ବଅଁରପାଳ, ୧୯ା୬(ଡି.ଏନ.ଏ.)
ଅନୁଗୋଳ ଜିଲା ନାଲ୍କୋ ଟାଉନଶିପ୍ ଥାନାକୁ ମଡେଲ ବା ଆଦର୍ଶ ଥାନା କରାଯାଇଛି। ହେଲେ ଏହା କେମିତିକା ଆଦର୍ଶ ହୋଇପାରିଛି ତାହା ଥାନାର ସୂଚନା ଫଳକକୁ ଦେଖି ଅଭିଯୋଗକାରୀମାନେ ଜାଣିପାରୁଛନ୍ତି। ଥାନା କାନ୍ଥରେ ଜନସାଧାରଣଙ୍କ ଉଦ୍ଦେଶ୍ୟରେ ଲଗାଯାଇଥିବା ସୂଚନା ଫଳକରେ ଯେଉଁ କର୍ମଚାରୀଙ୍କ ନାମ ଓ ମୋବାଇଲ ନମ୍ବର ଉଲ୍ଲେଖ ରହିଛି ସେଥିରୁ ୧୦ ଜଣଙ୍କର ଦୀର୍ଘଦିନ ହେବ ବଦଳି ହୋଇସାରିଛି। ଏପରି କି ଅନ୍ୟଜଣେ କର୍ମଚାରୀଙ୍କ ବଦଳି ସହ ସ୍ବର୍ଗବାସ ମଧ୍ୟ ଘଟିସାରିଛି। କିନ୍ତୁ ଏଯାଏ ମୃତ ଓ ବଦଳି କର୍ମଚାରୀଙ୍କ ନାମ କି ନମ୍ବର ଫଳକରୁ ହଟାଯାଇ ନାହିଁ। ଫଳରେ ଥାନାକୁ ଅଭିଯୋଗ ନେଇ ଆସୁଥିବା ଲୋକେ ଏହି ଫଳକ ଦେଖି ଦ୍ୱନ୍ଦ୍ୱରେ ପଡୁଥିବା ଅଭିଯୋଗ ହେଉଛି।
ଆଦର୍ଶ ନାଲ୍କୋ ଥାନାର ଅଧିକାରୀ ଓ ଅନ୍ୟ କର୍ମଚାରୀଙ୍କୁ ଯେପରି ସହଜରେ ଯୋଗାଯୋଗ କରି ଜନସାଧାରଣ ସହାୟତା ପାଇପାରିବେ ସେଥିପାଇଁ ଥାନା ବାହାରେ ଫଳକ ଲଗାଯାଇଛି। ଏଥିରେ ପୋଲିସ କର୍ମଚାରୀଙ୍କ ନାମ, ପଦବୀ ସହ ଫୋନ ନମ୍ବର ରହିଛି। ମୋଟ୍ ୨୪ ଜଣଙ୍କ ତଥ୍ୟ ଉକ୍ତ ଫଳକରେ ଥିବାବେଳେ ସେଥିରୁ ୧୦ ଜଣଙ୍କ ଅନ୍ୟତ୍ର ବଦଳି ହୋଇଯାଇଥିବା ଜଣାପଡିଛି। ହେଲେ ଏ ପର୍ଯ୍ୟନ୍ତ ଫଳକରୁ ସେମାନଙ୍କ ବାବଦରେ ସୂଚନା ହଟାଯାଇନାହିଁ। ସେହିପରି ଅନ୍ୟଜଣେ ପୋଲିସ କର୍ମଚାରୀଙ୍କ ବଦଳି ସହ ଦୁର୍ଘଟଣାରେ ମୃତ୍ୟୁ ଘଟିଥିଲେ ମଧ୍ୟ ପୂର୍ବଭଳି ତାଙ୍କ ନାମ, ପଦବୀ, ଫୋନନମ୍ବର ଉଲ୍ଲେଖ ରହିଛି। ଏପରିକି ପୂର୍ବରୁ ଏଠାରେ ଥିବା ଆଇଆଇସି ସରୋଜିନୀ ସାମ୍ବଡଙ୍କ ଦୀର୍ଘ ଦିନ ତଳୁ ଅନୁଗୋଳ ବଦଳି ହୋଇଥିବା ସତ୍ତ୍ୱେ ତାଙ୍କ ନାମ ପୂର୍ବପରି ଫଳକରେ ରହିଛି। ଏଏସ୍ଆଇ ବ୍ରହ୍ମାନନ୍ଦ ସାହୁ, କର୍ମଚାରୀ ଅନ୍ତର୍ଯ୍ୟାମୀ ବିଶ୍ୱାଳ, ଜ୍ଞାନ ରଞ୍ଜନ ପ୍ରଧାନ, ମମତା ନାୟକ, ମଦନମୋହନ ପ୍ରଧାନ, ଗିରିଶ ମହାନ୍ତି, ଜୟନ୍ତ ବେହେରା, ମିନତୀ ତ୍ରିପାଠୀ, କୁନ୍ତଳା କିଷାନ, ରଞ୍ଜିତ ନାୟକ ପ୍ରମୁଖଙ୍କ ଅନ୍ୟସ୍ଥାନକୁ ବଦଳି ହୋଇସାରିଛି। ହେଲେ ସେମାନଙ୍କ ସହ ମୃତ କନଷ୍ଟେବଳ ବସନ୍ତ ଗାଗରାଇଙ୍କ ନାମ ହଟାଯାଇ ନାହିଁ କି ନୂତନ ଆଇଆଇସି ବିନ୍ଦୁବାସିନୀ ବିଶ୍ୱାଳଙ୍କ ସହ ଯୋଗ ଦେଇଥିବା ଅନ୍ୟ କର୍ମଚାରୀଙ୍କ ନାମ ଉଲ୍ଲେଖ କରାଯାଇ ନାହିଁ। ଫଳରେ ଥାନାରେ ବର୍ତ୍ତମାନ କେଉଁ ଅଧିକାରୀ ଓ କର୍ମଚାରୀ କାର୍ଯ୍ୟରତ ଅଛନ୍ତି ତାହା ଠିକ୍ ଭାବେ ଲୋକେ ଜାଣି ନ ପାରି ହଇରାଣ ହେଉଛନ୍ତି। ଖୁବ୍ଶୀଘ୍ର ଏପରି ତ୍ରୁଟି ସୁଧାରି ନୂତନ ଫଳକ ଲଗାଯିବ ବୋଲି ଥାନା ଆଇଆଇସି ବିନ୍ଦୁବାସିନୀ ବିଶ୍ୱାଳ ପ୍ରକାଶ କରିଛନ୍ତି।