ଚୌଦ୍ୱାର,୧ା୫(ଡି.ଏନ୍.ଏ.): କରୋନା ମହାମାରୀ ଜନିତ ସଂକ୍ରମଣରୁ ରକ୍ଷା ପାଇବା ପାଇଁ ସାରା ରାଜ୍ୟରେ ଲକ୍ଡାଉନରେ ଜାରିରହିଛି। ଇତି ମଧ୍ୟରେ ଲକ୍ଡାଉନ ଘୋଷଣା ହେବାର ୧ ମାସରୁ ଊର୍ଦ୍ଧ୍ୱ ହେଲାଣି। ସମ୍ବେଦନଶୀଳ କିଛି ଅଞ୍ଚଳକୁ ବାଦ୍ ଦେଲେ ଅନ୍ୟ କିଛି ଅଞ୍ଚଳରେ ଲକ୍ଡାଉନ ଗତ କିଛିଦିନ ହେବ କୋହଳ କରାଯାଇଛି। ନିହାତି ଆବଶ୍ୟକ ନ ଥିବା କିଛି ବ୍ୟବସାୟୀ ପ୍ରତିଷ୍ଠାନକୁ ଛାଡିଦେଲେ ପ୍ରାୟ ଅଧିକାଂଶ ବ୍ୟବସାୟ ପ୍ରତିଷ୍ଠାନ ସରକାରୀ କଟକଣା ଓ ସମୟାନୁବର୍ତ୍ତିତା ଅନୁଯାୟୀ ଖୋଲାଯିବା ପାଇଁ ପ୍ରଶାସନ ପକ୍ଷରୁ ନିର୍ଦ୍ଦେଶ ଦିଆଯାଇଛି। ହେଲେ ବାରିକ ସଂପ୍ରଦାୟ ଏଥିରୁ ବାଦ୍ ପଡିଥିବା ଦେଖାଯାଇଛି। ଯାହାକୁ ନେଇ ନିଖିଳ ଉତ୍କଳ ବାରିକ ସମିତି, ଚୌଦ୍ୱାର ଶାଖା ପକ୍ଷରୁ ଏକ ନିବେଦନପତ୍ର ଚୌଦ୍ୱାର ପୌରପାଳିକା ନିର୍ବାହୀ ଅଧିକାରୀଙ୍କ ଜରିଆରେ କଟକ ଜିଲାପାଳଙ୍କୁ ପ୍ରଦାନ କରାଯାଇଛି। ଆଗକୁ ଏଭଳି ଲାଗି ରହିଲେ ଅବସ୍ଥା ଅସମ୍ଭାଳ ହୋଇପଡ଼ିବ। ସାମାଜିକ ଦୂରତା ଅବଲମ୍ବନ ସହ, ଆଇନ ଅନୁଯାୟୀ ଦୋକାନ ଖୋଲିବା ପାଇଁ ସମିତି ପକ୍ଷରୁ ସରକାରଙ୍କୁ ନିବେଦନ କରାଯାଇଥିବା ଦାବିପତ୍ରରେ ଉଲ୍ଲେଖ କରାଯାଇଛି। ରାଜ୍ୟ ସରକାର ଏହି ବାରିକ ସମ୍ପ୍ରଦାୟର ପରିବାରକୁ ଆଖିଆଗରେ ରଖି କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ସମିତି ଉପଦେଷ୍ଟା ବିଷ୍ନୁଚରଣ ପରିଡା, ସଭାପତି ସୁରେଶ ଚନ୍ଦ୍ର ବାରିକ, ବିମଲ କୁମାର ବେଉରା, ବିକାଶ ଚନ୍ଦ୍ର ବାରିକ, ରମେଶ ଚନ୍ଦ୍ର ବାରିକ, ସଂଯୁକ୍ତା ବାରିକ୍ ଓ ଅନ୍ୟମାନେ ନିବେଦନ କରିଛନ୍ତି।