ନୂଆଦିଲ୍ଲୀ, ୧୮ା୨ (ପି.ଟି.)- କିଙ୍ଗ୍ସ ଇଲେଭେନ ପଞ୍ଜାବ କ୍ୟାରିବିୟନ ପ୍ରିମିୟର ଲିଗ୍ (ସିପିଏଲ୍)ର ସେଣ୍ଟ ଲୁସିଆ ଫ୍ରାଞ୍ଚାଇଜ୍ କ୍ରୟ କରିବ। ଫଳରେ ସିପିଏଲ ଦଳ କ୍ରୟ କରିବାରେ କୋଲକାତା ନାଇଟ୍ ରାଇଡର୍ସ ପରେ କିଙ୍ଗ୍ସ ଇଲେଭେନ ହେବ ଦ୍ୱିତୀୟ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ) ଟିମ୍। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଅନୁମୋଦନ ଲାଭ କରିବା ପରେ ଆମେ ଚୁକ୍ତି ସ୍ବାକ୍ଷରିତ କରିବୁ ବୋଲି କିଙ୍ଗ୍ସ ଇଲେଭେନ ସହମାଲିକା ନେସ୍ ଓ୍ବାଡିଆ ପ୍ରକାଶ କରିଛନ୍ତି। ସେ କହିଛନ୍ତି ଏହି ସିପିଏଲ ଟିମ୍ କ୍ରୟ କରିବା ଲାଗି ଆମେ ୯ ମାସ ହେଲା ଚେଷ୍ଟା ଚଳାଇ ଆସିଥିଲୁ। ସେଣ୍ଟଲୁସିଆ ପ୍ରଧାନମନ୍ତ୍ରୀ ଆଲାନ ଚାଷ୍ଟାନେଟ୍ଙ୍କ ଯୋଗୁ ଏହା ସମ୍ଭବ ହୋଇ ପାରିଛି। ସିପିଏଲ୍ରେ ଯେଉଁ ୬ଟି ଟିମ୍ ଭାଗ ନେଉଛନ୍ତି ତନ୍ମଧ୍ୟରେ ସେଣ୍ଟ ଲୁସିଆ ଜୋକ୍ସ ଅନ୍ୟତମ। ଓ୍ବେଷ୍ଟଇଣ୍ଡିଜର ପୂର୍ବତନ ଅଧିନାୟକ ଡାରେନ ସାମି ଏହି ଦଳର ନେତୃତ୍ୱ ନେଉଛନ୍ତି। ଅନ୍ୟ ଇଣ୍ଡିଆନ ପ୍ରିମିୟର ଲିଗ୍ ଫ୍ରାଞ୍ଚାଇଜ୍ କୋଲକାତା ନାଇଟ ରାଇଡର୍ସ ୨୦୧୫ରେ ତ୍ରିନବାଗୋ ନାଇଟ ରାଇଡର୍ସ କ୍ରୟ କରିଛି। ଏହି ଦଳ ଆଜିପର୍ଯ୍ୟନ୍ତ ସବୁଠାରୁ ସଫଳ ସିପିଏଲ ଫ୍ରାଞ୍ଚାଇଜ ଭାବେ ୩ଥର ଟାଇଟଲ ଜିତିସାରିଛି।