କୁଆମରା,୯ା୧୨(ଡି.ଏନ୍.ଏ.)- ଗୋପବନ୍ଧୁ ନଗର ବ୍ଲକ ଦେଇ ପ୍ରବାହିତ ସୋନ ନଦୀରୁ ବେଆଇନ ବାଲି ଉଠାଣ ଚାଲିଥିବା ଅଭିଯୋଗ ହୋଇଛି। ପ୍ରତ୍ୟହ ଦଶ ଚକିଆ ଟ୍ରକ ଓ ଟ୍ରାକ୍ଟର ବାଲି ପରିବହନ କରୁଛନ୍ତି। ଜୟପୁର, ଦିଘି ନୂଆସାହି, ନୂଆ ଗାଁ, ସାଇଁକୁଳା, କଣ୍ଟିସାହି ପ୍ରଭୃତି ଘାଟରୁ ବେଆଇନ ଭାବେ ବାଲି ଉଠାଣ ହେଉଥିବା ବେଳେ ସରକାରୀ ନୀତି ନିୟମକୁ ଉଲ୍ଲଘଂନ କରାଯାଉଛି। ବାଲି ବେପାରୀମାନେ ନଦୀରୁ ବାଲି ଉତ୍ତୋଳନ କରି କୁଆମରା ଓ ସାଇଁକୁଳା ରାସ୍ତା ଦେଇ ବାଲେଶ୍ୱର ଜିଲା ଓ ବାହାର ରାଜ୍ୟକୁ ବାଲି ଚାଲାଣ କରୁଛନ୍ତି। ବାଲି ବେପାରୀମାନେ ବେଶ ଅର୍ଥ ରୋଜଗାର କରୁଥିବା ବେଳେ ଗ୍ରାମାଞ୍ଚଳ ରାସ୍ତା ଘାଟର ଅବସ୍ଥା ଶୋଚନୀୟ ହୋଇ ପଡୁଛି। ଭାରୀଯାନ ଚଳାଚଳ ଯୋଗୁଁ ଲୋକେ ରାସ୍ତାଘାଟରେ ଯିବାକୁ ନିରାପଦ ମଣୁ ନାହାଁନ୍ତି। ୨ଦିନ ତଳେ ଜଣେ ଯୁବକଙ୍କ ମୃତ୍ୟୁ ଘଟିଥିବା ବେଳେ ଏକ ବର୍ଷ ମଧ୍ୟରେ ୩୦ରୁ ଅଧିକ ଦୁର୍ଘଟଣା ଘଟି ସାରିଲାଣି। ନିଲାମ ହୋଇଥିବା ଘାଟମାନଙ୍କରୁ ବର୍ଷକୁ ଯେତିକି ବାଲି ଉତ୍ତୋଳନ କରାଯିବା କଥା ତା ଠାରୁ ଯଥେଷ୍ଟ ଅଧିକ ବାଲି ଉଠାଣ କରିବା ଫଳରେ ନଦୀ କୂଳ ଗ୍ରାମ ଗୁଡିକ ପ୍ରତି ବିପଦ ସୃଷ୍ଟି କରୁଛି। ଅନେକ ସ୍ଥାନରେ ମେଶିନ ସାହାଯ୍ୟରେ ବାଲି ଉତ୍ତୋଳନ କରାଯାଉଥିବାରୁ ବଡ଼ ବଡ଼ ଗର୍ତ୍ତ ସୃଷ୍ଟି ହେଉଛି। ବର୍ଷା ଦିନେ ଏହା ବିପଦ ସୃଷ୍ଟି କରୁଛି। ବାଲି ବୋଝେଇ ଭାରିଯାନଗୁଡିକ ଫାଣ୍ଡି ଓ ଥାନା ସମ୍ମୁଖ ଦେଇ ଯାତାୟତ କରୁଥିଲେ ମଧ୍ୟ ଏଥିପ୍ରତି ପୋଲିସ ବିଭାଗ ନିରବ ଦ୍ରଷ୍ଟା ସାଜିଛି। ରାଜସ୍ବ ବିଭାଗ ମଧ୍ୟ ନୀରବଦ୍ରଷ୍ଟା ସାଜିଛି। ତେବେ ନିକଟରେ ଜୟପୁର ପଞ୍ଚାୟତର ନୂଆଗାଁଠାରେ ମହିଳାମାନେ ଏକାଠି ହୋଇ ବାଲି ବୋଝେଇ ଟ୍ରକଗୁଡିକୁ ଅଟକାଇ ଥିଲେ ମଧ୍ୟ ପ୍ରଶାସନିକ ଅଧିକାରୀ ଠିକ ସମୟରେ ନ ପହଞ୍ଚିବାରୁ ସେମାନେ ଗାଡ଼ିଗୁଡ଼ିକୁ ଛାଡି ଦେଇଥିଲେ। ଏ ନେଇ ଅଞ୍ଚଳବାସୀଙ୍କ ଅସନ୍ତୋଷ ବଢିବାରେ ଲାଗିଛି। ଯଥା ଶୀଘ୍ର ଏ ଦିଗରେ ରାଜସ୍ବ ବିଭାଗ ପଦକ୍ଷେପ ନ ନେଲେ ଲୋକେ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି।