କୋଣାର୍କ,୨୬।୬(ଜ୍ୟୋତିରାଜ ମହାନ୍ତି): ଅଳ୍ପ ବର୍ଷା ହେଲେ ସୂର୍ଯ୍ୟମନ୍ଦିର କୋଣାର୍କ ପାର୍ଶ୍ୱରେ ପାଣି ଜମି ରହୁଛି। ଏଥିସହ ପ୍ରଚଣ୍ଡ ଖରାରେ ସେଠାରେ ପାନୀୟ ଜଳ ଅଭାବ ଦେଖିବାକୁ ମିଳୁଛି। ଫଳରେ ପର୍ଯ୍ୟଟକ ଅସୁବିଧାର ସମ୍ମୁଖୀନ ହେଉଛନ୍ତି। ଏନେଇ ଏଏସ୍ଆଇ ପକ୍ଷରୁ ସ୍ଥାୟୀ ପ୍ରତିକାର ପାଇଁ କୋଣାର୍କ ସୁରକ୍ଷା ସମିତି ପକ୍ଷରୁ ଦାବି କରାଯାଇଛି।
ମନ୍ଦିର ଭିତରେ କୌଣସି ଆଶ୍ରୟସ୍ଥଳୀ ନ ଥିବାରୁ ସାମାନ୍ୟ ବର୍ଷା ହେଲେ ପର୍ଯ୍ୟଟକଙ୍କ ପାଇଁ ବରଗଛ ଆଶ୍ରୟସ୍ଥଳୀ ପାଲଟୁଛି। ରବିବାର ଘଣ୍ଟା ଘଣ୍ଟା ଧରି ବର୍ଷା ଲାଗି ରହିଥିବାରୁ ବରଗଛ ତଳେ ପର୍ଯ୍ୟଟକ ଛିଡ଼ା ହୋଇ ରହିଥିବା ଦେଖିବାକୁ ମିଳିଥିଲା। ମନ୍ଦିର ଉତ୍ତର କୋଣରେ ପାଣି ଜମି ଥିବାରୁ ସୂକ୍ଷ୍ମ କାରୁକାର୍ଯ୍ୟ ବୁଡି ରହିଥିଲା। ଦୂରଦୂରାନ୍ତରରୁ ଆସିଥିବା କେତେକ ପର୍ଯ୍ୟଟକ ମନ୍ଦିର ବୁଲି ନ ପାରି କାରୁକାର୍ଯ୍ୟ ନ ଦେଖି ନିରାଶ ମନରେ ଫେରି ଯାଇଥିଲେ। ମନ୍ଦିରରୁ ଜଳ ନିଷ୍କାସନ ପାଇଁ ୪ ସେନସର ପମ୍ପ ଥିଲେ ମଧ୍ୟ ତାହା େବେ ଅଚଳ ହୋଇ ପଡ଼ିଛି। ବର୍ଷାଦାଉରୁ ରକ୍ଷା ପାଇବାକୁ ଏଏସ୍ଆଇ ପକ୍ଷରୁ ଶେଡର ବ୍ୟବସ୍ଥା ନ ଥିବାରୁ ପର୍ଯ୍ୟଟକ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ପ୍ରଚଣ୍ଡ ଖରାରେ ପାନୀୟ ଜଳର ସମସ୍ୟା ପରେ ଏବେ ବର୍ଷା ଜଳ ସମସ୍ୟା, ଏହା ଏଏସ୍ଆଇ ବିଭାଗର ପର୍ଯ୍ୟଟନ ମାରଣ ନୀତି ବୋଲି ପର୍ଯ୍ୟଟନପ୍ରେମୀ ମହଲରେ ଚର୍ଚ୍ଚା ହେଉଛି। ଏଠାରେ ଦେଶୀୟ ପର୍ଯ୍ୟଟକଙ୍କ ପାଇଁ ଟିକେଟ ମୂଲ୍ୟ ୪୦ ଟଙ୍କା ଥିବାବେଳେ ବିଦେଶୀ ପର୍ଯ୍ୟଟକଙ୍କ ପାଇଁ ୬୦୦ ଟଙ୍କା ରହିଛି। ଫଳରେ ଦୈନିକ ଲକ୍ଷ ଲକ୍ଷ ଟଙ୍କା ଆଦାୟ ହେଉଛି। ଏହାସତ୍ତ୍ୱେ ବି ପର୍ଯ୍ୟଟକଙ୍କ ପାଇଁ ଏଏସ୍ଆଇ ବିଭାଗ ଏସବୁ ସୁବିଧା କ’ଣ ପାଇଁ କରୁନାହିଁ ବୋଲି ବୁଦ୍ଧିଜୀବୀ ମହଲରେ ପ୍ରଶ୍ନ ଉଠୁଛି। ଆଗାମୀ ଦିନରେ ଏହି ମୌଳିକ ସୁବିଧା ଯୋଗାଇ ନ ଦିଆଗଲେ ପର୍ଯ୍ୟଟକ ଆସିବାକୁ ଆଉ ଇଚ୍ଛା ପ୍ରକାଶ କରିବେନି। ତେଣୁ ଏଏସ୍ଆଇ ବିଭାଗ ତୁରନ୍ତ ଏସବୁ ସୁବିଧା କରିବାକୁ କୋଣାର୍କ ସୁରକ୍ଷା ସମିତି ପକ୍ଷରୁ ଦାବି ହେଉଛି। ଏ ସମ୍ପର୍କରେ କୋଣାର୍କ ଦାୟିତ୍ୱରେ ଥିବା ଏଏସ୍ଆଇ ଅଧିକାରୀ ନିରୋଜ ସିଂଙ୍କୁ ପଚାରିବାରେ, ଆମେ ଯଥାଶୀଘ୍ର ଏସବୁ ସୁବିଧା ପାଇଁ କାର୍ଯ୍ୟ ଚଳାଇଛୁ। ଖୁବ୍ କମ୍ ଦିନ ମଧ୍ୟରେ ସବୁ ସମସ୍ୟା ସମାଧାନ ହୋଇଯିବ ବୋଲି ସେ ପ୍ରକାଶ କରିଥିଲେ।