ମୁମ୍ବାଇ : ରବିବାର ସୁଶାନ୍ତ ସିଂ ରାଜପୁତ ଆତ୍ମହତ୍ୟା କରିବା ଖାଲି ସିନେ ଜଗତ ନୁହେଁ, ସମଗ୍ର ଦେଶବାସୀଙ୍କୁ ଚକିତ କରିଛି। ସମସ୍ତେ ଏହି ଆତ୍ମହତ୍ୟାର କାରଣ ଖୋଜୁଛନ୍ତି। ସୁଶାନ୍ତଙ୍କ ଘରୁ ମଧ୍ୟ ସୁଇସାଇଡ୍ ନୋଟ୍ ଜବତ ହୋଇନାହିଁ। ଅନ୍ୟପଟେ ସୋସିଆଲ ମିଡିଆରେ ସୁଶାନ୍ତଙ୍କ ମୃତ୍ୟୁକୁ ନେଇ ନାନା କଥା ଶୁଣିବାକୁ ମିଳୁଛି। ବଲିଉଡ୍ ଅଭିନେତା ସଲମାନ୍ ଖାଁ, କରଣ ଜୋହର, ଆଲିଆ ଭଟ୍ଟ ଏବଂ ସୋନମ କପୁରଙ୍କ ଭଳି ସେଲିବ୍ରିଟିଙ୍କୁ ମଧ୍ୟ ଟାର୍ଗେଟ୍ କରାଯାଇଛି। ଲଗାତର ସୋସିଆଲ ମିଡିଆରେ ହେଉଥିବା ଆଲୋଚନା ପର୍ଯ୍ୟାଲୋଚନାରେ ଅତିଷ୍ଠ ହୋଇ ସୋନମ କପୁର ନିଜ ଇନ୍ଷ୍ଟାଗ୍ରାମ୍ରେ କମେଣ୍ଟ ସେକ୍ସନ ଅଫ୍ କରିଦେଇଛନ୍ତି। ଏହି ସମୟରେ କରଣ ଜୋହରଙ୍କ ଏକ ଶୋ’ର ପୁରୁଣା ଭିଡିଓ ଭାଇରାଲ ହୋଇଛି। ଯେଉଁଥିରେ ସେ କହୁଛନ୍ତି, ମୁଁ ସୁଶାନ୍ତଙ୍କୁ ଜାଣିନାହିଁ। ସୁଶାନ୍ତଙ୍କ ମୃତ୍ୟୁ ପରେ ସୋନମ୍ ଏକ ପୋଷ୍ଟ କରିଥିଲେ। ଯେଉଁଥିରେ ସେ ଲେଖିଥିଲେ, ହୃଦୟରେ ଘୃଣା ଥିବା ଲୋକଙ୍କ ପାଇଁ ମୁଁ ଦୁଃଖ ଅନୁଭବ କରେ। ସେମାନେ ମୋ’ ଅପେକ୍ଷା ମୋ’ ପାଇଁ ଅଧିକ ମାରାତ୍ମକ। ସେ ଆହୁରି କହିଛନ୍ତି, ସେମାନଙ୍କ ଲକ୍ଷ୍ୟ ମୋ’ ପରିବାର ଏବଂ ସାଙ୍ଗମାନଙ୍କ ପ୍ରତି। ବର୍ତ୍ତମାନ ସୀମାରେ ମୃତ୍ୟୁବରଣ କରିଥିବା ଲୋକଙ୍କ ବିଷୟରେ ଏବଂ ଲକ୍ଡାଉନ୍ ଯୋଗୁ ଜନଜୀବନ ପ୍ରଭାବିତ ସମ୍ପର୍କରେ କଥାବାର୍ତ୍ତା କରିବାର ସମୟ ଆସିଛି। ତେଣୁ ମୁଁ ମୋ’କମେଣ୍ଟ ସେକ୍ସନ ବନ୍ଦ କରିଦେଉଛି। ଏହା ପୂର୍ବରୁ ସୋନମ୍ ଏକ ଟୁଇଟ୍ରେ ଲେଖିଥିଲେ, କାହାର ମୃତ୍ୟୁ ପାଇଁ ତାଙ୍କ ଗର୍ଲଫ୍ରେଣ୍ଡ୍, ପୂର୍ବତନ ଗର୍ଲଫ୍ରେଣ୍ଡ୍, ପରିବାରବର୍ଗଙ୍କୁ ଦାୟୀ କରିବା ଅଜ୍ଞତା। ଯେଉଁମାନେ ସୁଶାନ୍ତଙ୍କ ମୃତ୍ୟୁ ପାଇଁ ଗର୍ଲଫ୍ରେଣ୍ଡ୍ ଏବଂ ପୂର୍ବତନ ଗର୍ଲଫ୍ରେଣ୍ଡଙ୍କୁ ଦାୟୀ କରୁଛନ୍ତି ସେମାନେ ଅଜ୍ଞ। ଏହି ଟୁଇଟ୍ ପରେ ସୋନମ୍ ଖୁବ୍ ଟ୍ରୋଲ ହୋଇଛନ୍ତି।