି ଦୁର୍ବୃତ୍ତ ୨ବସ୍ତା ପିଆଜ ଚୋରୀ କରିନେଇଥିଲେ। ଆଉ ଏହି ଚୋରୀର ସମସ୍ତ ଦୃଶ୍ୟ ସିିସିଟିଭିରେ ରେକର୍ଡ ହୋଇଥିଲା। ପିଆଜ ଚୋରୀ ହେବା ନେଇ ଜଣେ ବ୍ୟବସାୟୀ ଥାନାରେ ଅଭିଯୋଗ କରିଥିଲେ। ଅଭିଯୋଗ ପାଇବା ପରେ ପୋଲିସ ସେଠାରେ ଲାଗିଥିବା ସିସିଟିଭିକୁ ଯାଞ୍ଚ କରିଥିଲା। ଏହାକୁ ଆଧାର କରି ଦୀର୍ଘ ୬ ଦିନର ଖୋଜାଖୋଜି ପରେ ପୋଲିସ ୨ଜଣ ପିଆଜ ଚୋରକୁ ଧରିବାରେ ସକ୍ଷମ ହୋଇଛି। ସେମାନଙ୍କଠାରୁ ପ୍ରାୟ ୧୧୨ କିଲୋ ପିଆଜ ଜବତ କରାଯାଇଛି। ଯାହାର ଆନୁମାନିକ ମୂଲ୍ୟ ୨୧ହଜାର ଟଙ୍କା ହେବ ବୋଲି ପୋଲିସ ସୂଚନା ଦେଇଛି।
