ହାମିଲଟନ, ୨୯।୧(ପି.ଟି.): ହିଟ୍ମ୍ୟାନ ରୋହିତ ଶର୍ମାଙ୍କ ସୁପର ଶୋ ବଳରେ ଭାରତ ଏହାର ସର୍ବପ୍ରଥମ ଟି୨୦ ସୁପର ଓଭର ମ୍ୟାଚରେ ଚମକପ୍ରଦ ବିଜୟ ହାସଲ କରିଛି। ବିଭିନ୍ନ ସମୟରେ ମୋଡ଼ ବଦଳାଇଥିବା ମ୍ୟାଚ ଟାଇରେ ଶେଷ ହେବା ଏବଂ ସୁପର ଓଭରରେ ମୀମାଂସା ହେବା ଥିଲା ଭାରତୀୟ କ୍ରିକେଟ ପ୍ରେମୀଙ୍କ ପାଇଁ ସମ୍ପୂର୍ଣ୍ଣ ଅଭୁଲା। ହାମିଲଟନର ଶେଡନ ପାର୍କ ଏହି ସଂଘର୍ଷପୂର୍ଣ୍ଣ ଏବଂ ରୋମାଞ୍ଚକ ମ୍ୟାଚର ମୁକସାକ୍ଷୀ ରହିଥିବାବେଳେ ବୁଧବାର ତୃତୀୟ ଟି୨୦ ମ୍ୟାଚରେ ନ୍ୟୁଜିଲାଣ୍ଡକୁ ହରାଇ ସିରିଜ ଜିତିଛି ଟିମ୍ ଇଣ୍ଡିଆ। ପ୍ରଥମେ ବ୍ୟାଟିଂ କରିଥିବା ଭାରତ ରୋହିତଙ୍କ ଅର୍ଦ୍ଧଶତକ ସହାୟତାରେ ୨୦ ଓଭରରେ ୫ ଉଇକେଟ ହରାଇ ୧୭୯ ରନ କରିଥିଲା। ୪୦ ବଲ୍ରୁ ୬ ଚୌକା ଓ ୩ ଛକା ସହାୟତାରେ ୬୫ ରନ କରି ଭାରତୀୟ ଇନିଂସର ଟପ୍ ସ୍କୋରର ରହିଥିଲେ ରୋହିତ। ଜବାବରେ ଅଧିନାୟକ କେନ୍ ଓ୍ବିଲିୟମସନଙ୍କ ଲଢ଼ୁଆ ଇନିଂସ ବଳରେ ନ୍ୟୁଜିଲାଣ୍ଡ ମ୍ୟାଚକୁ ଏକଦା ନିଜ ନିୟନ୍ତ୍ରଣକୁ ଆଣିଥିଲେ ହେଁ ଶେଷ ଓଭରରେ ମହମ୍ମଦ ସାମିଙ୍କ ଚତୁର ବୋଲିଂ ଯୋଗୁ ୯ ରନ କରି ପାରି ନ ଥିଲା। ୮ ରନ ସଂଗୃହୀତ ହେବାରୁ ମ୍ୟାଚକୁ ଟାଇରେ ଶେଷ କରିବାକୁ ବାଧ୍ୟ ହୋଇଥିଲା ନ୍ୟୁଜିଲାଣ୍ଡ। ଏହାପରେ ଆସିଥିଲା ରୋମାଞ୍ଚକ ସୁପରଓଭର। ଯଶପ୍ରୀତ୍ ବୁମ୍ରାଙ୍କ ଓଭରରେ ୧୭ ରନ ସଂଗ୍ରହ କରି କଡ଼ା ଚ୍ୟାଲେଞ୍ଜ ଦେଇଥିଲା ନ୍ୟୁଜିଲାଣ୍ଡ। ଜବାବରେ ଭାରତ ଟିମ୍ ସୌଦୀଙ୍କ ସୁପର ଓଭରର ପ୍ରଥମ ୪ ବଲ୍ରୁ ମାତ୍ର ୮ ରନ କରିବା ଯୋଗୁ ଶେଷ ୨ ବଲ୍ରୁ ବିଜୟ ପାଇଁ ୧୦ ରନ ଆବଶ୍ୟକ ହେଉଥିଲା। ୨ଟି ଯାକ ବଲ୍ରେ ବଡ ଶଟ୍ ଆବଶ୍ୟକ ଥିବାରୁ ଆଶଙ୍କାରେ ରହିଥିଲେ ଭାରତୀୟ କ୍ରିକେଟପ୍ରେମୀ। ମାତ୍ର କ୍ରିଜ୍ରେ ରୋହିତ ଥିବାରୁ ଆଶା ମଧ୍ୟ ରହିଥିଲା। କୋଟିକୋଟି ପ୍ରଶଂସକଙ୍କୁ ନିରାଶ କରି ନ ଥିଲେ ରୋହିତ। ୫ମ ବଲକୁ ସୌଦୀଙ୍କ ୟର୍କର ମାରିବା ଉଦ୍ୟମ ବିଫଳ ହୋଇଥିଲା। ସତେ ଯେପରି ଏହାକୁ ଉତ୍କଣ୍ଠାର ସହ ଅପେକ୍ଷା କରିଥିଲେ ରୋହିତ । ସେ ଏହି ବଲ୍କୁ ଡିପ୍ ସ୍କୋୟାରଲେଗ୍ ଉପରେ ନଭଶ୍ଚୁମ୍ବି ଛକା ମାରି ମ୍ୟାଚରେ ରୋମାଞ୍ଚ ଭରି ଦେଇଥିଲେ। ୬ଷ୍ଠ ବଲ୍ ପକାଇବା ପୂର୍ବରୁ ଚାପକୁ ଆସି ଯାଇଥିଲେ ସୌଦୀ। ଅନ୍ୟପକ୍ଷରେ ରୋହିତ ଥିଲେ ପ୍ରସ୍ତୁତ। ଏଥର ମଧ୍ୟ ସୌଦୀଙ୍କ ୟର୍କର କାମ ଦେଇ ନ ଥିଲା ଏବଂ ବଲ୍କୁ ଲଙ୍ଗଅଫ୍ ଉପରେ ଛକାରେ ପରିଣତ କରି ଭାରତ ପାଇଁ ଇତିହାସ ରଚିଥିଲେ ରୋହିତ। କୌଣସି ଟି୨୦ ମ୍ୟାଚରେ ଭାରତ ପାଇଁ ଏହାଥିଲା ପ୍ରଥମ ସୁପର ଓଭର। ଏହା ପୂର୍ବରୁ ନ୍ୟୁଜିଲାଣ୍ଡ ମାଟିରେ ଟି୨୦ ସିରିଜ ଜିତି ନ ଥିଲା ଭାରତ। ତେଣୁ ରୋହିତଙ୍କ ଏହି ଗୋଟିଏ ଶଟ୍ ଭାରତ ପାଇଁ ୨ଟି ମାଇଲଖୁଣ୍ଟ ପ୍ରତିଷ୍ଠା କରିଥିଲା। ଭାରତ ଟି୨୦ରେ ଏହାର ପ୍ରଥମ ସୁପର ଓଭର ମ୍ୟାଚ ଜିତିଥିବାବେଳେ ନ୍ୟୁଜିଲାଣ୍ଡ ମାଟିରେ ସର୍ବପ୍ରଥମ ଟି୨୦ ସିରିଜ ବିଜୟୀ ହୋଇଥିଲା।