ନୂଆଦିଲ୍ଲୀ, ୨୦।୬: ରବିବାର ରାହୁଗ୍ରସ୍ତ ସୂର୍ଯ୍ୟପରାଗ ହେବାକୁ ଯାଉଛି। ଜୁନ୍ ୨୧ ପୂର୍ବାହ୍ନ ୧୦ଟା ୩୮ ମିନିଟ୍ ୧୭ ସେକେଣ୍ଡରେ ପରାଗ ଆରମ୍ଭ ହେବ। ମଧ୍ୟାହ୍ନ ୧୨ଟା ୨୬ ମିନିଟ୍ ୨୬ ସେକେଣ୍ଡରେ ପରାଗ ମଧ୍ୟ ଭାଗରେ ପହଞ୍ଚିବ। ଅପରାହ୍ନ ୨ଟା ୯ମିନିଟ୍ ୩୮ ସେକେଣ୍ଡରେ ପରାଗ ସର୍ବମୋକ୍ଷ ହେବ। ଏହାପରେ ଦେବନୀତି ତଥା ଅନ୍ୟାନ୍ୟ କାର୍ଯ୍ୟ କରାଯାଇ ପାରିବ। ସୂର୍ଯ୍ୟପରାଗର ଆଦ୍ୟାନ୍ତ ସମୟ ୩ ଘଣ୍ଟା ୩୧ ମିନିଟ୍ ୨୧ ସେକେଣ୍ଡ ରହିଛି। ପରାଗରେ କଙ୍କଣ ସଦୃଶ ସ୍ଥିତି କେବଳ ୩୦ ସେକେଣ୍ଡ ପାଇଁ ଦେଖିବାକୁ ମିଳିବ। ପରାଗ ସମୟରେ ସୂର୍ଯ୍ୟଙ୍କର କେବଳ ୧ ପ୍ରତିଶତ ଅଂଶ ଦୃଶ୍ୟମାନ ହେବ। ଅବଶିଷ୍ଟ ଅଂଶ ପରାଗଗ୍ରସ୍ତ ହେବ। ପ୍ରାୟ ୯୦୦ ବର୍ଷ ପରେ ଏଭଳି ଦୁର୍ଲଭ ମହାଜାଗତିକ ଦୃଶ୍ୟ ଦେଖିବାକୁ ମିଳିବ। ସୂର୍ଯ୍ୟପରାଗର ପ୍ରଭାବରେ ୪ ରାଶିଙ୍କ ଭାଗ୍ୟରେ ବଡ଼ ଧରଣର ପରିବର୍ତ୍ତନ ଆସିବ ବୋଲି ଜ୍ୟୋତିଷ ଗଣେଶ ଶର୍ମା ସୂଚନା ଦେଇଛନ୍ତି। ସେସବୁ ରାଶିଗୁଡ଼ିକ ହେଉଛି ମେଷ, ସିଂହ, କନ୍ୟା ଓ ମକର ରାଶି। ଏହି ୪ ରାଶି ବ୍ୟକ୍ତିଙ୍କ ଭାଗ୍ୟ ଚମକିବ। ସେହିପରି ମେଷ, ବୃଷ, ସିଂହ, ଧନୁ, ମକର, କୁମ୍ଭ ଓ ମୀନ ରାଶିର ବ୍ୟକ୍ତି ସୂର୍ଯ୍ୟପରାଗ ଦର୍ଶନ କଲେ ଶୁଭଫଳ ପ୍ରାପ୍ତି ହେବ। ଅପରପକ୍ଷରେ ଅନ୍ୟ ରାଶି ବ୍ୟକ୍ତି ସୂର୍ଯ୍ୟପରାଗ ନ ଦେଖିବା ଲାଗି ଜ୍ୟୋତିଷ ଗଣେଶ ଶର୍ମାଙ୍କ ପକ୍ଷରୁ ବାରଣ କରାଯାଇଛି।
