ବ୍ରହ୍ମପୁର ଅଫିସ,୧୦ା୫- ବିଶ୍ୱରେ କରୋନା ଏବେ ଆତଙ୍କ ସୃଷ୍ଟି କରିଛି। ଏହାକୁ ନେଇ ଲୋକେ ଭୟଭୀତ ହେବା ସହ ଆଶା ଆଶଙ୍କାରେ ଦିନ କାଟୁଛନ୍ତି। ଏହି ଧାରାରେ ଓଡ଼ିଶାରେ କରୋନା ସଂକ୍ରମଣ ବୃଦ୍ଧି ପାଉଥିବା ବେଳେ ଗ୍ରୀନ୍ଜୋନରେ ଥିବା ଗଞ୍ଜାମ ଜିଲାରେ ଆକ୍ରାନ୍ତଙ୍କ ସଂଖ୍ୟା ଦିନକୁ ଦିନ ବୃଦ୍ଧି ପାଇବାରୁ ରେଡ୍ଜୋନ ଭାବେ ଘୋଷଣା କରାଯାଇଛି। ଏବେ ଗଞ୍ଜାମ ସ୍ଥିତି ଦିନକୁ ଦିନ ସାଙ୍ଘାତିକ ହେବାରେ ଲାଗିଛି। ସୁରାଟ ଫେରନ୍ତା ଜିଲାବାସୀଙ୍କ ଚିନ୍ତା ବଢାଇଛିନ୍ତି। ଏପ୍ରିଲ ୨୯ରୁ ସୁରଟ ଫେରାନ୍ତା ଜିଲାରେ ପହଞ୍ଚିବା ଆରମ୍ଭ କରିଥିଲେ। ମେ ୩ରେ ଜିଲାରେ ପ୍ରଥମେ ୨ ଜଣ କରୋନା ସଂକ୍ରମିତ ଚିହ୍ନଟ ହୋଇଥିବା ରିପୋର୍ଟ ମିଳିଥିବା ବେଳେ ୫ ରେ ଜଣେ ଓ ୬ରେ ଜଣେ ଲେଖାଏ ଚିହ୍ନଟ ହୋଇଥିଲେ। ସେହିପରି ୭ ରେ ୨୪ ଜଣ, ୮ରେ ୪୩ ଜଣ, ୯ରେ ୧୮ ଜଣ ଚିହ୍ନଟ ହୋଇଥିବା ସ୍ବାସ୍ଥ୍ୟ ବିଭାଗ ୱେବ୍ସାଇଟରେ ଉଲ୍ଲେଖ ରହିଛି। ଏହିପରି ସଂଖ୍ୟା ୮୯ରେ ପହଞ୍ଚଛି। ଏମାନଙ୍କ ମଧ୍ୟରୁ ଜଣେ କେରଳରୁ ଫେରିଥିବା ବେଳେ ଅନ୍ୟ ୮୮ଜଣ ସୁରଟ ଫେରନ୍ତା ବୋଲି ଜଣାପଡିଛି। ଅନ୍ୟପଟେ ସୁରଟରୁ ଫେରୁଥିବା ଲୋକଙ୍କୁ ନେଇ ଜିଲାବାସୀଙ୍କ ଚିନ୍ତା ବଢିଛି। ଫଳରେ ଜିଲାର ସ୍ଥିତି ଏବେ ଅସମ୍ଭାଳ ହୋଇପଡିଛି।
ଗଞ୍ଜାମ ଜିଲାକୁ ଏହା ଭିତରେ ହଜାର ହଜାର ଶ୍ରମିକ ଫେରିଛନ୍ତି। ଯାହାକି ଆଗାମୀ ଦିନରେ ଅଧିକ ଭୟଙ୍କର ପରିସ୍ଥିତି ସୃଷ୍ଟି କରିବ ବୋଲି ଆଶଙ୍କା କରାଯାଉଛି। ଗଞ୍ଜାମ ଜିଲାକୁ ଆସିଥିବା ୩୦ ହଜାରରୁ ଅଧିକ ସୁରଟ ଫେରନ୍ତାଙ୍କ ନମୁନା ପରୀକ୍ଷା କରିବାର ଆବଶ୍ୟକ ରହିଛି। ଏପରିକି ସଂଗରୋଧ କେନ୍ଦ୍ର ଅଞ୍ଚଳକୁ ସମ୍ପୂର୍ଣ୍ଣ ଭାବେ ସଟ୍ଡାଉନ୍ କରାଯାଉ ବୋଲି ଏମ୍କେସିଜି ମେଡିକାଲ ଅଧୀକ୍ଷକ ପ୍ରଫେସର ଡାକ୍ତର ସନ୍ତୋଷ କୁମାର ମିଶ୍ର ସୂଚନା ଦେଇଛନ୍ତି। ସେହିପରି ବହୁ ଲୋକ ବସ୍ରେ ମଧ୍ୟ ଆସିଛନ୍ତି। ସେମାନେ ସେଥିରେ ସାମାଜିକ ଦୂରତା ରକ୍ଷା କରିନାହାନ୍ତି। ସେମାନେ ମିଳିମିଶି କରି ଯାତ୍ରା କରିଥିବାରୁ ସେମାନଙ୍କ ଫୋମାଇଟ ଓ ଡ୍ରପ୍ଲେଟ ଜନିତ ସଂକ୍ରମଣ ଆଶଙ୍କା ଅଧିକ ରହିଛି ବୋଲି ସେ କହିଛନ୍ତି।
