ପୁରୀ ଅଫିସ, ୨୭ା୩: ବିଶ୍ୱରେ ମହାମାରୀ କରୋନା ଏବେ ଆତଙ୍କ ଖେଳାଇଛି। ଏହି ପ୍ରାଣଘାତୀ ଭୂତାଣୁକୁ କିପରି ରୋକାଯାଇପାରିବ ସେ ନେଇ ସବୁସ୍ତରରେ ଚିନ୍ତାପ୍ରକଟ କରାଯାଉଛି। ସଚେତନତା ହିଁ ଏହାର ମୁକାବିଲା ପାଇଁ ଏକମାତ୍ର ମାର୍ଗ ବୋଲି କୁହାଯାଉଛି। ତେଣୁ ଜନସାଧାରଣଙ୍କୁ ସଚେତନ କରିବା ଉଦ୍ଦେଶ୍ୟରେ ଅନ୍ତର୍ଜାତୀୟ ବାଲୁକା ଶିଳ୍ପୀ ପଦ୍ମଶ୍ରୀ ସୁଦର୍ଶନ ପଟ୍ଟନାୟକ କରିଥିବା ବାଲୁକା କଳାକୁ ବିଶ୍ୱ ସ୍ବାସ୍ଥ୍ୟ ସଙ୍ଗଠନ ଓ ଜାତିସଂଘ ପ୍ରଶଂସା କରିଛନ୍ତି। ‘ଘରେ ରୁହନ୍ତୁ, ସୁରକ୍ଷିତ ରୁହନ୍ତୁ’, ଲକ୍ଡାଉନରେ ସରକାରଙ୍କୁ ସହଯୋଗ କରନ୍ତୁ ବାର୍ତ୍ତା ଦେଇ ଗତ ୨୩ ତାରିଖରେ ପୁରୀ ବେଳାଭୂମିରେ ବାଲୁକା କଳା ତିଆରି କରିଥିଲେ। ସୁଦର୍ଶନଙ୍କ ଏହି ବାଲୁକା କଳା ଫଟୋକୁ ରିଟୁଇଟ୍ କରି ଜାତିସଂଘ ଲେଖିଛି, କୋଭିଡ-୧୯ ମହାମାରୀ ମଧ୍ୟରେ ସାରା ଦୁନିଆର ଲୋକ ପରସ୍ପରକୁ ସାହାଯ୍ୟ କରିବା ପାଇଁ ସମର୍ଥନ ଓ ସଂହତି ପ୍ରଦର୍ଶନ କରୁଛନ୍ତି। ସେହିପରି ବିଶ୍ୱ ସ୍ବାସ୍ଥ୍ୟ ସଙ୍ଗଠନର ମହାନିର୍ଦ୍ଦେଶକ ଟେଡ୍ରୋସ ଏଡହୋମ୍ ଘେବ୍ରେୟେସସ୍ ମଧ୍ୟ ସୁଦର୍ଶନଙ୍କ ପଦକ୍ଷେପକୁ ପ୍ରଶଂସା କରିଛନ୍ତି। ସେ ଟୁଇଟ୍ରେ ଲେଖିଛନ୍ତି ଦୁନିଆକୁ ଶକ୍ତିଶାଳୀ ବାର୍ତ୍ତା ପଠାଇବା ପାଇଁ କଳା ଏକ ଶକ୍ତିଶାଳୀ ମାଧ୍ୟମ ଅଟେ। କୋଭିଡ-୧୯ ବିରୋଧରେ ସବୁଠାରୁ ସୁନ୍ଦର ବାର୍ତ୍ତା ହୋଇଥିବାରୁ ସେ ସୁଦର୍ଶନଙ୍କୁ ଧନ୍ୟବାଦ ଦେଇଛନ୍ତି।
