ବାଲେଶ୍ୱର ଅଫିସ, ୩୧।୫-ବାଲେଶ୍ୱର ଗାନ୍ଧୀ ସ୍ମୃତିଭବନ ପ୍ରାଙ୍ଗଣରେ ବୁଧବାର ସନ୍ଧ୍ୟାରେ ବାହାଘର ଉତ୍ସବକୁ ଅତିଥିମାନେ ଆନୁଷ୍ଠାନିକ ଭାବରେ ଉଦ୍ଘାଟନ କରିବା ପରେ ମଙ୍ଗଳନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏହି ଅବସରରେ ଚିତ୍ରାଙ୍କନ, ହୁଳହୁଳି, ଶଙ୍ଖଫୁଙ୍କା ଓ ଲୋକନୃତ୍ୟ ପ୍ରତିଯୋଗିତା କରାଯାଇଥିଲା। ଗୁରୁବାର ଅପରାହ୍ନ ୫ଟା ସମୟରେ ସମ୍ପର୍କ ଯାତ୍ରା ଆରମ୍ଭ ହୋଇଥିଲା। ବର ଶଙ୍କର ସୁସଜ୍ଜିତ ପଟୁଆରରେ ଦାମୋଦରପୁରସ୍ଥିତ ଶ୍ୟାମସୁନ୍ଦର ମନ୍ଦିର ଅଭିମୁଖେ ବାହାରିଥିଲେ। ଉକ୍ତ ମନ୍ଦିରରେ କନ୍ୟା ଟୁସୁଙ୍କ ସହିତ ବିବାହ କାର୍ଯ୍ୟକ୍ରମ ଆୟୋଜିତ ହେଉଛି। ଓଡ଼ିଶାର ବହୁ ମାନ୍ୟଗଣ୍ୟ ବ୍ୟକ୍ତି, ବିଭିନ୍ନ କଳା ଓ ସାଂସ୍କୃତିକ ଅନୁଷ୍ଠାନ ଏହି କାର୍ଯ୍ୟକ୍ରମରେ ଯୋଗ ଦେଇଛନ୍ତି।
ସଦର ବିଧାୟକ ମଦନମୋହନ ଦତ୍ତ ଯୋଗଦେଇ ଏହି ଉତ୍ସବକୁ ଉଦ୍ଘାଟନ କରିଛନ୍ତି। ମୁଖ୍ୟଅତିଥି ଭାବେ ଉପଜିଲାପାଳ ନିଲୁ ମହାପାତ୍ର, ପର୍ଯ୍ୟଟନ ଅଧିକାରୀ ଶଶାଙ୍କ ଶେଖର ରଥ, ଚିତ୍ରଶିଳ୍ପୀ ଚିନ୍ତାମଣି ବିଶ୍ୱାଳ, ବରକର୍ତ୍ତା ସୁରଞ୍ଜନ ଦାସ ମହାପାତ୍ର, ବରିଷ୍ଠ ଖବରଦାତା ଗୌତମ ବୁଦ୍ଧ ଦାସ ଓ ରଞ୍ଜନ କୁମାର ବାଗ ପ୍ରମୁଖ ଯୋଗଦେଇ ଜଉକଣ୍ଢେଇ ବାହାଘରକୁ ଲୋକାଭିମୁଖୀ କରାଯାଉଥିବାରୁ ସାଧୁବାଦ ଜଣାଇଥିଲେ। ଅନୁଷ୍ଠାନ କାର୍ଯ୍ୟକାରୀ ସଭାପତି ଉପେନ୍ଦ୍ର ପାତ୍ର ପୌରୋହିତ୍ୟ କରିଥିଲେ। ଆବାହକ କେଶୁ ଦାସ ପ୍ରାରମ୍ଭିକ ସୂଚନା ପ୍ରଦାନ କରିଥିବା ବେଳେ ଇଂ. ହୃଷୀକେଶ ସାହୁ ମଞ୍ଚ ଆହ୍ବାନ କରିଥିଲେ। ସାଧାରଣ ସମ୍ପାଦକ ଡା. କୁମାର ଗୋପାଲ ବିବରଣୀ ପାଠ କରିଥିଲେ। ଅନୁଷ୍ଠାନ ସହସମ୍ପାଦକ ରଘୁନାଥ ଲେଙ୍କା ଧନ୍ୟବାଦ ଅର୍ପଣ କରିଥିଲେ। ଅପରାହ୍ନରେ ଜଉକଣ୍ଢେଇ ଉପରେ ଏକ ଚିତ୍ରାଙ୍କନ ପ୍ରତିଯୋଗିତା ଅନୁଷ୍ଠିତ ହୋଇଥିଲା। ଏଥିରେ ଶହେରୁ ଊର୍ଦ୍ଧ୍ୱ ପିଲା ଯୋଗ ଦେଇଥିଲେ। ପରେ ମହିଳାମାନେ ଶଙ୍କରଙ୍କର ମଙ୍ଗଳନ କାର୍ଯ୍ୟ କରିଥିଲେ। ସେମାନେ ଏକ ପଟୁଆରରେ ଗାନ୍ଧୀ ସ୍ମୃତିଭବନରୁ ବାହାରି ଝାଡ଼େଶ୍ୱର ମନ୍ଦିରରେ ପହଞ୍ଚିଥିଲେ। ସେଠାରୁ କଳସରେ ପାଣି ଆଣିବା ପରେ ବର ଶଙ୍କରଙ୍କୁ ଗାଧୁଆ ଯାଇ ନୂତନ ବସ୍ତ୍ର ପିନ୍ଧାଯାଇଥିଲା। ଏହି ଅବସରରେ ମହିଳାମାନଙ୍କର କାନ୍ଦଣା ଓ ହୁଳହୁଳି ପ୍ରତିଯୋଗିତା ଅନୁଷ୍ଠିତ ହୋଇଥିଲା। ସଭାପରେ ଶ୍ରୀତମ ସିଂହ ଏକକ ଅଭିନୟ କରିଥିବା ବେଳେ ଦୟାଲ ଡ୍ୟାନ୍ସ ଗ୍ରୁପ୍ର ପିଲାମାନେ ନୃତ୍ୟ ପରିବେଷଣ କରିଥିଲେ। ଏଥିରେ ସମସ୍ତ କାର୍ଯ୍ୟ ରାଜେଶ ଗିରି, ବ୍ୟମନାଥ ରଥ, ଅରୁଣ କର, ବାରିକ ସଂଘର ସମ୍ପାଦକ ବିମଳ ବାରିକ, ରାଜେନ୍ଦ୍ର ରାଉତ, ସେକ ଇକବାଲ, ଗୌରାଙ୍ଗ ପାଣିଗ୍ରାହୀ, ବିଜୟ ଆଚାର୍ଯ୍ୟ, ପୋଦାରବିନ୍ଦ ମହାପାତ୍ର, ସୁଶାନ୍ତ କୁମାର ବେହେରା, ମନସ୍ବିନୀ ଦେବୀ, ଜୟଶ୍ରୀ ସାହୁ, ଚୌତାଳି କର, ରଚନା ସେନଙ୍କ ଦ୍ୱାରା ପରିଚାଳିତ ହୋଇଥିଲା। ଏହା ଆସନ୍ତା ୨ ତାରିଖ ପର୍ଯ୍ୟନ୍ତ ଚାଲିବ।