ଖୋର୍ଦ୍ଧା ଅଫିସ,୧୩।୫: କରୋନା ଭୁତାଣୁ ସଂକ୍ରମଣ ମୁକାବିଲା ଲାଗି ଦେଶରେ ଲକ୍ଡାଉନ୍ ଜାରି ରହିଛି । ରାଜ୍ୟ ସରକାରଙ୍କ ଘୋଷଣା ପରେ ବାହାର ରାଜ୍ୟରୁ ପ୍ରବାସୀ ଗା ମୁହଁା ହେବାରେ ଲାଗିଛନ୍ତି। ବୁଧବାର ସାଇକେଲରେ ୧୬୦୦ କିଲୋମିଟର ଯାତ୍ରା କରିଛନ୍ତି ୫ ଜଣ ପ୍ରବାସୀ ଓଡିଆ। ସେମାନେ ସୁରଟର ଭେଣ୍ଡାନ ସହରରୁ ସାଇକେଲରେ ବାହାରି ବୁଧବାର ବେଗୁନିଆ ବ୍ଳକ ଦେଉଳି ପଞ୍ଚାୟତରେ ପହଞ୍ଚିଛନ୍ତି। ପ୍ରବାସୀ ଓଡିଆ ମାନେ ଖୋର୍ଦ୍ଧା ଜିଲା ବେଗୁନିଆ ଓ ପୁରୀ ଜିଲା କଣାସ ଅଞ୍ଚଳର ବୋଲି ଜଣାପଡିଛି । ସେମାନେ ସୁରଟର ଭେଣ୍ଡାନ ସହରରେ ଏକ ସୁତା ମିଲରେ ରହି କାମ କରୁଥିଲେ । ଲକଡାଉନ ପାଇଁ ସୂତା ମିଲ ବନ୍ଦ ରହିଛି । ଫଳରେ ସୁରଟରେ ରହିଯାଇଥିଲେ। ପାଖରେ ଥିବା ଟଙ୍କାରେ କିଛି ଦିନ ଚଳି ଯାଇଥିଲେ ୟ। ମିଲ ବନ୍ଦ ଯୋଗୁ ମାଲିକ ଦରମା ପ୍ରଦାନ ଲାଗି ମନା କରିଥିଲେ। ପାଖରେ ଥିବା ଟଙ୍କା ସରି ଆସିଥିଲା। ସେମାନଙ୍କ ପାଖ ଘରେ କରୋନା ଆକ୍ରାନ୍ତ ବାହାରିଲା ପରେ ସେମାନେ ଭୟଭିତ ହୋଇଘରକୁ ଫେରିବାକୁ ନିଷ୍ପତ୍ତି ନେଇଥିଲେ। ବସ କି ଟ୍ରେନରେ ଆସିଲେ ସଂକ୍ରମଣର ଆଶଙ୍କା ଥିବାରୁ ନିଜ ସାଇକେଲରେ ସୁଦୂର ସୁରତରୁ ନିଜ ଗାଁ ଅଭିମୁଖେ ବାହାରିଥିଲେ। ୧୦ ଦିନ ସାଇକେଲରେ ଯାତ୍ରା କରି ବେଗୁନିଆ ପହଞ୍ଚିବା ପରେ କିଛି ସାମାଜିକ କର୍ମୀ ସେମାନଙ୍କ ଖାଇବା ପିଇବା ବ୍ୟବସ୍ଥା କରିଥିଲେ । ପରେ ସେମାନଙ୍କୁ ସରକାରୀ କାରାଣ୍ଟାଇନ୍ରେ ରଖାଯାଇଥିବା ସୂଚନା ମିଳିଛି।