ମୁମ୍ବାଇ: ଫିଲ୍ମ ନିର୍ମାତା ରୋହିତ ଶେଟ୍ଟୀଙ୍କ ପରବର୍ତ୍ତୀ ସିନେମା ‘ସୂର୍ଯ୍ୟବଂଶୀ’ରେ ଅଭିନୟ କରିବାକୁ ଯାଉଛନ୍ତି କ୍ୟାଟ୍ରିନା କୈଫ। ଏଥିରେ ଅକ୍ଷୟ କୁମାରଙ୍କ ସହ ତାଙ୍କର ଯୋଡ଼ି ଖୁବ୍ ଜମିବ ବୋଲି ସୂଚନା ମିଳୁଛି। ଅକ୍ଷୟଙ୍କ ସହିତ ପୂର୍ବରୁ କ୍ୟାଟ୍ରିନା ‘ନମସ୍ତେ ଲଣ୍ଡନ’ ଏବଂ ‘ସିଂ ଇଜ୍ କିଙ୍ଗ୍’ରେ ଅଭିନୟ କରିଛନ୍ତି। ଆଗାମୀ ଫିଲ୍ମ ପାଇଁ କ୍ୟାଟ୍ରିନାଙ୍କୁ ସ୍ବାଗତ କରି ଅକ୍ଷୟ ତାଙ୍କୁ ‘ସୂର୍ଯ୍ୟବଂଶୀ ଗର୍ଲ’ ଭାବେ ସମ୍ବୋଧନ କରିଛନ୍ତି।
ଏହି ଫିଲ୍ମ ନିର୍ମାଣ ପାଇଁ ପାଣ୍ଠି ଯୋଗାଉଥିବା କରନ ଜୋହର ଅକ୍ଷୟ, କାଟ୍ରିନା ଏବଂ ଶେଟ୍ଟୀଙ୍କ ସହିତ ଉଠାଇଥିବା ଏକ ଗ୍ରୁପ୍ ଫଟୋ ସୋସିଆଲ ମିଡିଆରେ ପୋଷ୍ଟ କରିଛନ୍ତି। ସୂର୍ଯ୍ୟବଂଶୀ ପାଇଁ କ୍ୟାଟ୍ରିନାଙ୍କୁ ସ୍ବାଗତ କରିଛନ୍ତି କରନ୍। ୨୦୨୦ ଇଦ୍ ବେଳକୁ ଉକ୍ତ ଫିଲ୍ମ ରିଲିଜ ହେବାର ଅଛି।
ସୂର୍ଯ୍ୟବଂଶୀରେ ଅକ୍ଷୟ ଏକ ପ୍ରମୁଖ ଭୂମିକାରେ ଅଭିନୟ କରିବାକୁ ଯାଉଛନ୍ତି। ‘କେଶରୀ’ରେ ସେ ଜଣେ ସାହସୀ ଦେଶପ୍ରେମୀର ଭୂମିକା (ଆଣ୍ଟି ଟେରରିଷ୍ଟ ସ୍କ୍ବାଡ ଅଫିସର)ରେ ଅଭିନୟ କରିଥିବାବେଳେ ସୂର୍ଯ୍ୟବଂଶୀରେ ସେଭଳି ଏକ ଦୁଃସାହସୀ ତଥା ବୀର ଚରିତ୍ରରେ ଅଭିନୟ କରିବାକୁ ଯାଉଛନ୍ତି। ୨୦୨୦ ଇଦ୍ବେଳେ ସଲମାନ ଖାନ୍ ଓ ଆଲିଆ ଭଟ୍ଟଙ୍କ ଅଭିନୀତ ‘ଇନ୍ଶାଲା’ ସହିତ ‘ସୂର୍ଯ୍ୟବଂଶୀ’ ପ୍ରତିଦ୍ୱନ୍ଦ୍ୱିତା କରିବା ସମ୍ଭାବନା ଅଛି।