ନୂଆଦିଲ୍ଲୀ,୨୬।୪(ପି.ଟି.): ଦେଶରେ କୋଭିଡ୍-୧୯ ସ୍ଥିତିକୁ ଦୃଷ୍ଟିରେ ରଖି ବିଶ୍ୱବିଦ୍ୟାଳୟ ଓ ଅନ୍ୟାନ୍ୟ ଉଚ୍ଚ ଶିକ୍ଷାନୁଷ୍ଠାନଗୁଡ଼ିକରେ ଜୁଲାଇ ପରିବର୍ତ୍ତେ ସେପ୍ଟେମ୍ବରରୁ ଶିକ୍ଷାବର୍ଷ ଆରମ୍ଭ କରିବା ଲାଗି ବିଶ୍ୱବିଦ୍ୟାଳୟ ଅନୁଦାନ ଆୟୋଗ (ୟୁଜିସି) ଦ୍ୱାରା ନିଯୁକ୍ତ କମିଟି ସୁପାରିସ୍ କରିଛି। ଦେଶରେ ଲକ୍ଡାଉନ ଯୋଗୁ ପାଠପଢ଼ାରେ କ୍ଷୟକ୍ଷତି ଏବଂ ଅନ୍ଲାଇନ ଶିକ୍ଷା ପ୍ରସଙ୍ଗର ଅନୁଧ୍ୟାନ ଲାଗି ୟୁଜିସି ଦୁଇଟି କମିଟି ଗଠନ କରିଥିଲେ। ହରିୟାଣା ବିଶ୍ୱବିଦ୍ୟାଳୟ କୁଳପତି ଆର୍.ସି. କୁହାଡଙ୍କ ନେତୃତ୍ୱରେ ଗଠିତ କମିଟିକୁ ଲକ୍ଡାଉନ ସମୟରେ ପରୀକ୍ଷା ପରିଚାଳନା ଏବଂ ବିକଳ୍ପ ଶିକ୍ଷାବର୍ଷ ସମ୍ପର୍କରେ ଅନୁଧ୍ୟାନ କରିବାକୁ କୁହାଯାଇଥିଲା। ସେହିପରି ଇନ୍ଦିରା ଗାନ୍ଧୀ ଜାତୀୟ ମୁକ୍ତ ବିଶ୍ୱବିଦ୍ୟାଳୟ କୁଳପତି ନାଗେଶ୍ୱର ରାଓଙ୍କ ନେତୃତ୍ୱରେ ଗଠିତ କମିଟିକୁ ଅନ୍ଲାଇନ ଶିକ୍ଷାର ଉନ୍ନତି ସମ୍ପର୍କରେ ପ୍ରସ୍ତାବ ଦେବାକୁ କୁହାଯାଇଥିଲା।
ଜୁଲାଇ ପରିବର୍ତ୍ତେ ସେପ୍ଟେମ୍ବରରେ ଶିକ୍ଷାବର୍ଷ ଆରମ୍ଭ ଲାଗି ପ୍ରଥମ କମିଟି ସୁପାରିସ୍ କରିଥିବାବେଳେ ଆବଶ୍ୟକ ଭିତ୍ତିଭୂମି ଓ ସାଧନ ଥିଲେ ବିଶ୍ୱବିଦ୍ୟାଳୟଗୁଡ଼ିକ ଅନ୍ଲାଇନ ପରୀକ୍ଷା କରାଇପାରିବେ ବୋଲି ଦ୍ୱିତୀୟ କମିଟି ପ୍ରସ୍ତାବ ଦେଇଛି। ନଚେତ୍ ସେମାନଙ୍କୁ ଲିଖିତ ପରୀକ୍ଷା କରାଇବା ଲାଗି ଲକ୍ଡାଉନ ଶେଷ ହେବା ପର୍ଯ୍ୟନ୍ତ ଅପେକ୍ଷା କରିବାକୁ ପଡ଼ିବ ବୋଲି କୁହାଯାଇଛି। ମାନବ ସମ୍ବଳ ବିକାଶ ମନ୍ତ୍ରଣାଳୟ ଦୁଇଟି ରିପୋର୍ଟକୁ ଅନୁଧ୍ୟାନ କରୁଛି। ଆସନ୍ତା ସପ୍ତାହରେ ଏ ସମ୍ପର୍କିତ ଆନୁଷ୍ଠାନିକ ମାର୍ଗଦର୍ଶିକା ପ୍ରକାଶ ପାଇବା ଆଶା କରାଯାଉଛି।