ଟୋକିଓ,୨୪।୧୧(ପିଟି)- ଭାରତର ପ୍ରଥମ ଫର୍ମୁଲା ଓ୍ବାନ ଡ୍ରାଇଭର ନାରାୟଣ କାର୍ତ୍ତିକେୟାନ ଏଠାରେ ଅନୁଷ୍ଠିତ ସୁପର ଜିଟି x ଡିଟିଏମ୍ ଡ୍ରିମ ରେସରେ ବିଜୟୀ ହୋଇଛନ୍ତି। ଫଳରେ କାର୍ତ୍ତିକେୟାନ ଫର୍ମୁଲା ଓ୍ବାନ ଟାଇଟଲ ସହ ଚଳିତ ସିଜନ ଶେଷ କରିଛନ୍ତି। ଅତ୍ୟଧିକ ଚ୍ୟାଲେଞ୍ଜିଂ ରେସ୍ରେ ୨୦ ରେସରଙ୍କୁ ପଛରେ ପକାଇ ଜାପାନିଜ ଦର୍ଶକରେ ଭରପୂର ଫୁଜି ସ୍ପିଡଓ୍ବେଠାରେ ସ୍ମରଣୀୟ ବିଜୟ ପାଇଛନ୍ତି। ନାକାଜିମା ରେସିଂ ହୋଣ୍ଡା ଏନ୍ଏସ୍ଏକ୍ସ-ଜିଟି କାର ଚଲାଉଥିବା ଦ୍ୱିତୀୟ ଲାପରେ ଲୋଇକ ଡୁଭାଲଙ୍କୁ ଓଭର ଟେକ କରିବା ପରେ ବଡ଼ ଅଗ୍ରଣୀ ହାସଲ କରିଥିଲେ। ସେଠାରୁ ସେ ସମ୍ପୂର୍ଣ୍ଣ ନିୟନ୍ତ୍ରଣରେ ରହି ୧୬ ଲାପ ଶେଷ କରିଥିଲେ। ଏହାପରେ ୪୨ ବର୍ଷୀୟ ରେସର ଧାର୍ଯ୍ୟ ୩ ଥର ସେଫ୍ଟି ବ୍ରେକ ନେବା ପରେ ଅତ୍ୟଧିକ ଥଣ୍ଡା ପରିବେଶରେ ସଫଳତାର ସହ କାର ରିଷ୍ଟାର୍ଟ କରି ଆଗରେ ହିଁ ରହିଥିଲେ। ରେସ୍ରେ ଏକଦା କାର୍ତ୍ତିକେୟାନଙ୍କୁ ପଛରେ ପକାଇ ଦେଇଥିଲେ ବେନୋଟ ଟ୍ରେଲୁର। କିନ୍ତୁ କିଛି ସମୟରେ ନିଜ ସ୍ଥାନ ହାତେଇ ନେଇଥିଲେ। ରେସ୍ରେ ମାର୍କୋ ଓ୍ବିଟ୍ଟମ୍ୟାନ ଓ ଡୁଭାଲ ଯଥାକ୍ରମେ ଦ୍ୱିତୀୟ ଓ ତୃତୀୟ ସ୍ଥାନର ରହିଥିଲେ। ଅନ୍ତିମଥର କାର୍ତ୍ତିକେୟାନ ୨୦୧୩ରେ ବ୍ରୁନୋ ଅଟୋ ଜିପି ଜିତିଥିଲେ। ଚଳିତବର୍ଷ ଜାପାନରେ ଅନୁଷ୍ଠିତ ଅଟୋବାକ୍ସ ସୁପର ଜିଟି ସିରିଜ୍ ଓ ସୁଗୋ ସର୍କିଟରେ ସେ ପୋଡିୟମରେ ସ୍ଥାନ ଅଧିକାର କରିଥିଲେ।