କପ୍ତିପଦା,୯ା୧୦(ଡି.ଏନ.ଏ.)- ମୟୂରଭଞ୍ଜ ଜିଲା କପ୍ତିପଦା ବ୍ଲକ୍ ଅଧିନ ମଝିଗଡିଆ ପଞ୍ଚାୟତ ଭେଜଡ଼ିହା ଗ୍ରାମର ଏକ ଦମ୍ପତି ଗତ ରବିବାର ସନ୍ଧ୍ୟାରୁ ନିଖୋଜ ଥିଲେ। ବୁଧବାର ସେମାନଙ୍କ ମୃତଦେହ ସୋନ ଡ୍ୟାମର ଗଭୀର ପାଣିରେ ଭାସୁଥିବା ବେଳେ ଉଦ୍ଧାର କରାଯାଇଛି। ମୃତ ଦମ୍ପତି ହେଲେ ସୀତାରାମ ସିଂ(୬୨) ଓ ତାଙ୍କ ସ୍ତ୍ରୀ ଲେତ(୫୫)। ଦୁଇ ଦିନ ଧରି କପ୍ତିପଦା ଦମକଳ ବାହିନୀ ଉଦ୍ଧାର କାର୍ଯ୍ୟରେ ଲାଗିଥିଲେ ହେଁ ସଫଳ ହୋଇ ପାରି ନ ଥିଲେ। ବୁଧବାର ବାଲେଶ୍ୱରୁ ଏକ ଓଡ୍ରାଫ୍ ଟିମ୍ ମଧ୍ୟ ଆସି ଏଥିରେ ସାମିଲ ହୋଇଥିଲେ। ମାତ୍ର ୨ଦିନରୁ ଉର୍ଦ୍ଧ୍ୱ ସମୟ ବିତି ଯାଇଥିବାରୁ ମୃତଦେହ ସମ୍ପୂର୍ଣ୍ଣ ପଚି ଗଭୀର ଜଳରେ ଭାସୁଥିବା ବେଳେ ଉଭୟ ବାହିନୀ ଶବକୁ ଉଦ୍ଧାର କରି କୂଳକୁ ଆଣିଥିଲେ। ଉକ୍ତ ଘଟଣା ସମ୍ପର୍କରେ ମୃତ ଦମ୍ପତିଙ୍କ ଝିଅ ସୀମା ସିଂଙ୍କ ଲିଖିତ ଅଭିଯୋଗକୁ ଭିତ୍ତି କରି ପୋଲିସ ମାମଲା(ନମ୍ବର-୧୨୯/୧୯)ରେ ଏକ ମାମଲା ରୁଜୁ କରି ତଦନ୍ତ ଜାରି ରଖିଥିଲା। ଏହି ଘଟଣାରେ ଜଡିତ ୨ ଅଭିଯୁକ୍ତଙ୍କ ମଧ୍ୟରୁ ଜଣେ ଅଭିଯୁକ୍ତକୁ ପୋଲିସ ଧରିବାରେ ସଫଳ ହୋଇଛ। ମାତ୍ର ମୁଖ୍ୟ ଅଭିଯୁକ୍ତ ଫେରାର ଅଛି। ଅଭିଯୁକ୍ତ ମାନେ ହେଲେ ଉକ୍ତ ପଞ୍ଚାୟତ ମହୁଲପଙ୍ଖା ଗ୍ରାମର ଲାଗୁ ହୋ(୨୪) ଓ ଦିବାକର ଦାଙ୍ଗଲୀ(୨୪)। ଲାଗୁ ଗିରଫ ହୋଇଥିବା ବେଳେ ଦିବାକର ଫେରାର ଅଛନ୍ତି ା ପୋଲିସ ତାକୁ ଧରିବା ପାଇଁ ବିଭିନ୍ନ ସ୍ଥାନରେ ଚଢଉ ଜାରୀ ରଖିଛି।
ପ୍ରକାଶଯୋଗ୍ୟ, ଗତ ୩୧ ଅଗଷ୍ଟରେ ଏହି ପରିବାରର ସମସ୍ତ ସଦସ୍ୟଙ୍କ ସମେତ ସମୁଦି ବାରିପଦା ସଦର ଥାନା କରତବସା ଗ୍ରାମର ଗୁରୁଭା ସିଂଙ୍କୁ ମଧ୍ୟ କେତେକ ଗ୍ରାମବାସୀ ଗୁଣି ଗାରେଡ଼ି ସନ୍ଦେହରେ ମରଣାନ୍ତ୍ରକ ଆକ୍ରମଣ କରିଥିଲେ। ଏପରିକି ମୃତ ଲେତଙ୍କୁ ଗୋଟିଏ ଗଛରେ ବାନ୍ଧିଦେଇ ମାଡ଼ ମାରିଥିଲେ। ଗ୍ରାମବାସୀଙ୍କ ଆକ୍ରମଣରେ ଗୁରୁଭା ଏବଂ ଲେତ ଗୁରୁତର ଆହତ ହୋଇଥିଲେ। ଗ୍ରାମରକ୍ଷୀଙ୍କ ପାଖରୁ ଖବର ପାଇ କପ୍ତିପଦା ଆଇଆଇସି ରୀନା ବେହେରା ଏବଂ ପୁଲିସ ବାହିନୀ ଘଟଣାସ୍ଥଳରେ ପହଂଚି ଗୁରୁତର ଗୁରୁଭା ଏବଂ ଲେତଙ୍କୁ ପ୍ରଥମେ କପ୍ତିପଦା ଡ଼ାକ୍ତରଖାନାରେ ଭର୍ତି କରିଥିଲେ। ତେବେ ଅବସ୍ଥା ସଂକଟାପନ୍ନ ଥିବାରୁ ସେମାନଙ୍କୁ ଉଦଳା ଡ଼ାକ୍ତରଖାନା ସ୍ଥାନାନ୍ତର କରାଯାଇଥିଲା। ଏ ସଂପର୍କରେ କପ୍ତିପଦା ଥାନାରେ କେସ୍ ନଂ ୯୩/୧୯ରେ ଏକ ମୋକଦ୍ଦମା ରୁଜୁ କରାଯାଇ ତଦନ୍ତ ଜାରି ରହିଥିଲା।