ଭୁବନେଶ୍ୱର,୧୮।୮(ବ୍ୟୁରୋ) : ଚଳଚ୍ଚିତ୍ର ‘ମିଷ୍ଟର କହ୍ନେୟା’ର ପୋଷ୍ଟରକୁ ନେଇ ବିବାଦ ଘେରକୁ ଆସିଥିବା ଅଭିନେତା ପପୁ ପମ୍ପମ୍ ରବିବାର ମୁହଁ ଖୋଲିଛନ୍ତି। ଉକ୍ତ ପୋଷ୍ଟରଟି ମୋ’ ଚିନ୍ତାଧାରାର ନୁହେଁ, ମୁଁ ଭୁଲ କରିନାହିଁ। ବାହାରେ କିଏ ପୋଷ୍ଟର କରିଛନ୍ତି ଜାଣିନି। ସେଥିପାଇଁ ମୁଁ ଉତ୍ତରଦାୟୀ ନୁହେଁ। ପ୍ରଯୋଜକଙ୍କୁ ମଧ୍ୟ ଏ ବିଷୟରେ ପଚାରିଛି। ପୋଷ୍ଟରଟି ପ୍ରଯୋଜନା ସଂସ୍ଥା ପକ୍ଷରୁ ହୋଇନାହିଁ। ଏଣୁ ଯିଏ କରିଛି ତାକୁ ଖୋଜି ବାହାର କରାଯାଉ ବୋଲି ପପୁ ସୋସିିଆଲ ମିଡିିଆରେ ଭିଡିଓ ଜାରି କରି କହିଛନ୍ତି।
ପ୍ରକାଶଥାଉ କି, ସିଦ୍ଧାର୍ଥ ମ୍ୟୁଜିକ୍ ବ୍ୟାନରରେ ନିର୍ମିତ ଉକ୍ତ ଫିଲ୍ମର ପୋଷ୍ଟରକୁ ନେଇ ବିବାଦ ଘେରକୁ ଆସିଛନ୍ତି ପପୁ। ଉକ୍ତ ପୋଷ୍ଟରରେ ୭ ଜଣ ଯୁବତୀ ଘୋଡ଼ା ଭଳି ଆଣ୍ଠେଇ ଥିବାବେଳେ ପପୁ ରଥର ସାରଥୀ ଭଳି ଗୋଟିଏ ହାତରେ ଲଗାମ ଓ ଅନ୍ୟ ହାତରେ ଚକ୍ର ଧରିବା ଶୈଳୀରେ ଫଟୋ ଉଠାଇଛନ୍ତି । ଏହି ପୋଷ୍ଟର ସୋସିଆଲ ମିଡିଆରେ ଭାଇରାଲ ହେବା ପରେ ବହୁ ସାମାଜିକ ଅନୁଷ୍ଠାନ, ମହିଳା ସଂଗଠନ ଏହାକୁ ବନ୍ଦ କରିବା ସହ ନିର୍ଦ୍ଦେଶକ ଓ ପ୍ରଯୋଜକ ସଂସ୍ଥା ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି। ମହିଳା ଥାନାରେ ଏନେଇ ଏକ ଅଭିଯୋଗ ହେବା ପରେ ପୋଲିସ ଆଇପିସି ଦଫା ୬ ଲଗାଇ ପ୍ରଯୋଜନା ସଂସ୍ଥା ନାମରେ ମାମଲା (ନଂ. ୮୯/୧୯) ରୁଜୁ କରିଛି।
