ବ୍ରହ୍ମପୁର ଅଫିସ,୨୩ା୫: ସୁରଟରୁ ଶ୍ରମିକମାନଙ୍କୁ ନେଇ ବାହାରିଥିବା ୩ଟି ସ୍ବତନ୍ତ୍ର ଟ୍ରେନ ଶନିବାର ବିଳମ୍ବିତ ରାତିରେ ବ୍ରହ୍ମପୁର ଷ୍ଟେଶନରେ ପହଞ୍ଚିବ। ବିଭିନ୍ନ ଜିଲାର ଶ୍ରମିକମାନେ ଉକ୍ତ ଟ୍ରେନରେ ଆସିବେ ବୋଲି ଜଣାପଡ଼ିଛି। ବହ୍ମପୁର ରେଳଷ୍ଟେଶନର ୪ ନମ୍ବର ପ୍ଲାଟଫର୍ମରେ ଏହିସବୁ ଟ୍ରେନ୍ ଲାଗିବ ବୋଲି ବ୍ରହ୍ମପୁର ଷ୍ଟେଶନ ମ୍ୟାନେଜର ଦୁର୍ଗାପ୍ରସାଦ ବ୍ରହ୍ମା ସୂଚନା ଦେଇଛନ୍ତି। ବ୍ରହ୍ମପୁରକୁ ସୁରଟରୁ ମୋଟ୍ ୬ଟି ଟ୍ରେନ୍ ଆସିବ। ସେଥିମଧ୍ୟରୁ କୋଏମ୍ବାଟୁର୍ରୁ ଗୋଟିଏ ଟ୍ରେନ୍ ଆସିବ। କୋଏମ୍ବାଟୁର୍ରୁ ଆସୁଥିବା ଟ୍ରେନରେ ଅଧା ଯାତ୍ରୀ ବ୍ରହ୍ମପୁର ରେଳଷ୍ଟେଶନରେ ଓହ୍ଲାଇବେ। ଅନ୍ୟ ଯାତ୍ରୀମାନଙ୍କୁ ନେଇ ଟ୍ରେନ୍ଟି ଯାଜପୁର ଯିବ ବୋଲି ସେ କହିଛନ୍ତି। ସେପଟେ ସୁରଟରୁ ବାହାରିଥିବା ଟ୍ରେନ୍ଗୁଡିକ ନିର୍ଦ୍ଧାରିତ ସମୟର ୬ ଘଣ୍ଟା ବିଳମ୍ବରେ ଛାଡ଼ିଥିବା ମଧ୍ୟ ସେ କହିଛନ୍ତି । ଯାହାଫଳରେ ବ୍ରହ୍ମପୁର ଷ୍ଟେଶନରେ ଶନିବାର ରାତି ୧୧ଟାରେ ପହଞ୍ଚିବା ନେଇ ପୂର୍ବରୁ ଆଶା କରାଯାଉଥିବା ବେଳେ ଟ୍ରେନ୍ଗୁଡିକ ଏବେ ରବିବାର ଭୋର୍ରେ ପହଞ୍ଚିବ ବୋଲି ଆଶା କରାଯାଉଛି। ସୁରଟରୁ ଆସୁଥିବା ଆଉ ୩ଟି ଟ୍ରେନ ପ୍ରତ୍ୟେକ ୨ ଘଣ୍ଟା ବ୍ୟବଧାନରେ ବ୍ରହ୍ମପୁର ଷ୍ଟେଶନରେ ପହଞ୍ଚିବ ବୋଲି ମଧ୍ୟ ସେ କହିଛନ୍ତି।