ନୂଆଦିଲ୍ଲୀ, ୬।୯:ଉନ୍ନାଓ ବଳାତ୍କାର ପୀଡ଼ିତା ସଡ଼କ ଦୁର୍ଘଟଣା ପାଇଁ ବିଧାୟକ କୁଲଦୀପ ସିଂହ ସେନଗାରଙ୍କୁ ଦାୟୀ କରିଛନ୍ତି। ଦିଲ୍ଲୀର ଏମ୍ସରେ ଚିକିତ୍ସିତ ହେଉଥିବା ପୀଡ଼ିତାଙ୍କ ସ୍ବାସ୍ଥ୍ୟାବସ୍ଥାରେ ସୁଧାର ଆସିଛି। ଶୁକ୍ରବାର ସିବିଆଇକୁ ଦେଇଥିବା ଏକ ବୟାନରେ ସେ କହିଛନ୍ତି, ଦୁର୍ଘଟଣା ପୂର୍ବରୁ ତାଙ୍କୁ ଅଭିଯୁକ୍ତ ବିଧାୟକ କୁଲଦୀପ ସିଂହ ସେନଗାରଙ୍କ ଜଣେ ସହଯୋଗୀ ହତ୍ୟା ଧମକ ଦେଇଥିଲେ। ସେ ହିଁ ସଡ଼କ ଦୁର୍ଘଟଣା ପାଇଁ ଦାୟୀ ବୋଲି ସେ କହିଛନ୍ତି। ସୂଚନାଯୋଗ୍ୟ, ଜୁଲାଇ ୨୮ରେ ନିଜ ଦାଦାଙ୍କୁ ଭେଟିବାକୁ ରାଏବରେଲିସ୍ଥିତ ଜେଲକୁ କାରରେ ଯାଉଥିଲେ। ସାଥୀରେ ତାଙ୍କର ଜଣେ ସମ୍ପର୍କୀୟ ଏବଂ ଓକିଲ ଥିଲେ। ଓକିଲ ନିଜେ ଗାଡ଼ି ଚଳାଉଥିଲେ। ଏହି ସମୟରେ ଏକ ଟ୍ରକ ତାଙ୍କ କାରକୁ ଧକ୍କା ଦେଇଥିଲା। ଓକିଲ ଗାଡ଼ିକୁ ପଛକୁ ନେଇଯିବାକୁ ଉଦ୍ୟମ କରିବା ସମୟରେ ଟ୍ରକ ଡ୍ରାଇଭର ଟ୍ରକକୁ ତାଙ୍କ କାର ଉପରେ ଚଢ଼ାଇ ଦେଇଥିଲେ ବୋଲି ପୀଡ଼ିତା କହିଛନ୍ତି। ତେବେ ଏହି ଦୁର୍ଘଟଣାରେ ତାଙ୍କ ସମ୍ପର୍କୀୟ ଜଣଙ୍କ ଘଟଣାସ୍ଥଳରେ ପ୍ରାଣ ହରାଇଥିଲେ। ଏହି ଘଟଣାର ଯାଞ୍ଚ୍ ଏବେ ସିବିଆଇ କରୁଛି। ଉନ୍ନାଓ ବଳାତ୍କାର ଘଟଣାକୁ ନେଇ ସାରା ଦେଶରେ ଚର୍ଚ୍ଚା ହୋଇଥିଲା। ୨୦୧୭ରେ ବିଜେପି ବିଧାୟକ କୁଲଦୀପ ସିଂହ ତାଙ୍କୁ ଅପହରଣ କରି ବଳାତ୍କାର କରିଥିଲେ ବୋଲି ପୀଡ଼ିତା ଅଭିଯୋଗ କରିବା ପରେ ତାଙ୍କ ବାପାଙ୍କୁ ଚଞ୍ଚକତା କରି ହତ୍ୟା କରାଯିବା ଅଭିଯୋଗ ହୋଇଥିଲା। ଯାହାକୁ ନେଇ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସିବିଆଇ ତଦନ୍ତ ପାଇଁ ନିର୍ଦ୍ଦେଶ ଦେଇଥିଲେ। ଏବେ ସମ୍ପୃକ୍ତ ବିଧାୟକ ଗିରଫ ହୋଇ ଜେଲରେ ଥିଲାବେଳେ ତଦନ୍ତ ଜାରି ରହିଛି।