ନୂଆଦିଲ୍ଲୀ,୧୮।୬: କଂଗ୍ରେସ ଦଳ ନିଜ ରାଜନୈତିକ ଇତିହାସରେ ଲଗାତାର ଭାବେ ୨ଥର ଶୋଚନୀୟ ପରାଜୟର ସାମ୍ନା କରିଛି। ୨୦୧୪ ନିର୍ବାଚନରେ ୪୪ଆସନରେ ପଛରେ ରହିଥିବା ବେଳେ ଚଳିତ ଥର ୫୨ ଆସନରେ ବିରୋଧୀ ଦଳଠାରୁ କଂଗ୍ରେସ ପଛରେ ରହିଛି। ତେବେ ଦଳର ଏହି ପରାଜୟ ପାଇଁ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ନିଜକୁ ଦାୟୀ କରିବା ସହ ନିଜ ପଦରୁ ଇସ୍ତଫା ଦେବା ପାଇଁ ଅଡି ବସିଛନ୍ତି। ତେବେ ଏହି ପରିସ୍ଥିତିର କିଭଳି ସାମ୍ନା କରାଯିବ ସେନେଇ ଦଳ ଚିନ୍ତାରେ ପଡ଼ିଯାଇଛି। ଅପରପକ୍ଷରେ ଲୋକ ସଭା ସଦନ ଆରମ୍ଭ ହୋଇଯାଇଛି। ଆଉ ଏହାରି ଭିତରେ କଂଗ୍ରେସ କର୍ମକର୍ତ୍ତା ଏକ ନୂଆ ପୋଷ୍ଟର ବାହାର କରିଛନ୍ତି। ଯାହା ଏବେ ସୋସିଆଲ ମିଡିଆରେ ଏବେ ଭାଇରାଲ ହେବାରେ ଲାଗିଛି। ପୋଷ୍ଟରରେ ୟୁପିଏ ଉପା ଅଧ୍ୟକ୍ଷା ସୋନିଆ ଗାନ୍ଧୀଙ୍କ ତୁଳନା ଝାନ୍ସୀ ରାଣୀ ଲକ୍ଷ୍ମୀବାଇଙ୍କ ସହ କରାଯାଇଛି। ଏହି ପୋଷ୍ଟରରେ ସୋନିଆ ଗାନ୍ଧୀଙ୍କ ସହ ରାହୁଲ ,ପ୍ରିୟଙ୍କା, ରାଜୀବ, ଇନ୍ଦିରା ଗାନ୍ଧୀ, ପ୍ରମୋଦ ତିଓ୍ବାରୀଙ୍କ ସହ ଅନ୍ୟ କିଛି ନେତାଙ୍କ ଫଟୋ ରହିଛି। ସୋନିଆଙ୍କୁ ଝାନ୍ସୀ ରାଣୀ ଦର୍ଶାଯିବା ସହ କ୍ୟାପସନରେ ତାଙ୍କ ପାଇଁ କିଛି ସ୍ବତନ୍ତ୍ର ବାର୍ତ୍ତା ଲେଖାଯାଇଛି। ଏହି ପୋଷ୍ଟରକୁ ପ୍ରୟାଗରାଜର କର୍ମକର୍ତ୍ତା ବା ପୋଷ୍ଟର ବୟ ହସିବ ଅହମ୍ମଦ ତିଆରି କରିଛନ୍ତି। ପ୍ରାୟତଃ ତାଙ୍କ ଦ୍ୱାରା କରାଯାଇଥିବା ପୋଷ୍ଟରଗୁଡ଼ିକ ସୋସିଆଲ ମିଡିଆରେ ଚର୍ଚ୍ଚାର ବିଷୟ ପାଲଟିଥାଏ।