ପାଟଣା, ୩।୫(ସ୍ବ.ପ୍ର.)-କେନ୍ଦୁଝର ଜିଲା ପାଟଣା ଥାନା ଦେଇ ଯାଇଥିବା ୨୨୦ ନମ୍ବର ଜାତୀୟ ରାଜପଥ ଟଭାସରୁଆ ନିକଟ ସୀମାନ୍ତରେ ଶୁକ୍ରବାର ସାରେ ପଶ୍ଚିମବଙ୍ଗର ୯ଜଣ ଶ୍ରମିକ ଆସି ପହଞ୍ଚିଛନ୍ତି। ଏମାନେ ଯାଜପୁର ଜିଲା ଡୁବୁରୀରୁ ସାଇକେଲରେ ଆସିଛନ୍ତି। ଶ୍ରମିକମାନେ ୩୨୦ କି.ମି ଯାତ୍ରା କରିବା ପରେ ନିଜ ଭିଟାମାଟିରେ ପହଞ୍ଚିବାର ଲକ୍ଷ୍ୟ ରଖିଛନ୍ତି।
ଏହି ଶ୍ରମିକମାନେ ଜଣେ ଠିକାଦାରଙ୍କ ଅଧୀନରେ ଡୁବୁରୀସ୍ଥିତ ଏକ ପ୍ଲାଣ୍ଟରେ ୫ମାସ ହେଲା କାମ କରୁଥିଲେ। କରୋନା ଯୋଗୁ ଦେଶବ୍ୟାପୀ ଲକଡାଉନ ଯୋଗୁ ଫ୍ୟାକ୍ଟ୍ରି ବନ୍ଦ ହୋଇଯାଇଥିଲା। ଏହି ଶ୍ରମିକମାନେ ଡୁବୁରୀରେ ୧୪ ଦିନ କ୍ୱାରାଣ୍ଟାଇନରେ ରହିବା ପରେ ଗୁରୁବାର ରାତି ୩ଟାରୁ ସାଇକେଲରେ ବାହାରିଛନ୍ତି। ସମସ୍ତେ ୪ ହଜାର ଟଙ୍କା ଦେଇ ଗୋଟିଏ ଲେଖାଏଁ ସାଇକେଲ କିଣିଛନ୍ତି। ଆସିବା ବେଳେ ବାଟରେ କେବଳ ଶୁଖିଲା ବିସ୍କୁଟ ଖାଇଥିବା କହିଛନ୍ତି। ଲକ୍ଡାଉନ୍ କଟକଣା ପାଇଁ ପାଟଣା ପୋଲିସ ଓ ସାହାରପଡା ପ୍ରଶାସନ ତରଫରୁ କେନ୍ଦୁଝର ଓ ମୟୂରଭଞ୍ଜ ସୀମା ପୋଲିସ ଚେକପୋଷ୍ଟରୁ ଏମାନଙ୍କୁ ଫେରାଇ ଆଣି ସାହାରପଡା ହାଇସ୍କୁଲରେ ରଖିଛନ୍ତି। ସେହିପରି ଛତିଶଗଡ଼ରୁ ୧୨ଜଣ ଶ୍ରମିକ ୨୨୦ ନମ୍ବର ଜାତୀୟ ରାଜପଥରେ ପାଟଣା ଦେଇ ପଶ୍ଚିମବଙ୍ଗ ଯାଉଥିବା ବେଳେ ପାଟଣା ପୋଲିସ ସେମାନଙ୍କୁ ଅଟକାଇ ସାହାରପଡା ହାଇସ୍କୁଲରେ କ୍ୱାରାଣ୍ଟାଇନରେ ରଖିଛି। ଏଣେ ଘରମୁହାଁ ହୋଇଥିବା ଏହି ଶ୍ରମିକମାନେ ନିଜ ଗାଁକୁ ଯିବା ପାଇଁ ନିବେଦନ କରିଛନ୍ତି। ଏହି ଶ୍ରମିକଙ୍କ ଘର ପଶ୍ଚିମବଙ୍ଗ ପୁରୁଲିଆ ଜିଲାର ହୁଡା ଓ ଜୟପୁର ଥାନା ଅଞ୍ଚଳରେ।