ବଇଣ୍ଡା,୧୬।୨(ଡି.ଏନ.ଏ.) – ଆଠମଲ୍ଲିକ ବ୍ଲକ ସାନହୁଲା ସେବା ସମବାୟ ସମିତିରେ ଧାନ କିଣାରେ ଅବ୍ୟବସ୍ଥା ଦେଖାଦେଇଛି। ଫଳରେ ଚାଷୀଙ୍କ ମଧ୍ୟରେ ଅସନ୍ତୋଷ ସୃଷ୍ଟି ହୋଇଛି। ଅନେକ ଚାଷୀଙ୍କୁ ଧାନ କିଣାରେ ଅଣଦେଖା କରାଯାଉଥିବା ପ୍ରତିବାଦ କରି କେତେଜଣ ଚାଷୀ ଶନିବାର ସମବାୟ ସମିତିରେ ତାଲା ପକାଇ ବିକ୍ଷୋଭ ପ୍ରଦର୍ଶନ କରିଛନ୍ତି।
ଚାଷୀମାନେ କହିଛନ୍ତି, ପେଡ଼ିପଥର, ସାନହୁଲା, କୁରୁମଟାବ, କୁର୍ତ୍ତିବାସପୁର ପଞ୍ଚାୟତ ଅଧୀନ ୩୧ ଗ୍ରାମର ଚାଷୀ ଏହି ସୋସାଇଟି ଉପରେ ନିର୍ଭରଶୀଳ। ପ୍ରତ୍ୟେକ ବର୍ଷ ଏଠାରେ ଚାଷୀମାନେ ଅମଳ କରିଥିବା ଧାନକୁ ବିକ୍ରି କରୁଥିବାବେଳେ ଚଳିତ ବର୍ଷ ୩୪୬ ଜଣ ଚାଷୀ ଧାନ ବିକ୍ରି କରିବା ପାଇଁ ପଞ୍ଜୀକୃତ ହୋଇଛନ୍ତି। ଏପରିକି ଟୋକନ ମଧ୍ୟ ପାଇଛନ୍ତି। ହେଲେ ସେମାନେ ଧାନ ବିକ୍ରି କରିବାକୁ ସୋସାଇଟିକୁ ଆଣୁଥିବାବେଳେ ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ କରିଛନ୍ତି। ଶନିବାର କେତେଜଣ ଚାଷୀଙ୍କ ଧାନ ଗ୍ରହଣ କରାଯିବ ନାହିଁ ବୋଲି ସୋସାଇଟି ପକ୍ଷରୁ କୁହାଯାଇଥିଲା। ପରେ ଚାଷୀଙ୍କ ମଧ୍ୟରେ ପ୍ରବଳ ଅସନ୍ତୋଷ ଦେଖାଦେଇଥିଲା। ସେମାନେ ଫାଟକରେ ତାଲା ପକାଇ ଆନ୍ଦୋଳନ କରିଥିଲେ। ଫଳରେ ଗଦା ହୋଇ ରହିଥିବା ଧାନ କିଣାଯାଇ ପାରି ନ ଥିଲା। ଖବରପାଇ ଆଠମଲ୍ଲିକ ବ୍ଲକ ଯୋଗାଣ ଅଧିକାରୀ ଇତିରଞ୍ଜନ ପାତ୍ର, ଠାକୁରଗଡ଼ ଥାନା ଆଇଆଇସି ଗବାକ୍ଷ ନାୟକ ପହଞ୍ଚି ଉତ୍ତ୍ୟକ୍ତ ଚାଷୀଙ୍କ ସହ ଆଲୋଚନା କରିବା ପରେ ଫାଟକ ଖୋଲା ଯାଇଥିଲା। ଏ ନେଇ ସୋସାଇଟି ସଭାପତି ପ୍ରଭାକର ପ୍ରଧାନ କହିଛନ୍ତି, କେତେଜଣ ଚାଷୀ ଟୋକନ କରି ନ ଥିବାବେଳେ ଧାନ ବିକ୍ରି ପାଇଁ କହିଥିଲେ। ବିନା ଟୋକନରେ ଧାନ କିଣାର ନିୟମ ନ ଥିବା କୁହାଯିବାରୁ ଉତ୍କ୍ଷିପ୍ତ ହୋଇ ସେମାନେ ତାଲା ପକାଇ ଦେଇଥିଲେ। ଯୋଗାଣ ଅଧିକାରୀ ଇତିରଞ୍ଜନ ପାତ୍ର କହିଛନ୍ତି, ଯେଉଁମାନେ ଧାନ ବିକ୍ରି କରିବା ପାଇଁ ନାମ ପଞ୍ଜୀକୃତ କରିନାହାନ୍ତି ସେହି ଚାଷୀମାନେ ସମିତିରେ ତାଲା ପକାଇ ଦେଇଥିଲେ। ସେମାନଙ୍କୁ ଉପଜିଲାପାଳଙ୍କଠାରେ ଅଭିଯୋଗ କରିବା ପାଇଁ କୁହାଯାଇଛି।