ନୂଆଦିଲ୍ଳୀ,୧୧।୫ (ପି.ଟି.): କେନ୍ଦ୍ର କ୍ରୀଡ଼ା ମନ୍ତ୍ରଣାଳୟ ଦେଶର ୫୪ ଜାତୀୟ ସ୍ପୋଟର୍ସ ଫେଡେରେଶନ (ଏନ୍ଏସ୍ଏଫ୍)ଗୁଡିକୁ ସ୍ବୀକୃତି ପ୍ରଦାନ କରିଛି। ଚଳିତବର୍ଷ ସେପ୍ଟେମ୍ବର ପର୍ଯ୍ୟନ୍ତ ଏହି ସ୍ବୀକୃତି ବଳବତ୍ତର ରହିବ। ତେବେ ପାରା ଅଲିମ୍ପିକ୍ କମିଟି ଅଫ୍ ଇଣ୍ଡିଆ (ପିସିଆଇ) ଓ ରୋଇଂ ଫେଡେରେଶନକୁ ଏଥିରୁ ବାଦ୍ ଦିଆଯାଇଛି।
ନୂଆକରି ଅଲ୍ ଇଣ୍ଡିଆ କ୍ୟାରମ ଫେଡେରେଶନକୁ ମଧ୍ୟ ମନ୍ତ୍ରଣାଳୟ ସ୍ବୀକୃତି ଦେଇଛି। କିନ୍ତୁ ପିସିଆଇ, ରୋଇଂ ଫେଡେରେଶନ ଅଫ୍ ଇଣ୍ଡିଆ (ଆରଏଫ୍ଆଇ) ଓ ସ୍କୁଲ ଗେମ୍ସ ଫେଡେରେଶନ ଅଫ୍ ଇଣ୍ଡିଆ (ଏସ୍ଜିଏଫ୍ଆଇ)କୁ ସ୍ବୀକୃତି ପ୍ରଦାନ କରାଯାଇନାହିଁ। ନ୍ୟାଶନାଲ ସ୍ପୋଟର୍ସ କୋଡ୍ର ଉଲ୍ଲଂଘନ କରିଥିବାରୁ ପିସିଆଇ ଓ ଆରଏଫ୍ଆଇକୁ ଏଥିରୁ ବାଦ୍ ଦିଆଯାଇଛି। ସେହିପରି ସୁଶୀଲ କୁମାରଙ୍କ ନେତୃତ୍ୱାଧୀନ ଏସ୍ଜିଏଫ୍ଆଇକୁ ମିସ୍ ମ୍ୟାନେଜମେଣ୍ଟ ପାଇଁ ଏଥିରୁ ବଞ୍ଚିତ ହେବାକୁ ପଡିଛି। ପ୍ରତିବର୍ଷ ଏପରି ସ୍ବୀକୃତି ପ୍ରଦାନ କରାଯାଇଥାଏ। ଏଥର କିନ୍ତୁ ସେପ୍ଟେମ୍ବର ପର୍ଯ୍ୟନ୍ତ ସ୍ବୀକୃତି ପ୍ରଦାନ କରାଯାଇଥାଏ। ତେବେ ଏ ସଂକ୍ରାନ୍ତରେ ଭାରତୀୟ ଅଲିମ୍ପିକ୍ ଆସୋସିଏଶନ (ଆଇଓଏ) ଅଧ୍ୟକ୍ଷ ନରିନ୍ଦର ବାତ୍ରା ପ୍ରଶ୍ନ ଉଠାଇଛନ୍ତି। ସେପ୍ଟେମ୍ବର ପର୍ଯ୍ୟନ୍ତ କାହିଁକି, ଡିସେମ୍ବର ପର୍ଯ୍ୟନ୍ତ କାହିଁକି ନୁହଁ ବୋଲି ସେ ପ୍ରଶ୍ନ କରିଛନ୍ତି। ତେବେ କ୍ରୀଡ଼ା ମନ୍ତ୍ରଣାଳୟ ତରଫରୁ ଏ ନେଇ କୌଣସି ସଫେଇ ଦିଆଯାଇନାହିଁ। ଏନ୍ଏସ୍ଏଫ୍ଗୁଡିକ ଦୈନନ୍ଦିନ ଖର୍ଚ୍ଚ ପାଇଁ ସରକାରଙ୍କ ଉପରେ ନିର୍ଭର କରିଥାନ୍ତି। ତେଣୁ ମନ୍ତ୍ରଣାଳୟ ସ୍ବୀକୃତ ବେଶ୍ ଗୁରୁତ୍ୱ ବହନ କରିଥାଏ।