କଟକ ଅଫିସ,୨୦।୫: ଓଡ଼ିଶା ଦେଇ ରାଜପଥଗୁଡ଼ିକରେ ଚାଲିଚାଲି ନିଜ ରାଜ୍ୟକୁ ଫେରୁଥିବା ଶ୍ରମିକଙ୍କୁ ସହାୟତାର ହାତ ବଢ଼ାଇଛି ରାଜ୍ୟ ପୋଲିସ। ଗୋଟିଏ ପଟ ସୀମାରୁ ନେଇ ସେମାନଙ୍କୁ ରାଜ୍ୟ ସୀମାରେ ଛାଡୁଛି। ସୋମବାର ଅପରାହ୍ନ ୫ଟା ସୁଦ୍ଧା ଓଡ଼ିଶା ପୋଲିସ ବସ୍ ଦ୍ୱାରା ୨୨୨ ଥର ଯାତ୍ରାର ଆୟୋଜନ କରି ଅନ୍ୟ ରାଜ୍ୟର ୮ ହଜାରରୁ ଊର୍ଦ୍ଧ୍ୱ ପ୍ରବାସୀ ଶ୍ରମିକଙ୍କୁ ସେମାନଙ୍କ ଗନ୍ତବ୍ୟ ରାଜ୍ୟର ସୀମା ନିକଟରେ ପହଞ୍ଚାଇଛି। ସମସ୍ତ ପ୍ରବାସୀ ଶ୍ରମିକଙ୍କୁ ମଧ୍ୟ ମାଗଣା ରନ୍ଧାଖାଦ୍ୟ ଯୋଗାଇ ଦିଆଯାଉଛି। ଭଦ୍ରକ ପୋଲିସ ଦୈନିକ ୪ ହଜାରରୁ ଊର୍ଦ୍ଧ୍ୱ ଶ୍ରମିକଙ୍କୁ ଖାଦ୍ୟ ପ୍ରଦାନ କରୁଛି।
ରାଜ୍ୟ ପୋଲିସ ମୁଖ୍ୟାଳୟ ଜାରି କରିଥିବା ପ୍ରେସ୍ ବିଜ୍ଞପ୍ତିରେ କହିଛି ଯେ, ପ୍ରବାସୀ ଶ୍ରମିକ ଓ ସେମାନଙ୍କ ପରିବହନ କାର୍ଯ୍ୟକ୍ରମକୁ ୪ ପ୍ରକାରରେ ବିଭକ୍ତ କରାଯାଇପାରେ। ଓଡ଼ିଶାକୁ ଆସୁଥିବା ବାହାର ରାଜ୍ୟର ପ୍ରବାସୀ ଶ୍ରମିକ, ଓଡ଼ିଶାରେ କାର୍ଯ୍ୟରତ ଅନ୍ୟ ରାଜ୍ୟର ପ୍ରବାସୀ ଶ୍ରମିକ, ଅନ୍ୟ ରାଜ୍ୟର ପ୍ରବାସୀ ଶ୍ରମିକ ଯେଉଁମାନେ ଗାଡ଼ି ମାଧ୍ୟମରେ ସେମାନଙ୍କ ନିଜ ରାଜ୍ୟରେ ପହଞ୍ଚତ୍ବାକୁ ଓଡ଼ିଶା ଦେଇ ଯାତ୍ରା କରୁଛନ୍ତି ଏବଂ ଯେଉଁମାନେ ନିଜ ରାଜ୍ୟରେ ପହଞ୍ଚତ୍ବାକୁ ଚାଲିଚାଲି କିମ୍ବା ସାଇକେଲରେ ଯାଉଛନ୍ତି। ପ୍ରଥମ ଦୁଇ ଶ୍ରେଣୀର ପ୍ରବାସୀ ଶ୍ରମିକଙ୍କ ପାଇଁ ଓଡ଼ିଶା ସରକାରଙ୍କ ଦ୍ୱାରା ଏକ ନିର୍ଦ୍ଦିଷ୍ଟ ନିୟମ ପ୍ରଣୟନ କରାଯାଇଛି। ଜିଲା ପ୍ରଶାସନ ସମେତ ଅନ୍ୟ ସରକାରୀ ସଂସ୍ଥା ସହଯୋଗରେ ଏହାକୁ କାର୍ଯ୍ୟକାରୀ କରାଯାଉଛି। ତୃତୀୟ ଶ୍ରେଣୀର ପ୍ରବାସୀ ଶ୍ରମିକଙ୍କ ପାଇଁ ରାଜ୍ୟ ସୀମା ତନଖି ଫାଟକ ନିକଟରେ ଆବଶ୍ୟକ ଯାଞ୍ଚ କରାଯାଇ ସେମାନଙ୍କ ଗାଡ଼ିକୁ ଓଡ଼ିଶା ମଧ୍ୟଦେଇ ଯିବାକୁ ଅନୁମତି ଦିଆଯାଉଛି। ଚତୁର୍ଥ ଶ୍ରେଣୀଭୁକ୍ତ ପ୍ରବାସୀ ଶ୍ରମିକ, ଯେଉଁମାନେ ଚାଲିଚାଲି ସେମାନଙ୍କ ନିଜ ରାଜ୍ୟ ପଶ୍ଚିମବଙ୍ଗ, ଛତିଶଗଡ଼, ଝାଡ଼ଖଣ୍ଡ ଓ ବିହାରକୁ ଯିବା ପାଇଁ ଓଡ଼ିଶାକୁ ପ୍ରବେଶ କରୁଛନ୍ତି, ସେମାନଙ୍କ ଯାତ୍ରା ଏବଂ ଖାଦ୍ୟପେୟର ବିଶେଷ ବ୍ୟବସ୍ଥା କରୁଛି ପୋଲିସ। ଏଥିପାଇଁ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଆବଶ୍ୟକ ଅର୍ଥ ରିଲିଫ ପାଣ୍ଠିରୁ ଓଡ଼ିଶା ପୋଲିସକୁ ଦେଉଛି। ଗତ ୪ଦିନ ଧରି ଓଡ଼ିଶା ପୋଲିସ ରାଜ୍ୟର ପ୍ରମୁଖ ସୀମା ତନଖି ଫାଟକ ଯଥା ସୋହେଲା, ଗିରିସୋଲା ଓ କେରଡ଼ାଠାରେ ବସ୍ ବ୍ୟବସ୍ଥା କରି ପାଦଚଲା ପ୍ରବାସୀ ଶ୍ରମିକଙ୍କୁ ସେମାନଙ୍କ ରାଜ୍ୟର ସୀମା ନିକଟରେ ପହଞ୍ଚାଇବାର ବ୍ୟବସ୍ଥା କରି ଆସୁଛନ୍ତି। ତଥାପି ପୋଲିସ ବସ୍ ବ୍ୟବସ୍ଥା କରିବା ପୂର୍ବରୁ କେତେକ ପ୍ରବାସୀ ଶ୍ରମିକ ପାଦରେ ଚାଲିଚାଲି ତନଖି ଫାଟକ ଅତିକ୍ରମ କରିଥିବା ଜଣାପଡ଼ିଛି। ଏଥିପାଇଁ ରାସ୍ତାକଡ଼ ଥାନାଗୁଡ଼ିକୁ ଏହି ପାଦଚଲା ପ୍ରବାସୀ ଶ୍ରମିକଙ୍କୁ ସହାୟତା କରିବା ପାଇଁ କୁହାଯାଇଛି। ଏହି ଥାନାଗୁଡ଼ିକ ସେମାନଙ୍କ ଜିଲା ନିୟନ୍ତ୍ରଣ କକ୍ଷକୁ ଏ ବାବଦରେ ଅବଗତ କରି ଆବଶ୍ୟକ ସ୍ଥଳେ ଅନ୍ୟ ଜିଲା ଓ ସୀମା ତନଖି ଫାଟକର ସହଯୋଗ ନେଇ କାର୍ଯ୍ୟ କରିବାକୁ କୁହାଯାଇଛି। ପ୍ରବାସୀ ଶ୍ରମିକଙ୍କ ପରିବହନ ପାଇଁ ବ୍ୟବହୃତ ବସ୍ ସଂଖ୍ୟା ଓ ଯାତାୟାତ ମାର୍ଗ ସେମାନଙ୍କ ଚାହିଦା ଅନୁସାରେ ପରିବର୍ତ୍ତନ କରାଯାଉଛି। ରାଜ୍ୟର ମଧ୍ୟବର୍ତ୍ତୀ ସ୍ଥାନ ଯଥା ଖୋର୍ଦ୍ଧା, କଟକ, ଭୁବନେଶ୍ୱର, ଯାଜପୁର ଓ ଭଦ୍ରକ ଆଦି ସ୍ଥାନରେ ଏହି ପ୍ରବାସୀ ଶ୍ରମିକଙ୍କ ପାଇଁ ମଧ୍ୟ ବସ୍ ଯୋଗାଣର ବ୍ୟବସ୍ଥା ହୋଇଛି।