ନୂଆଦିଲ୍ଲୀ, ୯ା୬: କମାଣ୍ଡର ସ୍ତରୀୟ ଆଲୋଚନା ପରେ ଭାରତ-ଚାଇନା ସୀମା ଶାନ୍ତ ରହିଛି। ଲଦାଖ ସୀମାରେ ଚାଇନା ଓ ଭାରତୀୟ ସୈନ୍ୟଙ୍କ ମାସେ ହେଲା ଲାଗି ରହିଥିବା ତିକ୍ତତା ସୋମବାର ଶିଥିଳ ପଡ଼ିଛି। ଲଦାଖ ନିକଟରେ ସେନା ଗତିବିଧି ଦେଖିବାକୁ ମିଳିନାହିଁ। ତେବେ ଲଦାଖ ଘଟଣାରେ ସୀମା ଶାନ୍ତ ଥିବାବେଳେ ଦୁଇଦେଶ ଜୋର୍ଦାର ପ୍ରସ୍ତୁତି ଚଳାଇଥିବା ଜଣାପଡ଼ିଛି। ସୀମାଠାରୁ ୪୮୦ କି.ମି. ଦୂର କଶ୍ଗରଠାରେ ପିଏଲ୍ଏ ପ୍ରସ୍ତୁତି ଚଳାଇଛି। ଲଦାଖ୍ ସୀମାରେ ଚାଇନା ହେଲିକପ୍ଟର ପଇଁତରା ମାରୁଥିବା ଦେଖିବାକୁ ମିଳିଛି। ଭାରତ ମଧ୍ୟ ଭିତ୍ତିଭୂମି ବିକାଶ କରି ତା’ର ସେନା ଓ ଅନ୍ୟାନ୍ୟ ଯୁଦ୍ଧାସ୍ତ୍ର ପ୍ରସ୍ତୁତି ଜାରି ରଖିଥିବା ଜଣେ ବରିଷ୍ଠ ଅଧିକାରୀ ପ୍ରକାଶ କରିଛନ୍ତି। ପାଙ୍ଗୋଙ୍ଗ ହ୍ରଦ ନିକଟ ମୋଲ୍ଡୋ-ଚୁଶୁଲ ସୀମାକୁ ନେଇ ଶନିବାର ହୋଇଥିବା ଆଲୋଚନା ପରେ ଦୁଇପକ୍ଷ ଶାନ୍ତିରକ୍ଷା ସହ ଆଲୋଚନା ମାଧ୍ୟମରେ ସମସ୍ୟାର ସମାଧାନ କରିବାକୁ ଚାହିଁଛନ୍ତି। ଭାରତ ଓ ଚାଇନା ସେନା କମାଣ୍ଡରଙ୍କ ମଧ୍ୟରେ ଦୀର୍ଘ ୭ ଘଣ୍ଟାର ଆଲୋଚନା ପରେ ଏବେ ପ୍ରକୃତ ନିୟନ୍ତ୍ରଣ ରେଖା(ଏଲ୍ଏସି)ରେ ଶାନ୍ତି ବଜାୟ ରହିଛି।
ଶନିବାର ବୈଠକରେ ଲ୍ୟୁଟ୍ନାଣ୍ଟ ଜେନେରାଲ ହରିନ୍ଦର ସିଂ ଓ ଚାଇନାର ପ୍ରତିନିଧି ମଣ୍ଡଳୀ ମୁଖ୍ୟ ଭାବେ ମେଜର ଜେନେରାଲ ଲିଉ ଲିନ୍ ଯୋଗ ଦେଇଥିଲେ। ବ୍ରିଗେଡ୍ ଓ ବାଟାଲିୟନ୍ କମାଣ୍ଡରସ୍ତରରେ ଆଲୋଚନା କରାଯାଇ ସମାଧାନ ବାଟ ବାହାର କରିବା ଲାଗି ସ୍ଥିର କରାଯାଇଥିଲା। ଭାରତ ଓ ଚାଇନା ମଧ୍ୟରେ କେତେକ ଘଟଣାକୁ ନେଇ ଭିନ୍ନତା ରହିଥିବା ବେଳେ ଏହା ବିବାଦ ନୁହେଁ ଚାଇନା ମତ ଦେଇଛି। ମୋଦି- ଜିନ୍ପିଙ୍ଗ ଆଲୋଚନାକୁ ପାଥେୟ କରି ସମସ୍ୟାର ସମାଧାନ କରିବାକୁ ଉଭୟ ପକ୍ଷ ଗୁରୁତ୍ୱ ଦେଇଛନ୍ତି।
