ମୁମ୍ବାଇ: ବଲିଉଡ୍ ଅଭିନେତା ସୋନୁ ସୁଦ ଏବେ ଖୁବ୍ ଚର୍ଚ୍ଚାରେ। ବିଶେଷ କରି ବଲିଉଡ୍ରେ ଖଳନାୟକ ଚରିତ୍ରରେ ଦେଖାଦେଉଥିବା ଏହି ଅଭିନେତା ଏବେ ଯେମିତି ସମସ୍ତଙ୍କ ହୃଦୟରେ ରିଅଲ ନାୟକର ପରିଚୟ ପାଇଛନ୍ତି। ବିଶେଷ କରି ଦେଶରେ କରୋନା ମହାମାରୀକୁ ନେଇ ଲକ୍ଡାଉନ ଚାଲିଥିବା ବେଳେ ବାହାର ରାଜ୍ୟରେ ଫସି ରହିଥିବା ଶ୍ରମିକଙ୍କୁ ନିଜ ନିଜ ରାଜ୍ୟରେ ପହଞ୍ଚାଇବାକୁ ସୋନୁ ବଢାଇଥିଲେ ସହଯୋଗର ହାତ। ହେଲେ ଏବେ ତାଙ୍କର ସାହାଯ୍ୟ ନ ପାଇ ଜଣେ ଯୁବକ ହାତ କାଟିଦେଇଥିବା ଖବର ସାମ୍ନାକୁ ଆସିଛି। ମିଳିିଥିବା ସୂଚନାରୁ ଜଣାପଡିଛି କି ରିତିକ ଯାଦବ ନାମକ ଜଣେ ଯୁବକ ସୋନୁଙ୍କୁ ସାହାଯ୍ୟ ପାଇଁ ଗୁହାରି କରିଥିଲେ ମଧ୍ୟ ତାଙ୍କ ନିକଟରୁ କୌଣସି ଉତ୍ତର ମିଳି ନ ଥିଲା। ଶେଷରେ ସେ ନିଜର ହାତ କାଟି ସୋନୁଙ୍କ ନାଁ ଲେଖି ଦେଇଥିଲେ। ତେବେ ଏହା ଜାଣିବା ପରେ ସୋନୁ ଟୁଇଟ୍ କରି କହିଛନ୍ତି, ମୁଁ ଆପଣମାନଙ୍କୁ ଅନୁରୋଧ କରୁଛି ଆପଣମାନେ ଏମିତି କାମ କରନ୍ତୁ ନାହିଁ। ଏହାକଲେ ମୋ ହୃଦୟ ଭାଙ୍ଗି ଯାଉଛି। ମୁଁ ବୁଝି ପାରୁଛି ଆପଣମାନେ ମୋତେ ଭଲ ପାଉଛନ୍ତି। ଆପଣଙ୍କୁ କଷ୍ଟ ହେଉଥିବା ସମୟରେ ଆପଣ ମୋ ସହଯୋଗ ଲୋଡୁଛନ୍ତି ସତ। ହେଲେ ଏମିତି କାମ କଲେ ମୋ ମନ ଭାଙ୍ଗି ଯାଉଛି। ତେଣୁ ଦୟାକରି ଆପଣ ଏମିତି କାମ କରନ୍ତୁ ନାହିଁ ବୋଲି ସୋନୁ ଅନୁରୋଧ କରିଛନ୍ତି। ଏହା ଜାଣିବା ପରେ ହାତ କାଟିଥିବା ଯୁବକ ଜଣଙ୍କ ସୋନୁଙ୍କୁ କ୍ଷମା ମାଗିଥିବା ଜଣାପଡିଛି। ସୂଚନାଯୋଗ୍ୟ, ବଲିଉଡ୍ ଅଭିନେତା ସୋନୁ ସୁଦ ଏପର୍ଯ୍ୟନ୍ତ ପାଖାପାଖି ୧୫ ହଜାର ପ୍ରବାସୀ ଶ୍ରମିକଙ୍କୁ ସେମାନଙ୍କ ଘରେ ପହଞ୍ଚାଇବାରେ ସହଯୋଗ କରି ସାରିଛନ୍ତି।
