ଚଳିତ ବର୍ଷର ପ୍ରଥମ ସୂର୍ଯ୍ୟୋପରାଗ ଜୁନ ୨୧ରେ ପଡ଼ୁଛି। ଏହା ଓଡ଼ିଶା ତଥା ଭାରତର ସର୍ବତ୍ର ଦୃଶ୍ୟ ହେଉଥିବାରୁ ପାଳନୀୟ। ସାମନ୍ତ ଚନ୍ଦ୍ରଶେଖର ପଞ୍ଜିକା ଅନୁସାରେ ପୁରୀକୁ ଭାରତୀୟ ସମୟ ଅନୁସାରେ ଗ୍ରହଣ ସ୍ପର୍ଶ: ଦିବା ଘ୧୦।୩୮।୧୦, ଗ୍ରହଣ ମଧ୍ୟ: ଦିବା ୧୨।୨୫।୫୯, ସର୍ବମୋକ୍ଷ: ଦିବା ୦୨।୦୯।୩୦, ଗ୍ରାସମାନ: ୦.୬୪, ଗ୍ରାସ ଅବଧି: ଘ୩।୩୧।୧୯.୬ ହେବ। ଉପରାଗ ସ୍ପର୍ଶର ୧୨ ଘଣ୍ଟା ପୂର୍ବରୁ ଅର୍ଥାତ ଶନିବାର ରାତ୍ରି ୧୦।୩୮।୧୦ରୁ ପାକତ୍ୟାଗ ଓ ଦେବନୀତି ନିଷେଧ ରହିଛି।
ତେବେ ସୂର୍ଯ୍ୟୋପରାଗ ଏବଂ ପାକତ୍ୟାଗ ସମୟରେ କ’ଣ କରିବା ଉଚିତ୍ ନୁହେଁ ଜାଣନ୍ତୁ:
– ପରାଗ ଲାଗିବା ସମୟରେ ତେଲ ଲଗାଇବା, ରାନ୍ଧିବା, ଖାଇବା, ଶୋଇବା, ମୁଣ୍ଡ କୁଣ୍ଡାଇବା, ଦାନ୍ତ ଘଷିବା, ଲୁଗା ସଫା କରିବା, ଘରର ତାଲା ଖୋଲିବା ଆଦି କାମ କରିବା ଉଚିତ ନୁହେଁ।
– ଘରୁ ବାହାରିବା ଉଚିତ ନୁହେଁ। ପରାଗକୁ ଦେଖିବା ମଧ୍ୟ ଠିକ୍ ନୁହେଁ। ଗର୍ଭବତୀ ମହିଳା ଏହାର ବିଶେଷ ଧ୍ୟାନ ରଖିବା ଉଚିତ।
-ଗ୍ରହଣ ଲାଗିବା ସମୟରେ ଅନ୍ନ ଖାଇବା ଉଚିତ୍ ନୁହେଁ।
-ଗର୍ଭବତୀମାନେ ପରାଗ ଲାଗିବା ସମୟରେ ପରିବା ଆଟିବା, ସିଲେଇ କରିବା ତଥା ଅନ୍ୟ ଧାରଯୁକ୍ତ ବସ୍ତୁର ବ୍ୟବହାର କରିବା ଉଚିତ ନୁହେଁ। ଏହାଦ୍ୱାରା ପେଟରେ ଥିବା ଶିଶୁର ଶାରୀରିକ ଗଠନରେ ପ୍ରଭାବ ପଡ଼ିଥାଏ ବୋଲି ବିଶ୍ୱାସ ରହିଛି।
-ଗଛର ପତ୍ର, ଡାଳ ଏବଂ ଫୁଲ ତୋଳିବା ଉଚିତ୍ ନୁହେଁ।
– ଭଗବାନଙ୍କ ମୂର୍ତ୍ତିକୁ ଛୁଇଁବା ଉଚିତ ନୁହେଁ। ପୂଜା କରିବା ମଧ୍ୟ ଅନୁଚିତ। ଏଥିଲାଗି ପାକତ୍ୟାଗ ସମୟ ଆରମ୍ଭ ହେବାବେଳେ ମନ୍ଦିରର କବାଟ ବନ୍ଦ କରିଦିଅନ୍ତୁ।
କ’ଣ କରିବେ:
– ଗୁରୁ ମନ୍ତ୍ର ଜପ କରିପାରିବେ। ନଚେତ ରାମାୟଣ, ସୁନ୍ଦରକାଣ୍ଡ ପାଠ, ତନ୍ତ୍ର ସିଦ୍ଧି କରିପାରିବେ।
– ପରାଗ ଶେଷ ହେବା ପରେ ପବିତ୍ର ନଦୀରେ ନଚେତ ପାଣିରେ ଗଙ୍ଗାଜଳ ମିଶାଇ ସ୍ନାନ କରିବା ଉଚିତ।
– ଘରେ ମନ୍ଦିର ଥିଲେ ତାକୁ ଘୋଡାଇ ଦିଅନ୍ତୁ।
-ଗ୍ରହଣ କାଳ ଶେଷ ହେବା ପରେ ଦାନ କରିପାରିବେ।