ସୁନ୍ଦରଗଡ଼,୨୯।୧୨(ଡି.ଏନ୍.ଏ.) – ସୁନ୍ଦରଗଡ଼ ଜିଲାରେ ଶୀତର ପ୍ରକୋପ ବୃଦ୍ଧି ପାଇଛି। ରାତିରେ ପାରଦ ଖସୁଥିବା ଯୋଗୁ ଶୀତ ବଢୁଛି। ଶୁକ୍ରବାର ରାତିରେ ଜିଲାର କୋଇଡା, ଟେନସା ଓ ସୁନ୍ଦରଗଡଠାରୁ ୫କି.ମି ଦୂର ସବ୍ଡେଗା ବ୍ଲକର କରମଡିହିଠାରେ ତୁଷାରପାତ ହୋଇଥିବାର ଦେଖିବାକୁ ମିଳିଛି। କରମଡିହିର ସୁମନ୍ତ ପଟେଲଙ୍କ ଧାନଖଳାର ପାଳଗଦା ଉପରେ ଶନିବାର ସକାଳେ ତୁଷାର ପଡିଥିବା ଲୋକେ ଦେଖିଥିଲେ। ଏଥିସହ ଏକ ପାଣିଥିବା କଂସା ପାତ୍ରରେ ଓ ବାଇକ୍ ସିଟ ଉପରେ ତୁଷାର ପଡିଥିଲା। ଶୁକ୍ରବାର ସୁନ୍ଦରଗଡରେ ସର୍ବନିମ୍ନ ତାପମାତ୍ରା ୧୦.୫ଡିଗ୍ରୀ ସେଲସିୟସ ଓ ସର୍ବାଧିକ ୨୫ଡିଗ୍ରୀ ସେଲସିୟସ ଥିବା ବେଳେ ଶନିବାର ସର୍ବନିମ୍ନ ୧୦ଡିଗ୍ରୀ ଓ ସର୍ବାଧିକ ୨୨ଡିଗ୍ରୀ ସେଲସିୟସ ରେକର୍ଡ ହୋଇଥିବା ଜିଲା ପାଣିପାଗ ବିଭାଗ ସୂତ୍ରରୁ ଜଣାଯାଇଛି। ଜିଲାର ଆଭ୍ୟନ୍ତରୀଣ ଅଞ୍ଚଳ ତଥା ନଦୀ ଓ ଜଙ୍ଗଲ ତଟବର୍ତ୍ତୀ ଗ୍ରାମଗୁଡିକରେ ସର୍ବନିମ୍ନ ତାପମାତ୍ରା ଆହୁରି କମ୍ ରହୁଛି। ଫଳରେ ଅଧିକ ଥଣ୍ଡା ଅନୁଭୂତ ହେଉଛି। ଶୀତରୁ ରକ୍ଷା ପାଇବା ପାଇଁ ଗ୍ରାମାଞ୍ଚଳରେ ଲୋକେ ନିଆଁ ଜାଳି ପୋଇଁ ହେଉଥିବା ଦେଖିବାକୁ ମିଳିଛି। ବଜାରରେ ଶୀତ ପୋଷାକର ଚାହିଦା ମଧ୍ୟ ବୃଦ୍ଧି ପାଇଛି। ଅପରପକ୍ଷେ ଅସହାୟ, ଗରିବ, ବୃଦ୍ଧାବୃଦ୍ଧ ହାଡଭଙ୍ଗା ଶୀତ ଯୋଗୁ ଅକଥନୀୟ କଷ୍ଟ ଭୋଗୁଛନ୍ତି।