ଲଖନପୁର,୨୯।୪(ଡି.ଏନ୍.ଏ)-ମହାମାରୀ କରୋନାକୁ ନେଇ ସାରା ବିଶ୍ୱ ଚିନ୍ତିତ। ଏହାର ସଂକ୍ରମଣ ରୋକିବାକୁ ନେଇ ସାରାଦେଶରେ ଲକ୍ ଡାଉନ୍ ଜାରି ରହିଛି। ଯେମିତି ରାଜ୍ୟ ଓ ରାଜ୍ୟ ବାହାରୁ ସନ୍ଦିଗ୍ଧମାନେ ଜିଲାରେ ଅବାଧ ଭାବେ ପ୍ରବେଶ ନ କରିବେ ସେ ନେଇ ଜିଲା ପ୍ରଶାସନ ତରଫରୁ ପଡୋଶୀ ଛତିଶଗଡ ରାଜ୍ୟ ଓ ପଡୋଶୀ ଜିଲା ସୁନ୍ଦରଗଡ ଏବଂ ସମ୍ବଲପୁର ଜିଲା ସୀମାକୁ ପୂର୍ବରୁ ସିଲ୍ କରାଯାଇଛି। ଏହିସବୁ ରାସ୍ତାରେ ପୋଲିସ୍ ପହରା ଜାରି ରହିଛି। ହେଲେ ଏଭଳି କଡାକଡି ପହରା ସତ୍ତ୍ୱେ ମଧ୍ୟ ଜଙ୍ଗଲ ରାସ୍ତାରେ ଆସି ଲୋକେ ଜିଲାରେ ପ୍ରବେଶ କରୁଛନ୍ତି। ଏହାକୁ ଦୃଷ୍ଟିରେ ରଖି ଜିଲାପାଳ ସରୋଜ କୁମାର ସାମଲ ସୀମାବର୍ତ୍ତୀ ଜଙ୍ଗଲ ରାସ୍ତାକୁ ସିଲ୍ କରିବା ପାଇଁ ଡିଏଫ୍ଓ ଲଳିତ ପାତ୍ରଙ୍କୁ ନିର୍ଦ୍ଦେଶ ଦେଇଛନ୍ତି। ଏହି ନିର୍ଦ୍ଦେଶ ବଳରେ ବେଲପାହାଡ ରେଞ୍ଜର ସୁବାସ ମହାପାତ୍ରଙ୍କ ତତ୍ୱାବଧାନରେ ମଙ୍ଗଳବାରଠାରୁ ଝାରସୁଗୁଡା ଓ ସୁନ୍ଦରଗଡ ଜିଲାକୁ ସଂଯୋଗ କରୁଥିବା ଲଖନପୁର ବ୍ଲକ୍ କୋଇଲି ଘୋଘର ଫରେଷ୍ଟ ରୋଡ୍ ଓ ସୁନ୍ଦରଗଡ ଜିଲା ବେତଝରଣ ହିମଗିରି ଫରେଷ୍ଟ ରୋଡ୍କୁ କାଠ, ବାଉଁଶ ବାଡ ଦେଇ ସିଲ୍ କରାଯାଇଛି। ଏହିସବୁ ରାସ୍ତାରେ ଜଙ୍ଗଲ ସୁରକ୍ଷା କର୍ମୀଚାରୀମାନେ ଜଗି ରହିଛନ୍ତି। ସମ୍ବଲପୁରରୁ ଝାରସୁଗୁଡା ଜିଲାକୁ ସଂଯୋଗ କରୁଥିବା ରମ୍ପେଲା ସେତୁ ଦେଇ ସନ୍ଦିଗ୍ଧମାନେ ଅବାଧରେ ଯାତାୟତ କରୁଛନ୍ତି। ଏହାକୁ ରୋକିବାରେ ଉଭୟ ଜିଲା ପ୍ରଶାସନ ଓ ପୋଲିସ୍ ପ୍ରଶାସନ ଢିଲା ଦେଉଥିବା ଅଭିଯୋଗ ହେଉଛି। ଫଳରେ କରୋନା ସଂକ୍ରମଣ ନିୟନ୍ତ୍ରଣ କ୍ଷେତ୍ରରେ ପ୍ରଶ୍ନବାଚୀ ସୃଷ୍ଟି ହୋଇଛି।