ମୁମ୍ବାଇ: ଚଳଚ୍ଚିତ୍ର ‘ଜବରିୟା ଯୋଡ଼ି’ ପରେ ଏବେ ଅଭିନେତ୍ରୀ ପରିଣୀତି ଚୋପ୍ରା ଫିଲ୍ମ ‘ଦ ଗର୍ଲ ଅନ୍ ଦ ଟ୍ରେନ୍’ର ଶୁଟିଂରେ ବ୍ୟସ୍ତ। ଫିଲ୍ମରେ ତାଙ୍କ ସହ ଅଦିତି ରାଓ ହୈଦରୀ ଓ କିର୍ତ୍ତୀ କୁଲ୍ହାରୀ ନଜର ଆସିବେ। ଫିଲ୍ମରେ ଜଣେ ବ୍ରିଟିଶ ପୋଲିସ ଅଫିସର ଆଲିୟା ଶେରଗିଲଙ୍କ ଭୂମିକାରେ ପରିଣୀତିଙ୍କୁ ଦେଖିବାକୁ ମିଳିବ। ଏହାକୁ ନିର୍ଦ୍ଦେଶନା ଦେବେ ଋଷି ଦାସଗୁପ୍ତା। ଏହା ଜୀବନର ସବୁଠୁ କଠିନ ଭୂମିକା ବୋଲି କହି ନିକଟରେ ପରିଣୀତି ସୋସିଆଲ ମିଡିଆରୁ ବିଦାୟ ନେଇଥିଲେ। ହେଲେ ଶନିବାର କିଛି ସମୟ ପାଇଁ ଏହାକୁ ଭାଙ୍ଗି ଏକ ଫଟୋ ଶେୟାର କରିଛନ୍ତି। କଳା ଚଷମା ଓ ଜ୍ୟାକେଟ୍ ପିନ୍ଧି ପରିଣୀତି ଖୁବ୍ ସୁନ୍ଦର ଲାଗୁଛନ୍ତି। ତେବେ ଫଟୋଟି ଶେୟାର କରିବାକୁ ସେ ଏପରି କହିଥିବା ସହ ପୁଣିଥରେ ବିଦାୟ ନେଉଥିବା କହିଛନ୍ତି।
ସିଦ୍ଧାର୍ଥଙ୍କ ସହ ‘ଜବରିୟା ଯୋଡ଼ି’ ଫିଲ୍ମକୁ ଦର୍ଶକ ପସନ୍ଦ କରି ନ ଥିଲେ ସୁଦ୍ଧା ପରିଣୀତିଙ୍କ ହାତରେ ଏବେ ଫିଲ୍ମର ଲମ୍ବା ଲାଇନ। ‘ଦ ଗର୍ଲ ଅନ୍ ଦ ଟ୍ରେନ୍, ଭୁଜ: ଦ ପ୍ରାଇଡ ଅଫ୍ ଇଣ୍ଡିଆ ଏବଂ ସନ୍ଦିପ ଏବଂ ପିଙ୍କି ଫେରାର’ରେ ସେ କାମ କରୁଛନ୍ତି। ଏବେ ଦ ଗର୍ଲ ଅନ୍ ଦ ଟ୍ରେନ୍ର ଶୁଟିଂ ପାଇଁ ସେ ଲଣ୍ଡନରେ। ଫିଲ୍ମରେ ନିଜ ଭୂମିକା ପ୍ରମୁଖ ରହିଥିବାରୁ ଅନ୍ୟ କୌଣସି କାର୍ଯ୍ୟରେ ମନ ଦେବାକୁ ତାଙ୍କୁ ସମୟ ମିଳୁନାହିଁ। ଫଳରେ କିଛି ଦିନ ପାଇଁ ସୋସିଆଲ ମିଡିଆଠାରୁ ନିଜକୁ ଦୂରେଇ ରଖିଛନ୍ତି ସେ। ସାରା ସମୟ ଶୁଟିଂକୁ ଦେଉଛନ୍ତି।