ସୁନ୍ଦରଗଡ଼, ୨୬।୧୦ (ଡି.ଏନ୍.ଏ. )-ଭାରତୀୟ ମହାକାଶ ଗବେଷଣା ପ୍ରତିଷ୍ଠାନ (ଇସ୍ରୋ)ର ଭ୍ରାମ୍ୟମାଣ ପ୍ରଦର୍ଶନ ଯାନ ଶନିବାର ସୁନ୍ଦରଗଡ ଠାରେ ପହଞ୍ଚିଥିଲା। ସୁନ୍ଦରଗଡରେ ଥିବା ବିଭିନ୍ନ ବିଦ୍ୟାଳୟ, ମହାବିଦ୍ୟାଳୟର ପ୍ରାୟ ୨୦୦୦ ଛାତ୍ରୀଛାତ୍ର, ଶିକ୍ଷୟିତ୍ରୀ, ଶିକ୍ଷକ ଓ ଜନସାଧାରଣଙ୍କ ପ୍ରଦର୍ଶନ ପାଇଁ ଏହି ସ୍ବତନ୍ତ୍ର ଯାନ ସ୍ଥାନୀୟ ଭବାନୀ ଶଙ୍କର ସରକାରୀ ଉଚ୍ଚବିଦ୍ୟାଳୟ ଓ ସୁନ୍ଦରଗଡ ସରକାରୀ ମହାବିଦ୍ୟାଳୟଠାରେ ଅଟକିଥିଲା। ଏହି ସ୍ବତନ୍ତ୍ର ଯାନରେ ଭାରତୀୟ ମହାକାଶ ଗବେଷଣା ପ୍ରତିଷ୍ଠାନ ଦ୍ୱାରା ପ୍ରସ୍ତୁତ ହୋଇ ପ୍ରଦର୍ଶିତ ହୋଇଥିବା ରକେଟ ମଡେଲ, ରକେଟ ଉତ୍କ୍ଷେପଣ, ଭାରତୀୟ ଉପଗ୍ରହର ପ୍ରୟୋଗ, ଚନ୍ଦ୍ରଯାନ -୧, ଚନ୍ଦ୍ରଯାନ-୨, ମଙ୍ଗଳ ଅଭିଯାନ ସମ୍ପର୍କରେ ଥିବା ସମସ୍ତ ପ୍ରକଳ୍ପଗୁଡିକ ବିଦ୍ୟାର୍ଥୀମାନେ ପରିଦର୍ଶନ କରି ଧାରଣା ପାଇଥିଲେ। ଯାନ ସହିତ ଆସିଥିବା ଟେକ୍ନିକାଲ ଅଧିକାରୀମାନେ ପିଲାମାନଙ୍କୁ ବୁଝାଉଥିଲେ। ମହାବିଦ୍ୟାଳୟ ସ୍ତରରେ ସ୍ନାତକ ଶ୍ରେଣୀର ପଦାର୍ଥ ବିଜ୍ଞାନ ପଢୁଥିବା ଛାତ୍ରୀଛାତ୍ରମାନେ ବିଶେଷ ଭାବେ ଆଗ୍ରହ ପ୍ରକାଶ କରୁଥିବା ଦେଖିବାକୁ ମିଳିଥିଲା। ସକାଳେ ସ୍ଥାନୀୟ ଭବାନୀ ଶଙ୍କର ସରକାରୀ ଉଚ୍ଚ ବିଦ୍ୟାଳୟ, ମ୍ୟୁନିସିପାଲ ଉଚ୍ଚ ବିଦ୍ୟାଳୟ, ଶିଶୁ ବିଦ୍ୟାମନ୍ଦିର, ସୁନ୍ଦରଗଡ ପବ୍ଲିକ ସ୍କୁଲ ଛାତ୍ରୀଛାତ୍ର ବୁଲି ଦେଖିଥିଲେ। ମଧ୍ୟାହ୍ନରେ ସୁନ୍ଦରଗଡ ସରକାରୀ ମହାବିଦ୍ୟାଳୟର ଶିକ୍ଷାର୍ଥୀମାନେ ଶୃଙ୍ଖଳିତ ଭାବେ ପ୍ରକଳ୍ପଗୁଡିକ ବୁଲି ଦେଖିଥିଲେ। କାର୍ଯ୍ୟକ୍ରମକୁ ମହାବିଦ୍ୟାଳୟର ଅଧ୍ୟକ୍ଷ ଡ. କିଶୋର କୁମାର ଦାଶ ଉଦ୍ଘାଟନ କରିଥିଲେ। ଇସ୍ରୋର ଟେକ୍ନିକାଲ ଅଧିକାରୀ ଇଂ. ଅର୍ଜୁନ ସାହୁ, ମହାବିଦ୍ୟାଳୟର ପ୍ରାଧ୍ୟାପକ ଆର୍ଯ୍ୟ ବିଭାସ କୁମାର, ଜିଲା ବିଜ୍ଞାନ ନିରୀକ୍ଷକ ଗୋପୀନାଥ ନାଏକ, ଭବାନୀଶଙ୍କର ସରକାରୀ ଉଚ୍ଚ ବିଦ୍ୟାଳୟର ଶିକ୍ଷକ ସୁଧାଂଶୁ ଚୌଧୁରୀ ପ୍ରମୁଖ ଉପସ୍ଥିତ ରହି ସହଯୋଗ କରିଥିଲେ। ଶ୍ରୀହରିକୋଟାରୁ ଏହି ସ୍ବତନ୍ତ୍ର ଯାନ ଓଡିଶା ଗସ୍ତରେ ଆସିଛି।