ଛତ୍ରପୁର, ୨୯।୫(ଡି.ଏନ୍.ଏ.)- ଗଞ୍ଜାମ ଜିଲା ଦେଇ ଯାଉଥିବା ପ୍ରବାସୀ ଶ୍ରମିକମାନଙ୍କୁ ନିଜ ଜ଼ିଲା ଓ ଏହି ଜିଲାର ବିଭିନ୍ନ ଅଞ୍ଚଳଞ୍କୁ ସୁଗମ ଯୋଜନାରେ ପ୍ରଶାସନ ପକ୍ଷରୁ ଗାଡ଼ିଯୋଗେ ପଠାଯାଉଛି। ଏଥିସହ ପ୍ରବାସୀ ଶ୍ରମିକମାନଙ୍କୁ ଖାଦ୍ୟ ପ୍ୟାକେଟ ଓ ପାଣି ବଣ୍ଟନ କରାଯାଉଛି। ବିଶେଷକରି ଜାତୀୟ ରାଜପଥରେ ଏହା ତ୍ୱରାନ୍ବିତ ହେଉଛି। ଚାଲିଥିବା ସୁଗମ କାର୍ଯ୍ୟକ୍ରମ ଶୁକ୍ରବାର ୧୫ ଦିନରେ ପହଁଚିଛି। ଏହି କାର୍ଯ୍ୟକ୍ରମରେ ଗତ ୧୫ ଦିନ ମଧ୍ୟରେ ୪,୭୪୮ ଜଣ ପ୍ରବାସୀଙ୍କୁ ଗାଡି ଯୋଗେ ନିଜ ଘରକୁ ପଠାଯାଇଛି। ଏଥିସହ ୧୭ ହଜାର ପ୍ରବାସୀଙ୍କୁ ଖାଦ୍ୟ ପ୍ୟାକେଟ ପ୍ରଦାନ କରାଯାଇଥିବା ସୂଚନା ଦିଆହୋଇଛି।
ଅନ୍ୟ ରାଜ୍ୟରୁ ଓଡିଶାର ଗଞ୍ଜାମ ଓ ଅନ୍ୟ ଜିଲାକୁ କେତେକ ଶ୍ରମିକ ଗାଡି, ଚାଲି ଚାଲି କିମ୍ବା ସାଇକେଲ ଯୋଗେ ଏହି ତନଖି ଫାଟକ ଦେଇ ପ୍ରବେଶ କରୁଛନ୍ତି। ଚାଲିକରି ଆସୁଥିବା ଶ୍ରମିକଙ୍କୁ ନିକଟସ୍ଥ ହଳଦିଆପଦର ବସଷ୍ଟାଣ୍ଡକୁ ନିଆଯାଉଛି। ସେଠାରେ ଖାଦ୍ୟ ପ୍ୟାକେଟ ଓ ପାଣି ଦେବା ପରେ ଶ୍ରମିକଙ୍କୁ ଗଞ୍ଜାମର ନିଜ ବ୍ଲକ ଓ ନିଜ ଜ଼ିଲାମାନଙ୍କୁ ଗାଡି ଯୋଗେ ପଠାଯାଉଛି । ଏସମ୍ପର୍କରେ ଗଞ୍ଜାମ ଡିଆରଡିଏ କାର୍ଯ୍ୟାଳୟ ପକ୍ଷରୁ ଟୁଇଟ କରି ସୂଚନା ଦିଆଯାଇଛି। ଚଳିତ ମାସ ୨ ତାରିଖରୁ ଏହି ପଞ୍ଜିକରଣ କାର୍ଯ୍ୟ ଓ ନିଜ ଅଞ୍ଚଳକୁ ଶ୍ରମିକମାନଙ୍କୁ ପଠାଯିବା ଜାରି ରହିଛି।
