ସୁନ୍ଦରଗଡ଼, ୫।୧(ଡି.ଏନ୍.ଏ.) -ସବୁ ସମ୍ପର୍କ ମଧ୍ୟରେ ବନ୍ଧୁତ୍ୱ ଭାବ ନିଆରା । କେତେବେଳେ କାହା ସହିତ ଅନ୍ତରଙ୍ଗ ବନ୍ଧୁତ୍ୱ ସୃଷ୍ଟି ହୁଏ ତାହାର କୌଣସି ନିର୍ଦ୍ଦିଷ୍ଟ ସୀମା ନ ଥାଏ। ସେହିପରି ଏକ ନିଆରା ବନ୍ଧୁତ୍ୱ ସୋସିଆଲ ମିଡିଆ ଫେସ୍ବୁକର ଚାଟିଂ ମାଧ୍ୟମରେ ସୃଷ୍ଟି ହୋଇଥିଲା ସୁଦୂର କୋରିଆର ଜେମ୍ସ ଓ ସୁନ୍ଦରଗଡ ରଙ୍ଗାଢିପାର ଅଙ୍କିତ ପାଣ୍ଡିଆଙ୍କ ମଧ୍ୟରେ। ୩ବର୍ଷ ହେବ ଫେସବୁକ୍ରେ ଅଙ୍କିତ ଜେମ୍ସଙ୍କ ସହିତ ଚାଟିଂ କରୁଥିଲେ। ତାଙ୍କ ସହିତ ଭାବ ବିନିମୟ ଦ୍ୱାରା ଭାରତ ତଥା ତାଙ୍କ ଘରକୁ ଆସିବାକୁ ଆଗ୍ରହୀ ହେଲେ ଜେମ୍ସ। ଅଙ୍କିତ ବିଭିନ୍ନ ରକେଟ ତଥା ହେଲିକପ୍ଟରର ମଡେଲ ତିଆରି କରି ଫେସ୍ବୁକ୍ରେ ପୋଷ୍ଟ କରୁଥିଲେ। ଅନ୍ତରଙ୍ଗ ବନ୍ଧୁତ୍ୱ ସୃଷ୍ଟି ହେବା ପରେ ଏହି ସବୁ ମଡେଲକୁ ଦେଖିବା ଓ ଅଙ୍କିତଙ୍କୁ ଭେଟିବା ପାଇଁ ତାଙ୍କ ମନରେ ଗଭୀର ଆଗ୍ରହ ସୃଷ୍ଟି ହୋଇଥିଲା। ଶେଷରେ ସୁଦୂର କୋରିଆରୁ ଓଡିଶାର ଉପାନ୍ତ ଜିଲା ସୁନ୍ଦରଗଡ ସହରରେ ଆସି ପହଞ୍ଚିଥିଲେ ଜେମ୍ସ। ଇଂଲଣ୍ଡର ମୂଳବାସିନ୍ଦା ଜେମ୍ସ କେ. ଡେଭିଡ କୋରିଆରେ ଇଂଲିଶ ଅଧ୍ୟାପକ ଭାବେ କାର୍ଯ୍ୟ କରୁଛନ୍ତି। କୋରିଆରୁ ଥାଇଲାଣ୍ଡ ପରେ ଭାରତର କୋଲକତା ବିମାନବନ୍ଦର ଦେଇ ଜେମ୍ସ ଗତ ୩୦ ତାରିଖରେ ଝାରସୁଗୁଡା ବିମାନ ବନ୍ଦରରେ ପହଞ୍ଚିଥିଲେ। ସେଠାରୁ ବନ୍ଧୁ ଅଙ୍କିତ ତାଙ୍କୁ ସଡକପଥରେ ଆଣି ସୁନ୍ଦରଗଡ଼ରେ ପହଞ୍ଚିଥିଲେ। ଏଠାରେ ପହଞ୍ଚିବା ପରେ ବନ୍ଧୁ ଅଙ୍କିତ ଓ ତାଙ୍କ ପରିବାରଙ୍କ ଆତିଥ୍ୟ ତାଙ୍କୁ ବିମୋହିତ କରିଥିଲା। ଅଙ୍କିତଙ୍କ ପରିବାର ସଦସ୍ୟମାନଙ୍କ ସହ ଏକାଠି ବସି ପାରମ୍ପରିକ ଓଡିଆ ଖାଦ୍ୟ ଖାଇବା ସହ ସୁନ୍ଦରଗଡ ନିକଟବର୍ତ୍ତୀ ଦର୍ଶନୀୟ ସ୍ଥାନ ସରଫଗଡ ଡ୍ୟାମ ବୁଲିବାକୁ ଯାଇଥିଲେ। ଏହାପରେ ହୀରାକୁଦ ଡ୍ୟାମ ଓ ସୁନ୍ଦରଗଡ ଜିଲାର ବିଭିନ୍ନ ସ୍ଥାନ ବୁଲି ଦେଖିବା ସହ ଏଠାରେ ନୂୂଆବର୍ଷ ପାଳନ କରିଥିଲେ। ଏପରିକି ସୁନ୍ଦରଗଡରେ ଚା ଷ୍ଟଲରେ ଅଦା, ଗୋଲମରିଚ ଦିଆ ନାଲି ଚା ତାଙ୍କର ବେଶ ପସନ୍ଦ ହୋଇଥିଲା। ପୁଅର ଏହି ନିଆରା ବନ୍ଧୁତ୍ୱକୁ ଦେଖି ବାପା ଚିନ୍ତାମଣି ପାଣ୍ଡିଆ, ମା’ ବନ୍ଦନା ପାଣ୍ଡିଆ, ଭଉଣୀ ମୋନାଲିସା ପାଣ୍ଡିଆ ମଧ୍ୟ ବେଶ୍ ଖୁସି ହୋଇଥିଲେ। ଅଙ୍କିତ ପରି ଜେମ୍ସ ମଧ୍ୟ ତାଙ୍କର ଆଉ ଗୋଟିଏ ପୁଅ ବୋଲି ଭାବବିହ୍ବଳ ହୋଇ ବାପା ଚିନ୍ତାମଣି ପ୍ରକାଶ କରିଥିଲେ। ଜେମ୍ସଙ୍କ ସରଳ ଅମାୟିକ ବ୍ୟବହାର ସମସ୍ତଙ୍କୁ ବେଶ ଖୁସି ଦେଇଥିଲା । ସୁନ୍ଦରଗଡ ଭାଷା ସଂସ୍କୃତି, ଚଳଣି ପ୍ରତି ଗଭୀର ଆଗ୍ରହ ପ୍ରକାଶ କରିଥିବା ଜେମ୍ସ ଓଡିଆ ଭାଷା ମଧ୍ୟ ଶିଖିବାକୁ ଚେଷ୍ଟା କରୁଛନ୍ତି। ବନ୍ଧୁ ଅଙ୍କିତ ଓ ତାଙ୍କ ପରିବାରବର୍ଗଙ୍କୁ କୋରିଆ ନିମନ୍ତ୍ରଣ କରି ଶୁକ୍ରବାର ଝାରସୁଗୁଡା ବିମାନବନ୍ଦରରୁ ଫେରି ଯାଇଛନ୍ତି ଜେମ୍ସ । ବନ୍ଧୁଙ୍କ ପରିବାର ବର୍ଗ ପାଇଁ ଛାଡି ଯାଇଛନ୍ତି ଅପାସୋରା ସ୍ମୃତି।