ଶିଶୁ ଅଧିକାର ଆଇନକୁ କଡ଼ାକଡ଼ି କରାଯାଇଛି। ଶିଶୁମାନଙ୍କ ସୁରକ୍ଷା ପାଇଁ ସରକାର ଗୁରୁତ୍ୱ ଦେଉଛନ୍ତି। ମାତ୍ର ସୁନ୍ଦରଗଡ଼ ଜିଲାରେ ବିଭିନ୍ନ ସାମାଜିକ ଅନୁଷ୍ଠାନ ସହାୟତାରେ ପରିଚାଳିତ ହେଉଥିବା ଅଧିକାଂଶ ଶିଶୁଯତ୍ନ ଅନୁଷ୍ଠାନରେ ଶିଶୁମାନେ ଅସୁରକ୍ଷିତ ରହୁଥିବା ଅଭିଯୋଗ ହୋଇଛି। ଜିଲାରେ ୧୬ଟି ଶିଶୁ ଯତ୍ନ ଅନୁଷ୍ଠାନ ରହିଛି। ବିଭିନ୍ନ ସ୍ଥାନରୁ ଉଦ୍ଧାର ଶିଶୁ, ନାବାଳିକା, ନାବାଳକମାନଙ୍କୁ ସେଠାରେ ରଖାଯାଇଛି। ସରକାରଙ୍କ ତରଫରୁ ସେମାନଙ୍କ ଖାଦ୍ୟ,ପାନୀୟ ବ୍ୟବସ୍ଥା କରାଯିବା ସହିତ ପାଠପଢ଼ା ପାଇଁ ସ୍ବତନ୍ତ୍ର ଅନୁଦାନ ଯୋଗାଇ ଦିଆଯାଉଛି। ଏହି ଶିଶୁ ଯତ୍ନ ଅନୁଷ୍ଠାନ ମଧ୍ୟରୁ ୧୪ଟି ବିଭିନ୍ନ ସାମାଜିକ ଅନୁଷ୍ଠାନ ଦ୍ୱାରା ପରିଚାଳିତ ହେଉଛି। ଏହି ସବୁ ଅନୁଷ୍ଠାନରେ ଶିଶୁ ସୁରକ୍ଷା ଆଇନ୍ ଅନୁଯାୟୀ ସୁବିଧା, ସୁଯୋଗ ନାହିଁ। ପରିଚାଳନା ଦାୟିତ୍ୱରେ ଥିବା ଉପରୋକ୍ତ ଅନୁଷ୍ଠାନର କର୍ମକର୍ତ୍ତା ସେବା ଆଳରେ ପିଲାମାନଙ୍କୁ ଶୋଷଣ କରୁଥିବା ଅଭିଯୋଗ ହେଉଛି। ଏପରି କି ପିଲାମାନଙ୍କ ପାଇଁ ଆସୁଥିବା ଅନୁଦାନକୁ ହରିଲୁଟ କରାଯାଉଛି। ଏହାକୁ ଅର୍ଥ ରୋଜଗାରର ଏକ ଉତ୍ତମ ମାଧ୍ୟମ ବୋଲି କର୍ମକର୍ତ୍ତାମାନେ ଧରି ନେଇଛନ୍ତି। ଉପଯୁକ୍ତ ତଦାରଖ ଅଭାବ ହେଉ କିମ୍ବା ପରିଚାଳନା ଦାୟିତ୍ୱରେ ଥିବା ସାମାଜିକ ଅନୁଷ୍ଠାନର କର୍ମକର୍ତ୍ତାଙ୍କ ଚାପରେ ଉପରୋକ୍ତ ଅନୁଷ୍ଠାନଗୁଡିକ ନାନା ଅବ୍ୟବସ୍ଥା ମଧ୍ୟରେ ଚାଲୁଛି। ନିକଟରେ ଜିଲା ପ୍ରଶାସନର ତଦାରଖ କମିଟି ସେହି ଭଳି ଏକ ଅନୁଷ୍ଠାନ ପରିଦର୍ଶନ କରିଥିଲା। ସେତେବେଳେ ନାନା ଅବ୍ୟବସ୍ଥା ସାମ୍ନାକୁ ଆସିଥିଲା। ପରେ ସେହି ଅନୁଷ୍ଠାନରେ ଥିବା ୭ଜଣ ଶିଶୁଙ୍କୁ ଅନ୍ୟ ଏକ ଶିଶୁ ଯତ୍ନକାରୀ ଅନୁଷ୍ଠାନକୁ ସ୍ଥାନାନ୍ତର କରାଯାଇଥିଲା। ଏପରି କି ଆଉ କେତେକ ଅନୁଷ୍ଠାନକୁ କେତେଜଣ ସରକାରୀ କର୍ମଚାରୀ ପରିଚାଳନା କରୁଛନ୍ତି ବୋଲି ଜଣାପଡିଛି। ପରିଚାଳନା କମିଟିରେ ସେମାନଙ୍କ ପରିବାର ଓ ସମ୍ପର୍କୀୟ ଲୋକଙ୍କୁ ରଖାଯାଇଛି। ଏହାଦ୍ୱାରା ଆସୁଥିବା ସରକାରୀ ଅର୍ଥକୁ ଆତ୍ମସାତ କରିବାକୁ ସୁବିଧା ହେଉଛି। ଅବ୍ୟବସ୍ଥାକୁ ଲୁଚାଇବା ପାଇଁ ଏହି ସାମାଜିକ ଅନୁଷ୍ଠାନଗୁଡିକ ପ୍ରଶାସନ ଉପରେ ନାନା ଚାପ ପକାଇବାକୁ ମଧ୍ୟ ପଛାଉ ନାହାନ୍ତି। ଏଭଳି ସ୍ଥିତିରେ ଉପରୋକ୍ତ ଅନୁଷ୍ଠାନରେ ରଖାଯାଇଥିବା ଶିଶୁମାନେ ଅତ୍ୟନ୍ତ ଦୟନୀୟ ଅବସ୍ଥାରେ ରହିବାକୁ ବାଧ୍ୟ ହେଉଛନ୍ତି। କେତେକ ଅନୁଷ୍ଠାନରେ ଶିଶୁମାନଙ୍କୁ ଘରୋଇ କାର୍ଯ୍ୟରେ ମଧ୍ୟ ନିୟୋଜିତ କରାଯାଉଛି। ଏଣୁ ଏ ନେଇ ଉଚ୍ଚସ୍ତରୀୟ ତଦନ୍ତ କରିବାକୁ ବିଭିନ୍ନ ମହଲରେ ଗୁରୁତ୍ୱାରୋପ କରାଯାଇଛି।