ସୁରଟ ଅଗ୍ନିକାଣ୍ଡ ପରେ ଅଗ୍ନିଶମ ବିଭାଗ ତତ୍ପର: ୨୩ କୋଚିଂ ସେଣ୍ଟରରେ ଯାଞ୍ଚ
21 ଭୁବନେଶ୍ୱର, ୨୮।୫(ବ୍ୟୁରୋ)- ନିକଟରେ ଗୁଜରାଟର ସୁରଟରେ ଘଟିଥିବା ଏକ କୋଚିଂ ସେଣ୍ଟର ଅଗ୍ନିକାଣ୍ଡରେ ୨୩ଜଣ ଛାତ୍ରୀଛାତ୍ରଙ୍କ ମୃତ୍ୟୁ ଘଟିଥିବାବେଳେ ମୃତ୍ୟୁ ସଂଖ୍ୟା ବଢ଼ି ଚାଲିଛି। ଏହି ଘଟଣା ପରେ ଓଡିଶା ଅଗ୍ନିଶମ ବିଭାଗ ତତ୍ପରତା ଦେଖାଇଛି। ଅଗ୍ନିଶମ ଡିଜି ବି.କେ ଶର୍ମାଙ୍କ ନିର୍ଦ୍ଦେଶକ୍ରମେ ପ୍ରାଥମିକ ପର୍ଯ୍ୟାୟରେ ଟ୍ବିନ୍ସିଟି କଟକ ଓ ଭୁବନେଶ୍ୱରରେ ଏକାଧିକ କୋଚିଂ ସେଣ୍ଟରରେ ସୋମବାରଠାରୁ ଚଢ଼ାଉ ଆରମ୍ଭ ହୋଇଛି। ଏହି ଚଢାଉରେ ୨୨ଟି ଟିମ୍ ସାମିଲ ରହିଥିବାବେଳେ ପ୍ରତି ଟିମ୍ରେ ୫ଜଣ କର୍ମଚାରୀ ରହିଛନ୍ତି। ପ୍ରତି ଟିମ୍ ଦାୟିତ୍ୱ ଜଣେ ବରିଷ୍ଠ ଅଧିକାରୀଙ୍କ ଉପରେ ନ୍ୟସ୍ତ କରାଯାଇଛି। ସୋମବାର ଭୁବନେଶ୍ୱରରେ ୧୫ ଓ କଟକରେ ୮ କୋଚିଂ ସେଣ୍ଟରରେ ଅଗ୍ନି ନିରାପତ୍ତା ବ୍ୟବସ୍ଥା ଯାଞ୍ଚ କରାଯାଇଛି। ଏଥିସହ ଜରୁରିକାଳୀନ ପରିସ୍ଥିତିରେ କିଭଳି ନିଜକୁ ବଞ୍ଚାଇ ପାରିବ ସେନେଇ ସଚେତନ କରାଇଛନ୍ତି। ସେହିଭଳି କୋଚିଂ ସେଣ୍ଟରର ମାଲିକମାନଙ୍କୁ ଆବଶ୍ୟକ ଅଗ୍ନି ନିରାପତ୍ତା ଯନ୍ତ୍ର ମହଜୁଦ ରଖିବା ଓ ତାହାର ପରିଚାଳନା ତଥା ବ୍ୟବହାର ଉପରେ ସଚେତନ କରାଯାଇଛି। ନିଅଁା ଲାଗିଲେ ଛାତ୍ରୀଛାତ୍ରମାନେ କିପରି ନିଅଁା ଓ ଧୂଅଁା ଦାଉରୁ ନିଜକୁ ରକ୍ଷା କରିପାରିବେ ସେ ସମ୍ପର୍କରେ ନାନା ପରାମର୍ଶ ଦେଇଛନ୍ତି। ତେବେ ଯାଞ୍ଚ ସମୟରେ ବହୁ କୋଚିଂ ସେଣ୍ଟରରେ ଅଗ୍ନି ନିରାପତ୍ତା ବ୍ୟବସ୍ଥା ନ ଥିବା ଦେଖିବାକୁ ମିଳିଛି। କେତେକ ସ୍ଥାନରେ ଅଗ୍ନି ନିରାପତ୍ତା ଯନ୍ତ୍ରପାତି ଥିଲେ ମଧ୍ୟ ତାହା ଠିକ୍ଭାବେ କାର୍ଯ୍ୟକ୍ଷମ ନ ଥିଲା। ଆଉ କେତେକ ସ୍ଥାନରେ ଫାୟାର ଏଷ୍ଟିଂଗୁଇସର ବ୍ୟବହାର ଅନେକଙ୍କୁ ଜଣା ନ ଥିଲା। ବହୁ ସ୍ଥାନରେ ଘର, ଶିଡି ଓ ଅଗଣାଗୁଡିକରେ ଦହନୀୟ ପଦାର୍ଥ ଟାୟାର, କାର୍ଟୁନ, କାଠ, କାଗଜ, କପଡା ଆଦି ଅନାବଶ୍ୟକ ସାମଗ୍ରୀ ରଖାଯାଇଥିବା ଦେଖିବାକୁ ମିଳିଥିଲା। ଆଉ କେତେକ ସ୍ଥାନରେ ପିଲାଙ୍କ ପାଇଁ ସତର୍କ ସୂଚନା ଫଳକ ନ ଥିଲା। ତେଣୁ ତୁରନ୍ତ ନିୟମ ପାଳନ କରି ଅଗ୍ନି ନିରାପତ୍ତା ବ୍ୟବସ୍ଥା କରିବା ସହ ଅନାବଶ୍ୟକ ଦହନୀୟ ସାମଗ୍ରୀ ହଟାଇବାକୁ କୋଚିଂ ସେଣ୍ଟର ମାଲିକ ଓ ପରିଚାଳକଙ୍କୁ ତାଗିଦ କରାଯାଇଥିଲା। ଯେଉଁ କୋଚିଂ ସେଣ୍ଟରରେ ଅଗ୍ନି ନିରାପତ୍ତା ବ୍ୟବସ୍ଥା ନାହିଁ ସେସବୁ ସଂସ୍ଥାକୁ ୧୫ ଦିନିଆ ନୋଟିସ କରାଯାଇଛି। ଏହାପରେ ପୁଣି ଯାଞ୍ଚ କରାଯିବ। ଯଦି ନିର୍ଦ୍ଦେଶକୁ ଉଲ୍ଲଂଘନ କରାଯାଇଥିବ ତେବେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଅଗ୍ନିଶମ ଡିଜି ବି.କେ. ଶର୍ମା କହିଛନ୍ତି। ତାଙ୍କ ସୂଚନାନୁସାରେ, ଆଗାମୀ ଦିନରେ ରାଜ୍ୟର ବିଭିନ୍ନ ସହରରେ ଥିବା ଛୋଟବଡ଼ କୋଚିଂ ସେଣ୍ଟରରେ ଚଢାଉ ଜାରି ରହିବ। ଏହାସହ ଉଚ୍ଚ ଅଟ୍ଟାଳିକାଗୁଡ଼ିକରେ ଯାଞ୍ଚ କଡାକଡି ହେବ।