ପୁରୀ ଅଫିସ,୨୯ା୭:ବିଶ୍ୱନିୟନ୍ତା ମହାପ୍ରଭୁ ଶ୍ରୀଜଗନ୍ନାଥ। ଦେଶ ବିଦେଶର ବିଭିନ୍ନ ସ୍ଥାନରେ ଶ୍ରୀଜଗନ୍ନାଥ ମନ୍ଦିର ରହିଛି। ସେଠାରେ ଶ୍ରଦ୍ଧାଳୁମାନେ ଠାକୁରମାନଙ୍କୁ ଉପାସନା କରୁଛନ୍ତି। ଏମିତି କି ଅନେକ ଦେଶରେ ରଥଯାତ୍ରା ବି ଅନୁଷ୍ଠିତ ହେଉଛି। ହେଲେ ଶ୍ରୀମନ୍ଦିରରେ ଦାରୁବିଗ୍ରହଙ୍କ ସେବାପୂଜା, ରୀତିନୀତି ଯେଉଁଭଳି କରାଯାଉଛି ତାହା ଅନ୍ୟ କେଉଁଠି ଦେଖିବାକୁ ମିଳି ନ ଥାଏ। ଶ୍ରୀମନ୍ଦିରର ପରମ୍ପରା, ସଂସ୍କୃତି ଅନ୍ୟ ସବୁ ମନ୍ଦିରଠାରୁ ଭିନ୍ନ ଓ ସ୍ବତନ୍ତ୍ର। ସେମିତି ବଡ଼ଦେଉଳରେ ମହାପ୍ରଭୁଙ୍କ ଏକାଧିକ ଗୁପ୍ତ ବିଧି ରହିଛି, ଯାହା ସେବା ସହ ସମ୍ପୃକ୍ତ ସେବକଙ୍କ ଛଡ଼ା ଅନ୍ୟ କେହି ଜାଣି ନ ଥାନ୍ତି। ସେହିପରି ଶ୍ରୀମନ୍ଦିରରେ ଦୈନିକ କେତେକ ନୀତି ଯେପରି କି ଗୋପାଳ ବଲ୍ଲଭ, ଷୋଡ଼ଶ ଉପଚାର ପୂଜା ମଧ୍ୟ ଭକ୍ତଙ୍କ ଆଢୁଆଳରେ କରାଯାଏ। ମହାସ୍ନାନ ପାଇଁ ଜୟ ବିଜୟ ଦ୍ୱାର ବନ୍ଦ ରୁହେ। ଏମିତି ଶ୍ରୀମନ୍ଦିରର ଅନେକ ସ୍ବାତନ୍ତ୍ର୍ୟ ରହିଛି। ହେଲେ ଶ୍ରୀମନ୍ଦିରରେ ହେଉଥିବା ସମସ୍ତ ସେବାପୂଜା ଓ ରୀତିନୀତି ରାଜ୍ୟ ବାହାରେ (ମନ୍ଦିର କିମ୍ବା ଘରେ) କରାଯାଉଥିବା ବେଳର ଫଟୋ ସୋସିଆଲ ମିଡିଆରେ ଘୂରିବୁଲୁଛି। ସବୁଠୁ ପରିତାପର ବିଷୟ ହେଉଛି ଶ୍ରୀମନ୍ଦିରର କେତେଜଣ ନିର୍ଦ୍ଦିଷ୍ଟ ଗୋଷ୍ଠୀର ସେବାୟତ ଅନ୍ୟତ୍ର ଯାଇ ଠାକୁରଙ୍କ ପୂଜାବିଧି ସମ୍ପନ୍ନ କରୁଛନ୍ତି। ଫଳରେ ମହାପ୍ରଭୁଙ୍କ ଅନେକ ଗୁପ୍ତ ବିଧି ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ରବିବାର ଏହି ଭାଇରାଲ ଫଟୋ ଜଣାପଡ଼ିବା ପରେ ଏହାକୁ ନେଇ ବିଭିନ୍ନ ପ୍ରକାର ଚର୍ଚ୍ଚା ହେଉଛି।
କୌଶିକ ନାମଧାରୀ ଜଣେ ବ୍ୟକ୍ତିଙ୍କ ଫେସ୍ବୁକ ଆକାଉଣ୍ଟରେ ଏହିଭଳି ସଂଖ୍ୟାଧିକ ଫଟୋ ଅପ୍ଲୋଡ ହୋଇଥିବା ଦେଖିବାକୁ ମିଳିଛି। ଏଥିରୁ କେତେକ ଫଟୋ ସୋସିଆଲ ମିଡିଆରେ ଭାଇରାଲ ହେବା ପରେ ଗୋଟିଏ ମୋବାଇଲରୁ ଅନ୍ୟ ମୋବାଇଲକୁ ଘୂରିବୁଲୁଛି। ତେବେ ଏଥିରେ ମହାପ୍ରଭୁଙ୍କ ଅବକାଶଠାରୁ ଆରମ୍ଭ କରି ବିଭିନ୍ନ ପୂଜା ସମୟର ଫଟୋ ରହିଛି। ଶ୍ରୀମନ୍ଦିରରେ ଠାକୁରମାନଙ୍କୁ ଯେପରି ବେଶ କରାଯାଏ ଠିକ୍ ସେହିପରି ବେଶ କରାଯାଇଛି। ସମ୍ମୁଖରେ କୁଡୁଆରେ ଭୋଗ ବି ରହିଛି। ତେବେ ଏହାର ସତ୍ୟତା କ’ଣ, ଏହା କେଉଁ ରାଜ୍ୟର ଏବଂ ମନ୍ଦିରରେ ନା ଘରେ ଚତୁର୍ଦ୍ଧାବିଗ୍ରହଙ୍କୁ ଏହିଭଳି ଉପାସନା କରାଯାଉଛି ତାହା ଏ ପର୍ଯ୍ୟନ୍ତ ସ୍ପଷ୍ଟ ଜଣାପଡ଼ିନାହିଁ।
ଘଟଣାକୁ ନେଇ ଶ୍ରୀଜଗନ୍ନାଥପ୍ରେମୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ପୁରୀର ମହେଶ୍ୱର ବେହେରା କହିଛନ୍ତି, ମହାପ୍ରଭୁଙ୍କ ସେବାପୂଜାରେ ଶ୍ରୀମନ୍ଦିରର କିଛିଟା ସ୍ବତନ୍ତ୍ର ରହିଛି। ଏହାକୁ ବାହାରେ ପ୍ରଘଟ କରିବା ଠିକ୍ ନୁହେଁ। ଶ୍ରୀମନ୍ଦିରର କେତେଜଣ ସେବକ ବାହାରକୁ ଯାଇ ମହାପ୍ରଭୁଙ୍କ ବିଧି ସମ୍ପନ୍ନ କରିଛନ୍ତି। ତାହାର ଫଟୋ ଏବଂ ଭିଡିଓ ଉତ୍ତୋଳନ କରାଯାଇ ସୋସିଆଲ ମିଡିଆରେ ଅପ୍ଲୋଡ କରାଯାଇଛି। ଏହାଠୁ ଭଳି ଦୁର୍ଭାଗ୍ୟଜନକ ଘଟଣା କ’ଣ ବା ହୋଇପାରେ ବୋଲି ସେ ପ୍ରଶ୍ନ ଉଠାଇବା ସହ ଏହା ଶାସ୍ତ୍ରସମ୍ମତ କି ନୁହେଁ ତାହା ବିଚାରଯୋଗ୍ୟ ବୋଲି କହିଛନ୍ତି।