ଦିଗପହଣ୍ଡି,୯ା୨(ଡି.ଏନ.ଏ.)-ଦିଗପହଣ୍ଡି ପୁଞ୍ଜିକଆଁ ଛକ ନିକଟସ୍ଥ ସାରଥି ନରସିଂହ କଲୋନୀର ଅବସରପ୍ରାପ୍ତ ସେନା କର୍ମଚାରୀ ରବୀନ୍ଦ୍ର କୁମାର ଆଚାର୍ଯ୍ୟଙ୍କ ଘରୁ ଶନିବାର ରାତିରେ ଚୋରି ହୋଇଥିବା ଅଭିଯୋଗ ହୋଇଛି। ରବୀନ୍ଦ୍ରଙ୍କ ଏତଲା କ୍ରମେ ପୋଲିସ ନଂ. ୩୦/୨୦ରେ ମାମଲା ରୁଜୁ କରିଛି।
ପ୍ରକାଶ ଯେ, ଶନିବାର ରାତ୍ରି ଭୋଜନ ସାରି ରବୀନ୍ଦ୍ର ପରିବାର ସହ ଶୋଇଥିଲେ। ବିଳମ୍ବିତ ରାତିରେ ଦୁର୍ବୃତ୍ତମାନେ ଘରେ ପଶି ଚୋରି କରିଥିଲେ ମଧ୍ୟ ସେମାନେ ଜାଣି ପାରି ନ ଥିଲେ। ରବିବାର ଭୋର ପ୍ରାୟ ସାଢ଼େ ୪ଟାରେ ରବୀନ୍ଦ୍ର ପରିସ୍ରା ପାଇଁ ଉଠିବା ପରେ ଘଟଣା ସମ୍ପର୍କରେ ଜାଣିଥିଲେ। ଲଗାଣ ବର୍ଷା ଯୋଗୁ କଲୋନୀ ନିଛାଟିଆ ଥିଲା। ଏହାର ସୁଯୋଗ ନେଇ ଦୁର୍ବୃତ୍ତମାନେ ପଛ ପଟ ଗ୍ରିଲ ଓ ଝରକା ଭାଙ୍ଗି ଘରେ ପଶି ଟ୍ରଙ୍କ୍ରେ ଥିବା ସୁନା ମୁଦି ଓ ମୂଲ୍ୟବାନ ଶାଢ଼ି, ନଗଦ ୫ ହଜାର ଟଙ୍କା ସମେତ ମୋବାଇଲ ଫୋନ ଓ ପ୍ୟାଣ୍ଟ ପକେଟରୁ ପର୍ସ ନେଇ ଯାଇଛନ୍ତି। ଏଥିସହ ଘରର ଅନ୍ୟ ଆସବାବପତ୍ର ନେଇ ବାରିପଟେ ଫୋପାଡି ଦେଇଥିଲେ। ଖବର ପାଇ ଆଇଆଇସି ବସନ୍ତ କୁମାର ସେଠୀ ସଦଳବଳ ଘଟଣାସ୍ଥଳରେ ପହଞ୍ଚତ୍ ତଦନ୍ତ କରିଥିଲେ ମଧ୍ୟ ଚୋରଙ୍କ ସମ୍ପର୍କରେ ସୁରାକ ମିଳି ପାରିନାହିଁ।