କାମାକ୍ଷାନଗର,୬।୫(ଡି.ଏନ୍.ଏ.): ଢେଙ୍କାନାଳ ଜିଲା ତୁମୁସିଙ୍ଗା ଥାନା ପଣ୍ଡୁଆଫାଣ୍ଡି ସୋଗର ଗ୍ରାମରେ ବୁଧବାର ପୂର୍ବାହ୍ନରେ ଅଭାବନୀୟ ଘଟଣା ଘଟିଛି। ବାଣ ବିସ୍ଫୋରଣ ଘଟି ଗୋଟିଏ ପରିବାରର ଦୁଇଜଣ ଶିଶୁଙ୍କ ମୃତ୍ୟୁ ଘଟିଛି। ସେହିଭଳି ଜଣଙ୍କ ଅବସ୍ଥା ସଙ୍କଟାପନ୍ନ ଅଛି।
ସୂଚନାନୁଯାୟୀ, ଗ୍ରାମର ସରୋଜ ସାହୁ ପଣ୍ଡୁୁଆ ଛକରେ କରିଥିବା ଦୋକାନରେ ପୂଜାସାମଗ୍ରୀ ସହ କିଛି ବାଣ ବିକ୍ରି କରନ୍ତି। ସୋଗର ଗ୍ରାମରେ ଥିବା ନିଜ ଘରେ ବାଣ ଓ ଅନ୍ୟାନ୍ୟ ସାମଗ୍ରୀ ମହଜୁଦ ରଖନ୍ତି। ଉପର ମହଲାରେ ଥିବା ଗୋଦାମଘରେ ସବୁ ସାମଗ୍ରୀ ଥିବା ବେଳେ ସରୋଜଙ୍କ ଦୁଇ ଛୋଟ ପୁଅଙ୍କ ସମେତ ପଡୋଶୀ ଘର ପୁଅ ଖେଳୁଥିଲେ। ତେବେ କୌଣସି କାରଣରୁ ଗୋଦାମରେ ନିଆଁ ଲାଗି ବିସ୍ଫୋରଣ ହୋଇଥିଲା। ବିସ୍ଫୋରଣ ଏତେ ଭୟଙ୍କର ଥିଲା ଯେ ସେଠାରେ ପ୍ରଚଣ୍ଡ ଶବ୍ଦ ହୋଇଥିଲା। ତଳେ ଥିବା ଘର ଲୋକ କିଛି ଭାବିବା ପୂର୍ବଳୁ ଚାରିଆଡେ ଧୂଆରେ ଖେଳିଯାଇଥିଲା। ଖବର ପାଇ ଅଗ୍ନିଶମ ବିଭାଗର କର୍ମଚାରୀ ଘଟଣା ସ୍ଥଳରେ ପହଞ୍ଚି ଛାତତଳେ ଥିବା ଶିଶୁଙ୍କୁ ଉଦ୍ଧାରକରି ତେଙ୍କାନାଳ ଡାକ୍ତରଖାନାକୁ ପଠାଇଥିଲେ। ସେଠାରେ ଦୁଇ ଶିଶୁଙ୍କ ମୃତ୍ୟୁ ହୋଇଥିବାବେଳେ ଜଣଙ୍କ ଅବସ୍ଥା ସଂଙ୍କଟାପନ୍ନ ରହିଛି।