ଟୋକିଓ, ୨୩ା୬(ଆଇଏଏନ୍ଏସ୍): ଚାଇନା ଓ ଜାପାନ ମଧ୍ୟରେ ସେନ୍କାକୁସ ଦ୍ୱୀପପୁଞ୍ଜକୁ ନେଇ ବିବାଦ ଦେଖାଦେଇଛି। ଯଦିଓ ଏହି ଅଞ୍ଚଳ ୧୯୭୨ରୁ ଜାପାନ ପ୍ରଶାସନ ଅଧୀନରେ ରହିଆସିଛି, ତେବେ ଏହାର ଆଇନଗତ ସ୍ଥିତି ଚାଇନା ସହ ବିବାଦୀୟ ହୋଇ ରହିଛି। ଚାଇନା ଏହି ବାବାଦୀୟ ଦ୍ୱୀପପୁଞ୍ଜକୁ ଡାଇଓୟୁସ ନାମରେ ନାମିତ କରିଛି। ଏହି ବିବାଦୀୟ ଅଞ୍ଚଳ ଲାଗି ଜାପାନ ଆଇନଗତ ପ୍ରକ୍ରିୟା ଆରମ୍ଭ କରିଛି। ଲଦାଖର ଗଲ୍ଓ୍ବାନ ଉପତ୍ୟକାରେ ସୀମା ବିବାଦକୁ ନେଇ ଭାରତ-ଚାଇନା ସେନା ମଧ୍ୟରେ ରକ୍ତାକ୍ତ ସଂଘର୍ଷ ହେବାର ୭ ଦିନ ପରେ ଏଭଳି ବିବାଦ ସାମ୍ନାକୁ ଆସିଛି। ଟୋକିଓର ଦକ୍ଷିଶ ପଶ୍ଚିମ ୧,୯୩୧ କି.ମି ଦୂରରେ ଏହି ଦ୍ୱୀପପୁଞ୍ଜଗୁଡ଼ିକ ରହିଛି। ଏହାକୁ ଚାଇନା ନିଜର ବୋଲି ଦାବିକରି ଆସୁଛି। ଜାପାନର ଇସିଗାକି ସିଟି କାଉନ୍ସିଲ ଏହି ଏହି ବାବାଦୀୟ ଜାଗାକୁ ମିଶାଇ ଏହାର ନାମ ଟୋନୋସିରୋରୁ ଟୋନୋସିରୋ ସେନ୍କାକୁକୁ ପରିବର୍ତ୍ତନ କରିବା ଲାଗି ବିଲ୍ ପାସ୍ କରିଛି। ଏଭଳି ପଦକ୍ଷେପ ପରେ ଚାଇନା ଟୋକିଓକୁ ଧମକ ଦେବା ଆରମ୍ଭ କରିଛି। ପୂର୍ବ ଚାଇନା ସାଗରରେ ଥିବା ଏହି ବିବାଦୀୟ ଅଞ୍ଚଳର ନାମ ପରିବର୍ତ୍ତନ ନ କରିବା କିମ୍ବା ଏହାର ସ୍ଥିତାବସ୍ଥାରେ କୌଣସି ପରିବର୍ତ୍ତନ ନ ଆଣିବାକୁ ଚାଇନା ପରାମର୍ଶ ଦେଇଛି। ସେପଟେ ଚାଇନାକୁ ଜବାବ ଦେବା ଲାଗି ଜାପାନ ସୀମାରେ ବାଲିଷ୍ଟିକ୍ କ୍ଷେପଣାସ୍ତ୍ର ମୁତୟନ କରିଛି। ତେବେ ପ୍ରଶାସନିକ ଦକ୍ଷତା ବୃଦ୍ଧି ଲାଗି ଏହି ବିଲ୍ ପାସ୍ହେବାର ଆବଶ୍ୟକତା ରହିଥିଲା ବୋଲି ଜାପାନ ଦର୍ଶାଇଛି।
ଗତ ଏପ୍ରିଲରୁ ସେନ୍କାକୁସ୍ରେ ଚାଇନା ଜାହାଜ ଚଳପ୍ରଚଳ କରିଆସୁଛି। ଗତ କିଛି ସପ୍ତାହ ହେବ ଏହି ଜାହାଜ ସଂଖ୍ୟା ବୃଦ୍ଧିପାଇଛି। ଜାପାନ କ୍ୟାବିନେଟ ସଚିବ ସେନ୍କାକୁସ୍ ଜାପାନ ନିୟନ୍ତ୍ରଣରେ ଏହା ଆଇନସମ୍ମତ ଭାବେ ରହିଆସିଛି ବୋଲି କହିଛନ୍ତି। ଏଠାରେ ଚାଇନା ଡେରା ପକାଇବା ଠିକ୍ନୁହେଁ। ଏହାର ଦୃଢ଼ ଜବାବ ଦିଆଯିବ ବୋଲି ସେ ପ୍ରକାଶ କରିଛନ୍ତି। ପ୍ରକାଶଥାଉ କି, କେବଳ ଜାପାନ ନୁହେଁ ତାଇଓ୍ବାନ, ବ୍ରୁନେଇ, ଇଣ୍ଡୋନେସିଆ, ମାଲେସିଆ, ଭିଏତ୍ନାମ, ଫିଲିପାଇନ୍ସ ଆଦି ପଡ଼ୋଶୀ ଦେଶଗୁଡ଼ିକ ସହ ଚାଇନାର ସୀମା ବିବାଦ ରହିଆସିଛି।