ସାରା ବିଶ୍ୱ ବର୍ତ୍ତମାନ କରୋନା ଭାଇରସ୍ ସହ ଲଢୁଛି। ଏପରି ସମୟରେ ଇରାନ୍ର ଏକ ଦମ୍ପତିଙ୍କୁ ସୋସିଆଲ ମିଡିଆରେ ଫଟୋ ପୋଷ୍ଟ କରିବା ମହଙ୍ଗା ପଡ଼ିଛି। ଇରାନର ପ୍ରଭାବଶାଳୀ ବ୍ୟକ୍ତି ଅହମ୍ମଦ ମୋଇନ୍ ଶିରାଜୀ ଏବଂ ତାଙ୍କ ସ୍ତ୍ରୀ ଶବନମ ଶାହରୋଖୀଙ୍କୁ କୋର୍ଟ ୧୬ ବର୍ଷ ପର୍ଯ୍ୟନ୍ତ ଜେଲ୍ ଦଣ୍ଡ ଏବଂ ଚାବୁକ୍ରେ ୭୪ ପ୍ରହାର ସଜା ମିଳିଛି। ଶିରାଜୀ ତାଙ୍କ ଇନ୍ଷ୍ଟାଗ୍ରାମରେ କହିଛନ୍ତି, ଆମ ସ୍ବାମୀ ସ୍ତ୍ରୀଙ୍କ ଉପରେ ସୋସିଆଲ ମିଡିଆରେ ଅଶ୍ଳୀଳ ଫଟୋ ପୋଷ୍ଟ କରିବା ଏବଂ ନୈତିକ ଭ୍ରଷ୍ଟାଚାର ଅଭିଯୋଗ ହୋଇଛି। ଏହି ଦମ୍ପତି ଏବେ ଇରାନରେ ନ ରହି ତୁର୍କୀରେ ରହୁଛନ୍ତି। ୨୦୧୯ରେ ସେ ତୁର୍କୀ ଛାଡ଼ିଥିଲେ। ଏବେ ତାଙ୍କ ଉପରେ ଏହି ଅଭିଯୋଗ ଆସିଛି।
ଶିରାଜୀ କୁହନ୍ତି, ଇରାନ କୋର୍ଟ ତାଙ୍କୁ କୌଣସି ପ୍ରକାର ଦୋଷୀ ସାବ୍ୟସ୍ତ କରିବାକୁ ଚାହୁଁଥିଲେ। ତେଣୁ ସେ ଇରାନ ଛାଡ଼ିବାକୁ ନିଷ୍ପତ୍ତି ନେଇଥିଲେ। ଶିରାଜୀଙ୍କର ଇନ୍ଷ୍ଟାରେ ୧୫ ଲକ୍ଷ ଫଲୋଅର୍ସ ଅଛନ୍ତି। ତାଙ୍କୁ ୯ ବର୍ଷ ଏବଂ ତାଙ୍କ ସ୍ତ୍ରୀଙ୍କୁ ୭ ବର୍ଷ ଜେଲ୍ ଦଣ୍ଡ ସହ ୭୪ ଥର ଚାବୁକରେ ପ୍ରହାର ଏବଂ ତିନିମାସ ପର୍ଯ୍ୟନ୍ତ ବିନା ବେତନରେ ବା ଦରମାରେ କାମ କରିବାକୁ ରାୟ ଶୁଣାଇଛନ୍ତି। ଏହି କଥା ଶିରାଜୀ ତାଙ୍କ ଓକିଲଙ୍କଠାରୁ ସୂଚନା ପାଇଛନ୍ତି। ଶିରାଜୀ କୁହନ୍ତି, ଏହା ପୂର୍ବରୁ ଗୁପ୍ତଚର ମନ୍ତ୍ରଣାଳୟ ତାଙ୍କୁ ବହୁବାର ଡାକି ଦୀର୍ଘ ସମୟ ଧରି ପଚରାଉଚରା କରିଛନ୍ତି। ସୋସିଆଲ ମିଡିଆରେ ତାଙ୍କ ସ୍ତ୍ରୀଙ୍କ ଅଶ୍ଳୀଳ ଫଟୋ ପୋଷ୍ଟ ନ କରିବାକୁ କୁହାଯାଇଛି। ଏପରିକି ସୋସିଆଲ ମିଡିଆରୁ ଦୂରେଇ ରହିବାକୁ କୁହାଯାଇଛି।
